Read Runyoro - rutooro 2 Sam 10 Bible Online

2 Sam 10 - Runyoro - rutooro bible

2 Sam 10

¹Ebi obubyamazire kubaho, omukama w'Abamooni yafa, omutabani Hanuni yateera engoma.

²Daudi akagamba ati: “Hanuni mutabani wa Nahasi ninyija kumukorra eby'amazima, nka ise okuyankoliire eby'amazima. Aho nukwo kutuma abaheereza be bamuhuumuze habw'okuferwa ise.” Abaheereza ba Daudi obubaahikire omunsi y'Abamooni,

³abeebembezi b'Abamooni baakaguza Hanuni mukama wabo bati: “Daudi habw'okukutumira ab'okukuhuumuza, nooteekereza oti naatamu Sso ekitiinisa? Eki atakikole habw'okusaalizibwa okufa kwa sso, ekyamutumisize abaheereza, nukwo kuserra orubuga arutate, nukwo aruhwerekereze”

⁴Aho Hanuni nukwo kukwata abaheereza ba Daudi, buli omu yamumwaho ekicweka kimu eky'omuleju gwe, ebijwaro byabo yabisara byagarukira hanyugunyu, yababinga.

⁵Daudi obubaamugambiire ekigambo eki, yatuma abantu ab'okubaitirana, habwokuba bakaba bahemwirwe muno. Yabagambira ati: “Mwikale Yeriko okuhika emireju yanyu obwerikamera ekakura, nubwo mugaruke omuka.”

⁶Abamooni obubaarozire Daudi nkoku abanobere, baatuma nibeegulirra Abasiriya aba Besirehobu, naaba Zoba, abaserikale ab'ebigere mitwaro ebiri, omukama owa Maaka n'abasaija orukumi rumu, n'abasaija aba Tobu mutwaro gumu n'enkumi ibiri.

⁷Daudi obu yahuliire ekigambo eki, yatuma Yowabbu n'ihe ryona ery'abasaija ab'amaani.

⁸Abamooni baasimba orukarra ha mulyango gw'irembo; Abasiriya aba Zoba n'aba Rrehobu, n'abasaija aba Tobu na Maaka, bakaba bali bonka omubwerre.

⁹Yowabbu obuyarozire obulemu nkooku bumuturukire omumaiso n'enyuma, yakoma omu Isirairi abasaija abamu abatongoirwe, yabasimba murukarra barwanise Abasiriya;

¹⁰abaasigaireho yabakwasa Abisayi owanyina, nawe yabasimba orukarra barwanise Abamooni.

¹¹Yagamba ati: “Obworaarora Abasiriya bampingurana amaani, oije onkonyere, nanyowe obundaarora Abamooni baakuhingurana amaani, ndaija nkukonyere.

¹²Ogume, kandi obe manzi! Katurwane obwitane habw'abantu baitu na habw'embuga za Ruhanga waitu; MUKAMA eki arukugonza nikyo kikorwe.”

¹³Nubwo Yowabbu n'abasaija abakaba bali na uwe, baagenda omumaiso kuseesira Abasiriya; Abasiriya bairuka.

¹⁴Abamooni obubaaboine Abasiriya bairukire, nabo bairuka Abisayi, baataaha omurubuga. Nubwo Yowabbu yaleka kurwanisa Abamooni, yagenda Yerusaalemu.

¹⁵Baitu Abasiriya obubaarozire Abaisirairi nkooku babasingwire, baayesorooza hamu.

¹⁶Hadadazeeri yatuma abantu baaleeta Abasiriya abakaba bali obuseeri bw'ekisaaru Efuraate; baahika Heramu, bali hamu na Sobaki, engabwa y'ihe rya Hadadezeeri abebembiire.

¹⁷Daudi obuyahuliire ekigambo eki, yasorooza amahe g'Abaisirairi yayambuka Yorudaani, yahika Heramu. Abasiriya baasimba orukarra kurwanisa Daudi, baamurwanisa.

¹⁸Abaisirairi baabinga Abasiriya, Daudi yaita abasaija Abasiriya abatembi b'ebigaali rusanju, abatembi b'embaraasi emitwaro ena, Sobaki engabwa y'ihe yabo yamuhutaaza, na uwe aho atarugeho.

¹⁹Abakama boona abakaba bali bairu ba Hadadezeeri, obubaarozire Abaisirairi nkooku babasingwire, baabasaba obusinge, baafooka batungwa baabo. Okuruga obu, Abasiriya baatiina kugaruka kukonyera Abamooni.