Read Runyoro - rutooro 2 Sam 15 Bible Online

2 Sam 15 - Runyoro - rutooro bible

2 Sam 15

¹Ebi obubyahoire, Abusalomu yayetungira ekigaali, embaraasi, n'abasaija amakumi ataano ab'okumwebemberaga.

²Abusalomu yaimukaga kara, ayemerra haihi n'omuhanda ogurukutwara hairembo; obu haabahoga omuntu anyakwina ekigambo ekirukumuleeta hali omukama akimucweremu; Abusalomu yamwetaga amukaguza ati: “Weewe, nooruga omurubuga ki?” Omuntu obuyagarukamuga ati: “Nyowe omwiru wawe ndi w'oruganda orwa nanka omu Isirairi”,

³Abusalomu yamugambiraga ati: “Ebigambo byawe bihikire kandi by'obulyo; baitu busaho muntu ayakomerwe omukama ow'okuhurra ebigambo byawe.”

⁴Ayongera agamba na kinu ati: “Haa, kakuba ninyowe mbaire ndi mucwi w'emisango ow'omunsi enu! Obu, buli muntu anyakwina empaka na mutaahi we, rundi anyakwina omusango, yaakumpikirehoga, mmucwera omu bwinganiza.”

⁵Obu haijaga omuntu kumwinamira naamutamu ekitiinisa, Abusalomu yagorraga omukono gwe, akwata omuntu ogu, amugwa omukifuba.

⁶Abaisirairi boona, abaijaga hali omukama kubaramura, Abusalomu nukwo yabakoraga ati; nukwo yabatwaliriize ati, eki kyabaleetera kumwesiga.

⁷Obuhaahoireho emyaka ena, Abusalomu yagambira omukama ati: “Ninkusaba onyikirize ngende mpikirize ekiragaano kyange ekinaraganiize MUKAMA ndi Hebburoni.

⁸Habwokuba nyowe omwiru wawe obunkaba ndi Gesura, nkakora ekiragaano ningamba nti: Mazima kwo, MUKAMA obwalingarra Yerusaalemu, ndimuramya.”

⁹Omukama yamugarukamu ati: “Orame, ogende n'obusinge.” Nubwo Abusalomu yakwata omuhanda yagenda Hebburoni.

¹⁰Baitu akatweka abakwenda abatamanyirwe omu nganda zoona eza Isirairi naagamba ati: “Obumuraarumisa kuhurra engwara neegamba, inywena mutokere hamu muti: Abusalomu nuwe Mukama wa Hebburoni!”

¹¹Abusalomu akaruga Yerusaalemu hamu n'abasaija abaraalizibwa bikumi bibiri, bakagenda bugenda bataina ekibamanyire.

¹²Abusalomu obwakaba nakyatamba ebyonzira; akatuma abantu beete Ahisofeeri Omugiro, omuhabuzi wa Daudi, bamwihe omurubuga rwe Giro. Baayeyongera kucika, abantu aba harubaju rwa Abusalomu bakagenda nibakanya.

¹³Omukwenda akahikaho Daudi yamugambira ati: “Abaisirairi, emitima yabu bagimalizeeho Abusalomu.”

¹⁴Nubwo Daudi yagambira abaheereza be boona abakaba bali hamu na uwe Yerusaalemu ati: “Mwimuke bwango twiruke; obu tutairuke, Abusalomu titurukwija kumukira; murahuke, atasangwa yatuhikaho akatuleetera akabi, ab'omurubuga akabaisa empirima.”

¹⁵Abaheereza b'omukama baamugarukamu bati: “Itwe abaheereza bawe, tweteekaniize okukora kyona iwe mukama waitu omukama ekyorukugamba.”

¹⁶Nubwo omukama yaimukya, hamu neeka ye yoona, yasiga abakazi abandi ikumi balinde enju.

¹⁷Omukama yaimukya hamu n'abantu be boona; baayemerra hanju ey'ekaba neemalirrayo.

¹⁸Abaheereza be boona, Abanyakeresi boona, Abanyaperezi boona, n'Abanyagaasi rukaaga, boona abaarugire Gaasi baamuhondera, baamurabaho.

