Read Runyoro - rutooro 2 Sam 13 Bible Online

2 Sam 13 - Runyoro - rutooro bible

2 Sam 13

¹Abusalomu mutabani wa Daudi, akaba aina munyanya owakaba asemiire muno, ibara lye nuwe Tamara; obuhaahingwireho akasumi Amunooni mutabani wa Daudi ondi, yaligira munyanya ogu.

²Amunooni mutabani wa Daudi, munyanya Tamara akaba amumalizeho ebitekerezo, baitu habw'okutasobora kumutunga, ekyarugiremu, Amunooni nukwo kurwara. Tamara akaba atamanyire musaija, kikaba kitarukusoboka Amunooni kumukoraho ekigambo.

³Amunooni akaba aina munywani we, ibara lye Yonadabu, mutabani wa Simeha, owanyina Daudi; Yonadabu ogu akaba ali muntu ncwangya mali.

⁴Akakaguza Amunooni ati: “Iwe omwana w'omukama, buli kiro noozooka nkooku oina obujune, kiki ekirukukutuntuza? Tokingambira?” Amunooni yamugarukamu ati: “Ningonza Tamara, munyanya nyowe, anyakuzaarwa na Abusalomu,”

⁵Yonadabu yagambira Amunooni ati: “Byama ha kitabu kyawe oyerwaze; Sso obwaraija kukurora, omugambire oti: ikiriza munyanya nyowe Tamara aije ampe omugaati ogw'okulya, ancumbire ebyokulya mmuroleriire, mbirole, abingabire.”

⁶Nubwo Amunooni yabyama, yayerwaza; omukama ise obuyaizire kumurora, Amunooni yamugambira ati: “Nkwesengeriize, oikirize munyanya nyowe Tamara acumbe keeki ibiri, aicumbe mmuroleriire, nukwo azingabire.”

⁷Nubwo Daudi yatumireho Tamara omuka naagamba ati: “Ogende owa Amunooni omucumbire ebyokulya.”

⁸Tamara yagenda omunju ya munyanya, yamusanga abyamire. Yakwata ensaano, yagituga, yakora keeki Amunooni amuroleriire, yazookya

⁹yazimwihurra yamusembereza, baitu yayanga kulya. Yagambira munyanya ati: “Weena anyakuli hanu, mugambe arugeho.” Abantu boona baarugaho baagenda.

¹⁰Nubwo Amunooni yagambiire Tamara ati: “Ebyokulya bireete omukisiika, obingabire.” Tamara yatwara keeki eziyacumbire omukisiika ky'Amunooni munyanya.

¹¹Obwakaba naimwiriza haihi, Amunooni yakwata munyanya yamugamba ati: “Munyanya nyowe ija tubyame hamu!”

¹²Tamara yagarukamu munyanya ati: “Nangwa munyanya nyowe; leka kumpambiriza; ekintu nkeeki tikikorwa omu Isirairi; otakisura okakora ekintu eky'obudoma, eky'orwanju.

¹³Obu, ndigaruka nzooke nta omu bantu? Kandi na iwe, oliba oswaire muno omu Isirairi. Hati nu, nkwesengeriize, eki kigambire omukama: tarukwija kukunyima.”

¹⁴Baitu ebi, Amunooni atabihuliriize; kandi habw'okukiza munyanya amaani, yamuhamba.

¹⁵Okuruga obu, Amunooni yanobera kimu Tamara; omulingo yamunoberemu, gwakira hara nkooku yamugondeze. Yamugambira ati: “Ruga na hanu ogende.”

¹⁶Baitu Tamara yamugarukamu ati: “Nangwa munyanya nyowe, okumbinga omumulingo gunu, musango mukooto okukira kiri ekyokozire.” Baitu Amunooni ebyatabihuliriize.

¹⁷Yayeta omusigazi ayamuheerezaaga yamugambira ati: “Omukazi ogu munyihe omumaiso omunage aheeru, omukingireyo.”

¹⁸Tamara akaba ajwaire ekyokujwara eky'emikono eraihire; habwokuba ababiitokati empikirre abaira bahara b'omukama, nukwo baajwaraga bati. Nubwo omuheereza wa Amunooni yaturukya Tamara, yamukingira aheeru.

¹⁹Tamara yayeseesa iju omumutwe, yatemura ekyokujwara ekiraihire ekyakaba ajwaire; yagenda ayekwasire ha maiso, atairemu omukungo.

