Read Runyoro - rutooro 2 Sam 14 Bible Online

2 Sam 14 - Runyoro - rutooro bible

2 Sam 14

¹Yowabbu mutabani wa Zeruya, akamanya omutima gw'omukama Daudi nkooku gukaba guroho omutabani Abusalomu

²nukwo kutuma omukiikaro Tekoha, baihayo omukazi omunyamagezi. Omukazi obuyaizire, Yowabbu yamugambira ati: “Oyezookese nk'omuntu anyakwina obujune, ojwale ebyokujwara eby'abafeerwa; oteesiiga amagita, baitu weena ozooke nk'omukazi anyakumazire akasumi naalirirra abafu;

³ogende hali omukama, omugambire ebindaakugambira kugamba.” Nubwo Yowabbu yagambira omukazi ebigambo ebyaraagamba.

⁴Omukazi owa Tekoha obuyahikireho omukama, yajuumara haitaka, naamutamu ekitiinisa, yagamba ati: “Mwebingwa, onkonyere.”

⁵Omukama yamukaguza ati: “Kiki, oina bulemeezi ki?” Omukazi yagarukamu ati: “Agutamba, ondeke ndi nfaakati, iba nyowe akafa.

⁶Nyowe omuzaana wawe, nkaba nyina batabani bange babiri, bakakunganira omukisaka; nambere hakaba hatali muntu ow'okubaramura, omu hali bo yateera mugenzi we yamwita.

⁷Hati ab'oruganda boona banyimukiriire nyowe omuzaana wawe, nibagamba bati: ‘Leeta hanu mutabani wawe ayaisire mugenzi we, na itwe tumwite habw'owanyina ouyaisire; obubaraakora eki, buli n'omugwetwa, baamwita.’ Nukwo barukwenda kuummara amasiko bati, nokuleka iba nyowe ataine mwana w'obwojo, nukwo acwekererre kimu aleme kugira ekyasigaize omunsi.”

⁸Omukama yagarukamu omukazi ogu ati: “Garuka omuka yawe, ekikuleesire ninyija kukikumarra.”

⁹Omukazi yagamba omukama ati: “Agutamba, kyona ekyoraakora, omusango gube hali nyowe na hanju ya ise nyowe; omukama n'enju ye atahikwaho musango.”

¹⁰Omukama yagambira omukazi ati: “Obuharaabaho omuntu arukukutiinisiriza, omundeetere, ogu taligaruka kukutalibaniza.

¹¹Nkwesengeriize, osabe omukama ayesengereze MUKAMA Ruhanga wawe, omuhoozi w'enzigu ey'okuseesa esagama, aleke kwongera kwita, kandi na mutabani wange aleke kuhwerekerezibwa.” Omukama yagarukamu omukazi ati: “Ndahiire MUKAMA omwomeezi, mutabani wawe tarukwija kuhikwaho kabi n'akatito kati.”

¹²Omukazi yagamba ati: “Nkwesengeriize, nyikiriza nyowe omuzaana wawe, nkugambire ekigambo kimu kyonka.” Omukama yamugarukamu ati: “Kigambe.”

¹³Omukazi yakaguza ati: “Abantu ba Ruhanga habwaki obakozire ekintu ekibi nk'eki wayanga kwiha mutabani wawe nambere yazaahiire? Habweki, ebigambo byawe byonka ebiwakaruga kugamba, nibyo bikusingisize omusango.

¹⁴Itwena tuli b'okufa, tusisana nk'amaizi aganyakuseeseka haitaka, agatasobora kugaruka gakatahwaho; baitu omuntu anyakucwa amagezi kwiha omwana we omubusendwa, Ruhanga talimwihaho bwomeezi bwe.

¹⁵Kinu nikyo nyizire kugambira iwe mukama wange omukama, habwokuba abantu bantiinisize; nyowe omuzaana wawe nukwo kuteekereza nti: ‘Kinu ka nkigambire omukama; rundi iwe osobora kukorra nyowe omuzaana wawe ekindukusaba.

¹⁶Nteekeriize nti: Noija kumpuliriza, onjune omuntu ogu arukwenda kunyita hamu na mutabani wange, atwihe omunsi Ruhanga ei yahaire abantu be.’

