Read Runyoro - rutooro Kub 8 Bible Online

Kub 8 - Runyoro - rutooro bible

Kub 8

¹Kandi Ruhanga yaijuka Noha n'ebisoro byona, n'ente zoona ezi akaba ainazo omu lyato. Ruhanga yaleeta omuyaga omunsi, amaizi gaakeeha,

²ensoro ez'okuzimu n'ebihengeezi by'iguru byaigara, enjura eyagwaga, yakya,

³amaizi gaagenda nigakeeha mpora mpora omunsi. Ebiro kikumi mu ataano obu byahoireho, gaayoma;

⁴kandi ha kiro ekya ikumi na musanju eky'okwezi oku okwa musanju, eryaato lyayemerra ha nsozi z'Ararati.

⁵Amaizi gaagenda nigakeeha mpora mpora okuhika ha kiro eky'okubanza eky'okwezi okwa ikumi, emitwe y'ensozi yazooka.

⁶Ebiro makumi ana obu byahoire, Noha yakingura idirisa ly'eryato eri akaba akozire,

⁷yatuma ekingoora; kyaikara nikigendagenda kunu na kuli okuhika amaizi obu gaayomiire kimu omunsi.

⁸Hanyuma, yatuma eriiba eri akaba ayinalyo omu lyato, ayetegereze amaizi obu garaaba gakeehere omunsi;

⁹baitu obu lyabuzirwe h'okwemerra, lyamugarukira, habwokuba amaizi gakaba gakyali omunsi yoona. Aho yata omukono aheeru, yalikwata, yalitaahya omu lyato nambere akaba ali.

¹⁰Yalindaho ebiro musanju ebindi, yayongera yatuma eriiba eri;

¹¹eriiba lyagaruka nambere ali orwebagyo, linyina ibabi eryakaruga kunogwa; Noha nuho yamanyiire amaizi nkooku gakeehere omunsi.

¹²Yayongera yalindaho ebiro musanju ebindi, yatuma eriiba, leero obu litagaruke.

¹³Ha kiro eky'okubanza eky'okwezi okw'okubanza, Noha eki yahikiizeeho emyaka rukaaga na gumu ey'obukuru, amaizi gaayomera kimu omunsi; Noha yahigaho ekikaba kiswekere eryato, yalinguza aheeru, yarora ensi yoona eyomere

¹⁴Ha kiro ekya makumi abiri na musanju eky'okwezi okw'akabiri, ensi ekaba eyomere.

¹⁵Nubwo Ruhanga yagamba Noha ati:

¹⁶“Turuka omu lyato, iwe, mukazi wawe, batabani bawe na bakabaana bawe.

¹⁷Turukya buli kyomeezi kyona ekinyakwina omubiri eki oinakyo; ebinyonyi n'ebyekurra byona ebinyakwekururra ha itaka, bizaale, bikanye biijule omunsi.”

¹⁸Noha yaturuka na batabani be, na mukazi we, na bakabaana be.

¹⁹Ebisoro byona, ebyekurra byona n'ebinyonyi byona n'ebintu byona ebinyakuli omunsi, byaturuka omu lyato omu nganda zaabyo.

²⁰Nubwo Noha yayombekiire MUKAMA itambiro, yakwata ebisoro byona ebitarukuzirwa, n'ebinyonyi byona ebitarukuzirwa, yabihonga yabyokeza ha itambiro.

²¹Ruhanga obu yaboyiirwe ekisorrokoko ekirungi, yamalirra ati: “Tindyongera kukyeena ensi habw'omuntu, habwokuba okuruga omu buto bwe, atwalirizibwa obubi; kandi tindyongera kuhwerekereza ebihangwa byona ebyomeezi nkooku nakozire.

²²Akasumi koona ensi obu eriba ekyaaroho, isiga n'igesa, obutiti n'obutagasi, ekyanda n'irumbi, nyamusana n'ekiro, tibirihwaho.”