Read Runyoro - rutooro Kub 6 Bible Online

Kub 6 - Runyoro - rutooro bible

Kub 6

¹Abantu obu baatandikire kukanya omunsi; bakazaara abaana baisiki,

²abantu ba Ruhanga obu baarozire abaisiki abo bali barungi, baayeswerra baingi omuli bo nkooku baagondeze.

³Nubwo MUKAMA Ruhanga yagamba ati: “Omwoyo gwange ogunyakwomeeza, tiguliikara omu muntu ebiro byona, habwokuba omuntu w'okumara akacu kake, araayomeeraga emyaka kikumi n'amakumi abiri.”

⁴Omu biro ebi, abantu ba Ruhanga obu baateeraine na bahara b'abantu, baabazaraho abaana, omunsi haabamu abantu emanzi. Abo, nubo baabaire bantu b'amaani aba ira, bakaba bali bantu barangaanwa.

⁵MUKAMA obu yarozire obubi bw'omuntu nkooku buli bwingi omunsi, kandi ebiteekerezo n'okugonza kwe biri ha bubi bwonka,

⁶yasaalirwa habw'okuhanga omuntu omunsi, eki kyamusaaliza muno.

⁷MUKAMA nukwo kugamba ati: “Omuntu ou nahangire omunsi, ninyija kumumaraho: omuntu, ebisoro, ebyekurra, n'ebinyonyi eby'omu mwanya, ninyeyijukya habw'okuhanga ebi byona.”

⁸Baitu MUKAMA akasiima Noha.

⁹Runu, nurwo ruzaaro rwa Noha. Noha akaba ali muntu ahikiriire, ataina kibi ekirukumugambwaho omu bantu ab'ebiro ebi kandi akaba ali nganjani ya Ruhanga.

¹⁰Akaba ayina abatabani basatu: Seemu, Haamu na Yafeesi.

¹¹Omu kasumi ako, Ruhanga akarora ensi yoona nkooku ekaba esiisikaire; kandi ijwire obubi.

¹²Yarora nkooku esiisikaire; habwokuba mazima kwo abantu boona bakaba bahabire.

¹³Ruhanga yagambira Noha ati: “Mmaliriire kuhwerekereza abantu boona; habwokuba basiisire ensi, boona ninyija kubahwerekereza hamu n'ebintu byona.

¹⁴Weekorre eryaato ery'embaaho enungi ezigumire; eryaato eri, olicwemu ebisiika, olisiige orweju omunda n'aheeru.

¹⁵Olikole oti: obura bwalyo, mita kikumi mu asatu na isatu, obugazi bwalyo mita abiri na ibiri, obwemi bwalyo, mita ikumi na isatu.

¹⁶Eryaato eri, oliteho orusu, rweculike sentimita ana na ina; omulyango gw'eryaato, ogute omu rubaju rwalyo; eryaato olicwemu kaina asatu; ey'okubanza, ey'akabiri n'eyakasatu.

¹⁷Habwokuba, ninyija kusandaaza amaizi omunsi, mpwerekereze abantu boona, ebyomeezi byona mbimale hansi y'iguru; kyona ekiri omunsi kife.

¹⁸Baitu ninyija kukora na iwe endagaano; olitaaha omu lyaato, iwe na batabani bawe, mukazi wawe, na bakabaana bawe.

¹⁹Kandi ha buli kintu kyona ekyomeezi, olitaahya omu lyaato bibiri bibiri ebya buli mulingo, ekisaija n'ekikazi, biikale hamu na iwe biri byomeezi.

²⁰Ebinyonyi omu miringo yabyo, n'ebisoro omu nganda zabyo, byona ebinyakwekururra haitaka omu mulingo gwabyo, bibiri bibiri ebya buli mulingo biritaaha omu lyaato nambere oli, obirinde bireke kufa.

²¹Kandi otwale ebyokulya ebya buli mulingo, ebinyakuliibwa, obihunike, inywe n'ebyomeezi byona nibyo mulirya.”

²²Noha nukwo yakozire; yakora byona Ruhanga ebi yamuragiire.