¹⁷Nyowe omuzaana wawe nkateekereza nti: ‘Ekigambo iwe mukama wange ekyoraagamba, nikiija kumpuumuza; habwokuba iwe mukama wange omukama’, osisana malaika wa Ruhanga, anyakusobora kwetegereza ebibi n'ebirungi. MUKAMA Ruhanga wawe aikalege na iwe!”

¹⁸Nubwo omukama yagarukiremu omukazi ati: “Hati, ninyija kukukaguza ekikaguzo, kyona eki ndaakukaguza, ombalize amazima gonka”. Omukazi yagarukamu ati: “Agutamba, nkaguza kyona ekyorukwenda.

¹⁹Yowabbu nuwe yakugambiire ekintu kinu?” Omukazi yagarukamu ati: “Nkurahiire iwe mukama wange omukama, omuntu tasobora kugenda ha mukono ogw'obulyo rundi ogw'emoso, akaruga ha kintu iwe mukama wange omukama ekyogambire. Omuheereza wawe Yowabbu nuwe yandagiire; ebigambo binu byona, nuwe yabingambiire nyowe omuzaana wawe.

²⁰Omwiru wawe Yowabbu ekyamukoleze kiti, nukwo kuburanganiza ekintu kinu. Baitu iwe mukama wange, oina amagezi agarukusisana aga malaika wa Ruhanga, anyakumanya byona ebinyakubaho omunsi.”

²¹Nubwo omukama yagambiire Yowabbu ati: “Ekyosabire nkiikiriize; hati genda ogarre omusigazi Abusalomu.”

²²Yowabbu yajuumara hansi, naatamu omukama ekitiinisa, yamusabira omugisa; yagamba ati: “Mwebingwa, iwe mukama wange omukama, kiro kinu, namanya nkooku ongiriire embabazi, nukwo kunkorra ekinasabire.”

²³Nubwo Yowabbu yaimuka yagenda Gesura, yaleeta Abusalomu Yerusaalemu.

²⁴Omukama yagamba ati: “Abusalomu araale harubaju omunju ye; baitu ataija hanu nkamurora.” Abusalomu yaraara harubaju omunju ye, tiyaija omumaiso g'omukama.

²⁵Omukasumi ako, omu Isirairi yoona, hakaba hatarumu muntu noomu owakaba asemiire nk'Abusalomu; okuruga omu mara g'okuguru kwe okuhika ha kasoke eruguru, akaba ataina ekyarukugambwaho.

²⁶Obuyamwaga isoke rye (eri yamwaga buli mwaka niguhwaho, limazire kukura muno limuhinguraine), yalirengamuga obulemeezi oburukukira ha kiloguraamu emu n'ekicweka, noolengesa amabaale aganyakulenga ebintu by'omukama.

²⁷Abusalomu akazaara abaana aboojo basatu, n'omwisiki omu, ibara lye nuwe Tamara; akaba ali mukazi asemiire.

²⁸Abusalomu nukwo yamaliire kimu ati Yerusaalemu emyaka ebiri, atakaijaga omumaiso g'omukama.

²⁹Hanyuma nubwo yatumireho Yowabbu amutume hali omukama; baitu Yowabbu yalema kwija. Yamutumaho obwakabiri, nabwo tiyaija.

³⁰Nubwo yagambiire abaheereza be ati: “Omusiri ogunyakuherraine n'ogwange ogu, gwa Yowabbu, akabyaramu Sayiri; mugende mugucumike omurro.” Abaheereza ba Abusalomu baacumika omusiri.

³¹Nubwo Yowabbu yaimukire yataahirra Abusalomu omuka ye, yamukaguza ati: “Omusiri gwange, abaheereza bawe bagwokiize ki?”

³²Abusalomu yamugarukamu ati: “Nkakutumaho ninkweta nti: ‘Oije nkutume hali omukama, omukaguze oti: Gesura nkaihwayo ki? Haakire kakuba naikaireyo.’ Leero nu hati, ka ngende omumaiso g'omukama; obundiba nacwire omusango, anyite.”

³³Nubwo Yowabbu yagenzire mw'omukama, yamugambira omutabani Abusalomu ebi yagambire. Nubwo omukama yatumire beete Abusalomu. Abusalomu yagenda mw'omukama, yajuumara haitaka omumaiso ge; omukama yamwimukya, yamugwa omukifuba.