Read Runyoro - rutooro Kub 9 Bible Online

Kub 9 - Runyoro - rutooro bible

Kub 9

¹Kandi Ruhanga yaha Noha n'abaana be omugisa naagamba ati: “Muzaale, mukanye, mwijuze ensi.

²Enyamaiswa zoona ez'omunsi, ebinyonyi byona eby'omu mwanya, buli kintu kyona ekinyakwekururra ha itaka, n'encu zoona ez'omu nyanja, biraabatiinaga kandi biraabeekengaga; mubiremege.

³Ekintu kyona ekyomeezi kandi ekinyakugenda, murakiryaga; nkooku nabahaire ebimera kubirya, nukwo ndukubaha binu byona.

⁴Kyonka, mutalirya enyama ey'ekisoro ekitasazirwe, ekikamiirwemu esagama.

⁵Mazima kwo esagama y'omuntu ndigijunaana, ndibajunaana esagama y'ekisoro ei mwaliiraine omu nyama yakyo, ndijunaana omuntu ha bw'esagama y'omuntu mutaahi we rundi ey'ekisoro ei mwaliiraine omu nyama yakyo.

⁶Weena anyakuseesa esagama y'omuntu, n'eyeeriseeswa omuntu ondi; habwokuba Ruhanga akahanga omuntu omu kisisani kye.

⁷Baitu inywe, muzaale mukanye, mwijuze ensi kandi mugireme.”

⁸Nubwo Ruhanga yagambiire Noha na batabani be ati:

⁹“Hati naragaana endagaano na inywe kandi na baijukuru baanyu eribakwataho,

¹⁰kandi nagiragaana na buli kihangwa kyona eki munyina kyo, ebinyonyi, ente n'ebisoro byona eby'omunsi ebi munyina byo, ebintu byona ebyarugire omu lyato.

¹¹Ningumya endagaano yange na inywe erukugamba ngu ebintu byona ebyomeezi, tibirigaruka kuhwerekerezibwa okusandaara kw'amaizi, kandi tihaligaruka kubaho kusandaara kw'amaizi kuhwerekereza ensi.”

¹²Ruhanga yagamba ati: “Kanu nuko kokurorraho ak'endagaano ei ndukuragaana na inywe na buli kyomeezi kyona eki munyina kyo, kandi kaliba k'abantu akasumi ak'omumaiso.

¹³Nata omu bicu omuhangaizima gwange, guraabaga kokurorraho ak'endagaano ei ndagaine na inywe.

¹⁴Obu ndaaleetaga ebicu haiguru, kandi omuhangaizima gukazooka omu bicu,

¹⁵ndaijukaga endagaano ei ndagaine na inywe n'ebyomeezi byona; amaizi tigaligaruka kusandaara kuhwerekereza inywe n'ebyomeezi byona.

¹⁶Omuhangaizima obu gurazookaga omu bicu, ndaaguroraga nyijuke endagaano ey'ebiro n'ebiro ei naragaine n'ebyomeezi byona, ebinyakuli omunsi.”

¹⁷Ruhanga yayongera yagambira Noha ati: “Kanu nuko kokurorraho ak'endagaano ei ndagaine na iwe n'ebihangwa byona ebiri omunsi.”

¹⁸Batabani ba Noha abaarugire omu lyaato nubo: Seemu, Haamu na Yafeesi. Haamu, nuwe yazaire Kanaani.

¹⁹Omu batabani ba Noha abo basatu, nuho haarugire abantu boona abali omunsi.

²⁰Noha nuwe yabandize kulima itaka, akabyara orugonjo rw'emizabbibbu;

²¹yanywa eviini yatamiira, yabyama omu heema ye ali busa.

²²Haamu ise Kanaani obu yarozire ise nkooku ali busa, yamanyisa bagenzi be ababiri abakaba bali aheeru.

²³Nubwo Seemu na Yafeesi bakwasire ekyokujwara, bakyeta ha mabega, baagenda kinyumanyuma, baasweka ise bo; tibaamurora njuuro.

²⁴Noha eviini obu yamurugireho, yamanya mutabani we omuto eki yamukozire,

²⁵yamukyeena naagamba ati: “Kanaani naakafe kubi, araabaga mwiru w'abairu hali bagenzi be.”

²⁶Yayongera yagamba ati: “MUKAMA Ruhanga wange ahe Seemu omugisa; Kanaani abege mwiru we.

²⁷Ruhanga akanyise Yafeesi, aikalege omu heema za Seemu; Kanaani abege mwiru we.”

²⁸Kuruga ha kusandaara kw'amaizi, Noha akongera yayomeera emyaka endi bikumi bisatu n'ataano.

²⁹Emyaka yona Noha ei yayomiire ekahika rwenda n'ataano; yafa.