Read Runyoro - rutooro 2 Sam 12 Bible Online

2 Sam 12 - Runyoro - rutooro bible

2 Sam 12

¹MUKAMA akatuma Nasani omurangi hali Daudi. Nasani obuyahikireho Daudi, yamucwera orufumo runu ati: “Omu rubuga orumu, hakaba harumu abasaija babiri, omu muguuda, ondi munaku.

²Omuguuda, akaba aina amagana maingi ag'embuzi n'ag'ente;

³baitu omunaku, akaba ataina kantu, okwihaho akataama akarungi akato kamu konka. Yakongongya, yakakuza hamu n'abaana be; akataama ako kaalyaga ha byokulya ebiyalyaga, kaanyweraga ha kikopo kye, yakeetaga omukifuba, yakasisanizaaga nka muhara we.

⁴Omusaija omuguuda ogu, akabungirwa omugenyi, baitu atagonze kukwata emu ha mbuzi rundi ha nte ze kugiitira omugenyi ayamubungiire, baitu yakwata akataama ak'omusaija omunaku oli, nuko yaita, yacumbira omugenyi we.”

⁵Daudi obuyahuliire eki, ekiniga kyayenda kumwita; habw'ekikorwa omusaija oli ekiyakozire, yagambira Nasani ati: “Ndahiire MUKAMA Ruhanga omwomeezi, omusaija ayakozire eki, asemeriire kufa;

⁶habw'okukora ekintu eki, kandi na habw'okutaba n'embabazi, entaama emu agirehemu ina.”

⁷Nasani yagambira Daudi ati: “Omuntu ogu tali ondi n'ondi, baitu niiwe. Binu nibyo MUKAMA Ruhanga wa Isirairi arukugamba ati: Nkakuseesaho amagita nakufoora mukama wa Isirairi, kandi nkakujuna Saulo;

⁸nkakuha enju ya mukama wawe, baka mukama wawe nabakuta omukifuba, nkakuha enju ya Isirairi n'eya Yuda; ebi obubyakubaire bitarukukumara, naakukwongiireho.

⁹Kiki ekyakugayisize ekigambo kya MUKAMA, okakora ekyatarukusiima? Okaragira Uliya Omuhiiti, baamwisa empirima, watwara mukazi we wamuswera, Uliya Abamooni baamwisa empirima.

¹⁰Habweki, habw'okungaya watwara muka Uliya Omuhiiti kumuswera, ebiro byona, abamu ha baijukuru baawe baraitwaga empirima.”

¹¹Binu nibyo MUKAMA arukugamba ati: “Ndikwimukiza akabi omunju yawe yonyini; bakazi bawe ndibakwihaho noorora oti, mbahe omutaahi, abyame nabo omusana nigujwa.

¹²Iwe ekiwakozire, okakikora omunsita, baitu nyowe, kinu ndikikora Isirairi yoona neerora, kandi nyamusana.”

¹³Daudi yagamba Nasani ati: “Nkasiisira MUKAMA!” Nasani yagarukamu Daudi ati: “MUKAMA akakuganyira ekibi kyawe; torukwija kufa.

¹⁴Baitu, habw'okukora ekintu nka kinu okagaya muno MUKAMA, omwana ouwazaire naija kufa.”

¹⁵Nubwo Nasani yataaha omuka. Omwana wa muka Uliya ouyazaaliire Daudi, MUKAMA yamurwaza muno,

¹⁶Daudi nukwo kwesengereza Ruhanga omwana we akire; yayanga kulya, yagenda omukisiika kye, yabyama hansi ekiro kyona.

¹⁷Abakuru ab'omunju ye baamuhikaho, bamwimukye hansi; baitu ataimuke, kandi atalye nabo byokulya.

¹⁸Ha kiro ekya musanju, omwana yafa. Abaheereza be baatiina kumugambira omwana nkooku afiire; baagamba bati: “Omwana obwakaba akiri mwomeezi, tukabaza na Daudi, baitu atatuhurre; hati tumugambire tuta omwana afiire? Ataikara kwekora kubi.”

¹⁹Baitu Daudi obuyarozire abaheereza be nibahwehweterrangana, yamanya omwana we nkooku afiire; nukwo kubakaguza ati: “Omwana afiire?” Baamugarukamu bati: “Afiire.”

²⁰Nubwo Daudi yaimuka hansi, yayoga, yayesiiga amagita, yajwara engoye ezindi, yagenda omunju ya MUKAMA yaramya; hanyuma yataaha omuka ye; obuyasabire ebyokulya, baabimusembereza, yalya.

²¹Nubwo abaheereza be baamukagwize bati: “Kinu nookora ki? Omwana obwakaba akyali mwomeezi, wasiibaga njara; kandi waikaraga noomulirirra, baitu hati obwafiire, waimuka walya ebyokulya!”

²²Yabagarukamu ati: “Omwana obwakaba akyali mwomeezi, nasiibaga njara kandi naikaraga nindira; habwokuba nateekerezaaga nti: MUKAMA yakungirra embabazi, omwana wange akira.

²³Kandi hati obwamazire kufa, kiki ekirukuntanga kulya? Nsobora kumuhumbuura? Nyowe, ninyowe ndigenda nambere ali, baitu uwe taligaruka nambere ndi.”

²⁴Nubwo Daudi yahuumuza mukazi we Besiseba, yatemba ekitabu kye, yaraara na uwe, omukazi yatwara enda, yazaara omwana w'obwojo, Daudi yamuruka ibara Solomooni, MUKAMA yagonza omwana ogu,

²⁵nukwo kutuma Nasani omurangi amuruke ibara Yedidiya, amakuru gaalyo omugonzibwa wa MUKAMA.

²⁶Aho Yowabbu yarwanisa Raba orubuga orukuru orw'Abamooni, yaruhamba.

²⁷Yatuma abakwenda hali Daudi yamugambira ati: “Ndwanisize orubuga Raba; kandi ekindi, nkwasire orubuga orw'amaizi.

²⁸Hati, sorooza abantu abanyakusigaire, obaterre orukande haihi n'orubuga, oruhambe; ntaikara kuruhamba rukarukwa ibara lyange.”

²⁹Nubwo Daudi yazinisa ihe, yaseesira orubuga Raba, yarurwanisa, yaruhamba.

³⁰Ekondo y'embandwa yabo, eyekaba neehikya nka kiloguraamu asatu na itaano kandi erumu ibaale ery'omuhendo, yagimwiha ha mutwe, yagijwara, orubuga yarunyagamu ebintu bingi.

³¹Abantu abakaba barurumu, yabata ha mulimo ogw'emisumeeni, esuuruuru, endemu, yabaragira okukoraga omu tanuuro; embuga zoona ez'Abamooni nukwo yaikozire ati: Hanyuma, Daudi n'abantu be boona baagaruka Yerusaalemu.