¹⁹Hanyuma omukama yakaguza Itaayi Omugiti ati: “Kandi iwe otukuraatiriire ki? Garukayo oikale n'omukama omuhyaka; habwokuba oli munyaihanga, kandi okazaahisibwa waruga omwihanga ly'owanyu.

²⁰Okaija ijo, hati ntandike kukwenjeeza hamu na itwe, ntamanyire nambere ndukugenda? Garukayo otwale na bagenzi baawe; MUKAMA akugirre embabazi kandi akukorre ebirungi.”

²¹Baitu Itaayi yagarukamu omukama ati: “Ndahiire MUKAMA omwomeezi; kandi ninkurahira iwe mukama wange omukama, hoona hoona mukama wange omukama nambere oliba, noobu haakubaho orufu rundi obwomeezi, na nyowe omwiru wawe oku nuho ndiba.”

²²Daudi yagarukamu Itaayi ati: “Obukiraaba kiri kiti, rugayo, hingura ogende.” Itaayi Omugiti nukwo kurabaho n'abasaija be, n'abantu Yowabbu boona.

²³Abantu boona obubakaba nibahingura, omukama naayambuka ekisaaru Kidironi, boona nibarabaho nibeebinga irungu, ensi yoona yatamu ekyoboobo.

²⁴Haija Abyasara na Zadooki, n'Abaleevi boona abakaba beetwekere Esanduuko ey'Endagaano ya Ruhanga; baatuura Ensanduuko, baikaraho okuhika abantu boona obubakahoire omurubuga.

²⁵Nubwo omukama yagambiire Zadooki ati: “Muhimbe Esanduuko ya Ruhanga mugigarre omurubuga. MUKAMA obwalingirra embabazi alingarra, aginyoleke n'ekiikaro eki eriba erumu;

²⁶baitu obwalyanga kungirra embabazi; nyowe ndi hanu, ankorre ekyarukusiima.”

²⁷Omukama yagaruka yagambira Zadooki nyakatagara ati: “Ogende n'obusinge, ogaruke omurubuga, ogende hamu na Abyasara, na batabani banyu ababiri, Ahimaazi mutabani wawe, na Yonasaani mutabani wa Abyasara.

²⁸Ninyija kwikara mbategeriize ha nyambukiro y'irungu, okuhika obumurakantumaho kummanyisa.”

²⁹Zadooki na Abyasara, nukwo kwetweka Esanduuko ya Ruhanga baagigarra Yerusaalemu; nabo nuho baikara.

³⁰Daudi akatemba orusozi orw'emiti Oliva, kunu narra, atajwaire enkaito, ayeswekeriire omutwe; n'abantu boona abaakaba ainabo, baayeswekerra emitwe, baagenda nibarra.

³¹Daudi obubaamugambiire ngu: Ahisofeeri nuwe omu ha bantu abaayekobere na Abusalomu, yayesengereza MUKAMA naagamba ati: “Ai MUKAMA, nkwesengeriize, amagezi ga Ahisofeeri ogafoole budoma.”

³²Daudi obuyahikire ha katwetwe k'orusozi, Ruhanga nambere yaramizibwaga, Husayi Omwaraki yaija kumwitirana, ajwaire orugoye orutemukire, itaka limuli omumutwe,

³³Daudi yamugambira ati: “Obu oraayongera kugenda na nyowe, noija kundemeera.

³⁴Baitu kakuba ogaruka omurubuga okagambira Abusalomu oti: ‘Mwebingwa, ninyija kuba mwiru wawe nkooku ira nabaga mwiru wa Sso, hati, kambe mwiru wawe’; obu nubwo olinsingurra amagezi ga Ahisofeeri.

³⁵Zadooki na Abyasara, tibaliyo nubo banyakatagara abooinabo oku? Habweki, kyona ekyorakahurraga ekirukuruga omunju y'omukama, okigambirege Zadooki na Abyasara banyakatagara abo.

³⁶Batabani baabo ababiri: Ahimaazi mutabani wa Zadooki, na Yonasaani mutabani wa Abyasara baikara nabo oku; abo nubo otumege, bangambire byona ebyoraabaga ohuliire.”

³⁷Abusalomu obwakaba naakyataaha Yerusaalemu ati, Husayi munywani wa Daudi na uwe naataaha omurubuga.