Read Runyoro - rutooro 2 Sam 1 Bible Online

2 Sam 1 - Runyoro - rutooro bible

2 Sam 1

¹Daudi obuyarugire kwita Abamaleki Saulo amazire kufa, akamara Zikiraga ebiro bibiri,

²ha kiro ekya kasatu, haija omusaija ow'akaba naaruga omurukande rwa Saulo, ajwaire engoye ezitemukire kandi itaka limuli omumutwe. Obuyahikireho Daudi, yajuumara hansi yamutamu ekitiinisa.

³Daudi yamukaguza ati: “Nooruga nkaha?” Omusaija yagarukamu ati: “Ncwire omurukande rwa Isirairi.”

⁴Daudi yamukaguza obwakabiri ati: “Hagwireyo ki? Ngambira.” Omusaija yagambira Daudi ati: “Abantu bairukire ha bulemu, kandi abaingi baisirwe; Saulo n'omutabani Yonasaani nabo nuho bagendiire.”

⁵Nubwo Daudi yakaguza omusigazi oli ayamugambiire ebi ati: “Iwe omanyire ota Saulo n'omutabani Yonasaani nkooku bafiire?”

⁶Omusigazi yagarukamu Daudi ati: “Nkaba ndi harusozi Giriboha; narora Saulo ayetegere icumu lye aligwireho, abanyanzigwa bamuroho nibamurumba.

⁷Obuyakubuutukire, yandora yanyeta, namwetebuka nti: ‘Taata.’

⁸Yankaguza ati, ‘Niiwe oha?’ Namugarukamu nti: ‘Ndi Mumaleeki.’

⁹Yangamba ati: ‘Nyirra haihi onyite; ninsaalirwa muno baitu ndemere kufa.’

¹⁰Na nyowe nukwo kumwirra haihi namusonga, habwokuba nkagumya nkooku atarukusobora kukira, amazire kuhutaara muno ati; nubwo namwihaho ekondo ei yabaire ajwaire n'omulinga ogukaba gumuli hamukono; mbinu mbikuleetiire mukama wange.”

¹¹Nubwo Daudi yakwata engoye ze yazitemura; n'abantu boona abaakaba ainabo nukwo baakora;

¹²baaba omu kiinamirro, baarra, baasiiba okuhika omurwiririzi, habwa Saulo n'omutabani Yonasaani, habw'abantu ba MUKAMA, na ha bw'abantu ba Isirairi, habwokuba bakaba bagwire omubulemu, baisirwe empirima.

¹³Nubwo Daudi yakaguza omusigazi ayamuleetiire amakuru ati: “Nooruga nkaha?” Yagarukamu ati: “Nyowe ndi mutabani w'ensuhuuki Omumaleeki.”

¹⁴Daudi yagaruka yamukaguza ati: “Osoboire ota kutatiina kugorra omukono gwawe kwita omuseeswaho magita wa MUKAMA?”

¹⁵Daudi nubwo yayesire omu ha basaija be yamuragira ati: “Gwera omuntu ogu.” Omusaija wa Daudi yagwera Omumaleeki yamuteera yamwita.

¹⁶Daudi yagambira Omumaleeki ati: “Esagama yawe ebe hali iwe; akanwa kawe nuko kakurumiriize, wagamba oti: ‘Nkaita omuseeswaho magita wa MUKAMA.’ ”

¹⁷Daudi yalirirra Saulo n'omutabani Yonasaani,

¹⁸ebigambo ebiyagambire naarra, yaragira byegesibwe abantu ba Yuda; ebigambo ebi bikahandiikwa omukitabu kya Yasara, nibyo binu:

¹⁹“Ai bambi Isirairi, abeebembezi baitu bafiire; abarwani baitu emanzi mali bagwire!

²⁰Eki otakigamba omukiikaro Gaasi; otakirangaaniza omumakuute ga Asikeroni; bahara b'Abafirisiti bataliikara kusemererwa bahara b'abatasazirwe bataliikara kwebuga.

²¹Inywe ensozi eza Giriboha mutaligwibwaho orume rundi enjura, Emisiri ey'ekiikaro eki etalimeza kantu! Habwokuba oku engabu y'ow'amaani nuho yasiisiirwe, engabu ya Saulo nuho etarasiigirwe magita.

²²Ha sagama yabaisirwe, ha bisajwa by'emanzi, Obuta bwa Yonasaani butaruge enyuma, empirima ya Saulo etagaruke kwonka.

²³Bambi Saulo na Yonasaani, enganzi kandi abagonzebwa! Bakaikara hamu bali boomeezi, kandi n'omukufa bataahukane; Baarahukaga kukira isamba, bakaba bali b'amaani okukira entale.

²⁴Inywe bahara ba Isirairi, mulirirre Saulo, ayabajwekaga engoye enungi eza kahuukya, ayataga amanyumizo ga zaabbu ha byokujwara byanyu.

²⁵Murole emanzi nkooku igwire omubulemu! Yonasaani aitiirwe omu nsozi zawe!

²⁶Onsaaliize muno, mugenzi wange Yonasaani; wansemezaaga muno; okangonza muno, engonzi zawe ikakira ez'abakazi.

²⁷Ai bambi, murole emanzi nkooku igwire, ebyokurwanisa byabo bisigaire aho, tibiina mugaso!”