Read Runyoro - rutooro Kub 7 Bible Online

Kub 7 - Runyoro - rutooro bible

Kub 7

¹Nubwo MUKAMA yagambiire Noha ati: “Taaha omu lyaato, iwe n'eka yaawe, habwokuba niiwe wenka ou ndozire oli muhikiriire omu bantu ab'akasumi kaawe.

²Otwale musanju musanju ha bisoro ebitarukuzirwa ekisaija n'ekikazi kyakyo, kandi otwale ekikazi n'ekisaija ha bisoro ebirukuzirwa.

³Kandi otwale musanju musanju ha binyonyi eby'omu mwanya, ekisaija n'ekikazi, nukwo oruganda rw'ebintu ebi ruleke kuhwerekererra kimu omunsi.

⁴Habwokuba omu kasumi ak'ebiro musanju, ninyija kunaga enjura omunsi, egwere ebiro makumi ana, nyamusana n'ekiro; buli kyomeezi kyona eki nakozire, ninyija kukihwerekereza nkimale omunsi.”

⁵Noha yakora byona MUKAMA ebi yamuragiire.

⁶Amaizi kusandaara omunsi, Noha akaba ahikize emyaka rukaaga.

⁷Uwe na batabani be, na mukazi we, na bakabaana be, baataaha omu lyato, nukwo bataitwa amaizi.

⁸Ha bisoro ebitarukuzirwa, na ha bisoro ebirukuzirwa, ha binyonyi na ha buli kintu ekinyakwekururra ha itaka,

⁹bibiri bibiri, ekisaija n'ekikazi byataaha omu lyato hamu na Noha, Ruhanga nkooku yamugambiire.

¹⁰Obu haahingwireho ebiro musanju, amaizi gasandaara omunsi.

¹¹Noha obu akaba ahikize emyaka rukaaga, ha kiro ekya ikumi na musanju eky'okwezi kwa kabiri, ensoro zoona ez'okuzimu zikaiguka, ebihengeezi eby'iguru byakinguka.

¹²Enjura yafukumuka omunsi okumara ebiro amakumi ana, nyamusana n'ekiro.

¹³Ha kiro eki kyonyini, Noha na batabani be: Seemu, Haamu na Yafeesi, muka Noha na bakabaana be, baataaha omu lyaato,

¹⁴bbo, ebisoro byona ebya buli mulingo, ente, na byona ebyekurra ebinyakwekururra hansi ebya buli mulingo, ebinyonyi byona ebya buli mulingo,

¹⁵abantu n'ebyomeezi byona bikataaha omu lyaato hamu na Noha, bibiri bibiri.

¹⁶Kandi ebi ebyataahire ekisaija n'ekikazi, byona ebinyakwina omubiri, bikataaha nkooku Ruhanga yaragiire Noha; nubwo MUKAMA yamukingira omu lyato.

¹⁷Amaizi gaasandaara omunsi kumara ebiro makumi ana; gakeeyongera kukanya, gaahimba eryaato, lyaruga haitaka, lyasereera.

¹⁸Amaizi gaagenda nigeyongera muno mu nsi, eryaato lyaseereera ha maizi eruguru.

¹⁹Amaizi gaayeyongerra kimu omunsi, gaamira ensozi zoona eziraihire;

²⁰gaayeyongera kukanya ha ruguru y'ensozi, gaazimira mita nkaaga na musanju.

²¹Byona ebinyakunyina omubiri, ebinyakwikara omunsi, byafa; enyonyi, ente, enyamaiswa, ebyekurra, na byona ebihuruuka omunsi, n'abantu boona;

²²byona ebikaba biri ha bwerre ebinyakunyina orwoya orw'obwomeezi, ebi nyakwikiza omu nyindo, byafa.

²³Ruhanga yahwerekereza buli kintu kyona ekyomeezi ekikaba kiri omunsi: abantu, ebisoro, ebyekurra, ebinyonyi eby'omu mwanya; byahwerekerezibwa, byahwa omunsi. Noha wenka nuwe yasigaireho, n'abo aba akaba ainabo omu lyaato.

²⁴Amaizi gaamara omunsi ebiro kikumi mu ataano.