²⁰Munyanya Abusalomu obuyamuboine, yamukaguza ati: “Munyanyoko akuhambire? Weesize mwana wa mau; ogu munyanyoko, eki kireke kukusaaliza muno.” Nubwo Tamara yaikara omunju y'Abusalomu munyanya, aina obujune kandi ali wenka.

²¹Omukama Daudi obuyahuliire ebintu ebi byona, ekiniga kyayenda kumwita,

²²Abusalomu atagire ekiyabaliize Amunooni, ekirungi rundi ekibi; habwokuba akamunoba habw'okuhamba munyanya, Tamara.

²³Emyaka ebiri enyakwijwire obuyahoireho, Abusalomu akabungisa abasazi b'ebyoya by'entaama aba Baalihazoora enyakuli haihi na Efuraimu, yaraliza ababiito batabani b'omukama.

²⁴Akagenda yagambira omukama Daudi ati: “Agutamba, hati ninsara entaama zange ebyoya; ninsaba omukama hamu n'abaheereza be babe ha mukoro ogu.”

²⁵Omukama yagarukamu Abusalomu ati: “Itwena titwagende, eki nikiija kukuleetera obulemeezi.” Abusalomu yahambiriza omukama, baitu omukama yayanga, kyonka yamusabira omugisa.

²⁶Abusalomu yagamba omukama ati: “Nkwesengeriize, iwe obworaaba otarukugenda, ikiriza owanyina nyowe Amunooni agende naitwe.” Omukama yamukaguza ati: “Kiki ekyorukwendera kugenda na uwe?”

²⁷Baitu Abusalomu yayongera kuhambiriza omukama okuhika obuyakaikiriize Amunooni, na batabani be boona kugenda na Abusalomu.

²⁸Nubwo Abusalomu yaragiire abaheereza be ati: “Mwetegereze, obumuraabona Amunooni yanywa muno kandi obundaabagambira nti: ‘Mumuteere’ mumwite, mutatiina, ninyowe mbaragiire; mutatiina kandi mutagira enkizi.”

²⁹Abaheereza ba Abusalomu baakoraho Amunooni, Abusalomu ekiyabaragiire, baamwita. Nubwo batabani b'omukama boona baimuka, buli omu yatemba enyumbu ye, bairuka.

³⁰Obubakaba bakyali omumuhanda, amakuru gaahikaho Daudi ngu: “Abusalomu aisire batabani b'omukama boona, tasigireho n'omu.”

³¹Nubwo omukama yaimuka, yatemura ebyokujwara bye, yabyama hansi, abaheereza be boona abaakaba ainabo, nabo baatemura ebyokujwara byabo.

³²Baitu Yonadabu mutabani wa Simeha owanyina Daudi, yagamba ati: “Omukama aleke kuteekereza ngu batabani be boona, abasigazi babaisire. Amunooni wenka nuwe afiire, habwokuba okuruga ha kiro ekiyahambiireho munyanya Tamara, Abusalomu akamalirra kukora eki, kandi nuwe yakiragiire.

³³Habweki mukama wange, eki kireke kukusaaliza, otateekereza ngu batabani bawe boona bafiire; Amunooni wenka muwe afiire.”

³⁴Baitu Abusalomu airukire. Omukasumi ako, omuserikale ow'akaba naalinda, yaimukya amaiso, yarora abantu baingi nibaruga omuruguudo orwa Horanaimu, harubaju rw'orusozi.

³⁵Yonadabbu yagamba omukama ati: “Abaana b'omukama mbali, nibaija omwiru wawe nkooku yagambire, nukwo kibaire.”

³⁶Obwakaba nakyamara kugamba eki, batabani b'omukama baahika, baateera omukungo; omukama na uwe n'abaheereza boona baaborooga.

³⁷Baitu Abusalomu akairuka yagenda omba Tarumayi mutabani wa Amihudi, omukama wa Gesura. Daudi yamara omwanya mukooto naalirirra omwana we Amunooni.

³⁸Abusalomu nukwo yairukire ati, yagenda Gesura, yamarayo emyaka esatu.

³⁹Daudi obuyagenzire naarugwaaho obujune obw'okufa kw'omutabani Amunooni, akagonza kugenda omw'omutabani Abusalomu.