Read Runyoro - rutooro 2 Sam 11 Bible Online

2 Sam 11 - Runyoro - rutooro bible

2 Sam 11

¹Omwaka obu gukaba nigutandika, akasumi abakama aka baramagiramu, Daudi akatuma Yowabbu, yamutaho abaheereza be, n'Abaisirairi boona; baahwerekereza Abamooni, baagota Raba. Baitu Daudi yasigara Yerusaalemu.

²Kiro kimu, omubwire bw'orwebagyo muno, Daudi obuyaimukire omu kitabu kye, yatandika kurubatarubata harusu rw'enju y'omukama, yarora omukazi naayoga; omukazi ogu akaba asemiire muno.

³Daudi yatuma abantu bakaguliirize ebirukumufaaho. Omuntu omu yagamba ati: “Omukazi ogu taakuba Besiseba muhara wa Eryamu, muka Uliya Omuhiiti?”

⁴Daudi nukwo kutuma abakwenda bamuleete, baamumuleetera, yaraara na uwe (omu kasumi ako, omukazi ogu nubwo akaba yakamara kuzira.) Hanyuma omukazi ogu yagaruka owabo.

⁵Kwija kurora atwaire enda, yatumaho Daudi naamugambira ati: “Nyina enda.”

⁶Nubwo Daudi yatumaho Yowabbu naamugambira ati: Uliya Omuhiiti ogu omuntwekere, Yowabbu na uwe nukwo yakozire, yatweka Uliya omba Daudi.

⁷Uliya obuyahikire hali Daudi, Daudi yamukaguza Yowabbu nkooku ali, abantu nkooku bali, n'obulemu nkooku bukaba nibugenda.

⁸Nubwo Daudi yagambira Uliya ati: “Genda omuka yawe ohumuleho.” Uliya yaruga omunju y'omukama, baitu omukama yamukurasa ekisembo.

⁹Baitu Uliya akaraara ha mulyango gw'enju y'omukama hamu n'abaheereza ba mukama we, omuka ye atagyeyo.

¹⁰Obubaagambiire Daudi Uliya nkooku ataragenzire omuka ye, Daudi yamukaguza ati: “Omazire omwanya mukooto otaroho, kiki ekikutangire kugenda omuka yawe?”

¹¹Uliya yagarukamu Daudi ati: “Esanduuko ey'Endagaano ya MUKAMA, Abaisirairi n'ab'oruganda rwa Yuda baraara omunsiisira; MUKAMA wange Yowabbu n'abaheereza be, nibateera enkande omubwerre; nyowe, ninyowe ngende omuka yange, kulya n'okunywa n'okwegonza na mukazi wange? Ndahiire MUKAMA Ruhanga omwomeezi, na iwe wenka ninkurahira, ekintu nkeeki tindukwija kukikora.” Daudi nubwo yagambiire Uliya ati:

¹²“Kiro kinu, nakyo kimale hanu, ijo nubwo ndikwikiriza ogende.” Kiro eki n'ekyakurasireho, Uliya nukwo kubimara Yerusaalemu.

¹³Daudi akeeta Uliya, kulya na uwe eky'ekiro, Uliya yalya kandi yanywa, ago nugo magezi Daudi aga yacwire kumutamiiza; omu rwiririzi yagenda kubyama omu kitabu kye, hamu n'abaheereza ba mukama we, baitu omuka ye atagyeyo.

¹⁴Nyenkya obubwakiire, Daudi yahandiikira Yowabbu ebbaruha yagikwasa Uliya nuwe agimutwarre.

¹⁵Omu bbaruha egi, akahandiikamu ebigambo binu: “Uliya ogu, omute omurukarra orw'omumaiso, nambere obulemu bukizire kusaarra, mumulekeyo nukwo atemwe, afe.”

¹⁶Omukasumi ako, Yowabbu nuwe akaba agosire orubuga, nukwo kuta Uliya omukiikaro nambere hakaba hali abasaija ab'amaani.

¹⁷Abasaija ab'omurubuga bakaturuka baarwanisa Yowabbu; abamu ha baheereza ba Daudi, aho batarugeho. Uliya Omuhiiti na uwe omuli abo, nuho yagendiire.

¹⁸Nubwo Yowabbu yatumaho Daudi naamugambira obulemu nkooku bukaba buli:

¹⁹yaragira omukwenda ati: “Obworaamara kugambira omukama amakuru g'obulemu,

²⁰obworaabona yabiihirwa akakukaguza ati: ‘Kiki ekyabatwaire kurwanira haihi muno n'orubuga mutamanye abanyanzigwa nkooku bakaba nibaija kurasa nibeema omukisiika omunda?

²¹Timurukwijuka Abimereki mutabani wa Yerubbesesi nkooku yaisirwe? Omukazi ateemerre omukisiika, yamuhungurra ensiiso, yamuteera, yafa yagwa omukiikaro Sebezi? Kiki ekyabairiize haihi muno n'ekisiika?’ Hanyuma, nubwo omugambire oti: ‘Omwiru wawe Uliya Omuhiiti, na uwe afiire.’ ”

²²Nubwo omukwenda yagenda, yahikaho Daudi, yamugambira byona Yowabbu ebiyamutumire.

²³Hanyuma yagambira Daudi ati: “Abanyanzigwa baitu batukirize amaani, baaruga omurubuga, baija kuturwanisiza omubwerre; baitu tubairukize twabagarra enyuma ha mulyango gw'irembo.

²⁴Abarasi b'emyambi bakeema omukisiika, baarasa abaheereza bawe; abamu omuli bo baafa; omwiru wawe Uliya Omuhiiti, omuli abo na uwe nuho yagendiire.”

²⁵Daudi yagambira omukwenda ati: “Ogende ogambire Yowabbu oti: ‘Eki kireke kukusaaliza muno, ogu nugwo omulimo gw'empirima, kiro kimu, eita omuntu omu, kiro kindi eita ondi; inywe mwongere kuseesira orubuga, muruhwerekereze!’ Omutemu amaani.”

²⁶Muka Uliya obuyahuliire, Uliya iba nkooku afiire yatamu omukungo.

²⁷Akasumi ak'ekiinamirro obukaahoireho, Daudi yatuma abantu batwale omufaakati omunju ye, yamuswera, yamuzaaraho omwana w'obwojo. Baitu ekintu eki Daudi ekiyakozire, kikabiihiza MUKAMA.