Read Runyoro - rutooro 2 Sam 16 Bible Online

2 Sam 16 - Runyoro - rutooro bible

2 Sam 16

¹Daudi obwakaba ahingwireho kake akatwetwe k'orusozi, yaitirana Ziba omuheereza wa Mefibboseesi, aina endogoyi ibiri zitekaniziibwe, zeetwekere emigaati bikumi bibiri, emigimba kikumi ey'ebijuma by'emizabbibbu, emigimba kikumi ey'ebijuma eby'omu kyanda, n'endyanga ey'amaarwa.

²Nubwo omukama yakaguza Ziba ati: “Binu obireetiire ki?” Ziba yagarukamu ati: “Endogoyi z'okutembwa abantu ab'enju y'omukama, emigaati n'ebijuma by'okulibwa abantu be, amaarwa g'abo abarukwitwa ensazi omwirungu.”

³Omukama yakaguza ati: “Kandi mutabani wa mukama wawe araha?” Ziba yagarukamu omukama ati: “Ali Yerusaalemu, habwokuba naagumiza kimu, Abaisirairi nkooku barukwija kumugarra ha bukama bwa Saulo isenkuru.”

⁴Nubwo omukama yagambiire Ziba ati: “Byona ebikaba biri bya Mefibboseesi, hati byawe.” Ziba yagamba ati: “Iwe mukama wange omukama, ninkutamu ekitiinisa. Akasumi koona ongirrege embabazi.”

⁵Daudi obuyahikire Bahulimu, hakaija omusaija ow'oruganda rw'enju ya Saulo, ibara lye nuwe Simeyi mutabani wa Gera; obwakaba naija, yakondereza Daudi obutalekerra.

⁶Yamuhungurra amabaale, yagahungurra abaheereza be, abantu boona, n'abasaija boona ab'amaani abakaba bamuli ha mukono ogw'obulyo n'ogw'emoso.

⁷Simeyi obuyabaga nakondereza yagambaga ati: “Rugaho aho, rugaho aho, iwe omwisi, iwe ataina mugaso.

⁸MUKAMA akuhoire enzigu ey'esagama yoona ey'enju ya Saulo, ou waihireho obukama bwe, obukama obu, hati MUKAMA abuhaire mutabani wawe Abusalomu. Leero nu, okuhwerekerra kukuhikireho; habwokuba oli museesi w'esagama.”

⁹Nubwo Abisayi mutabani wa Zeruya yakaguza omukama ati: “Osobora ota kwikiriza embwa enu eyafiire ira kukondereza iwe mukama wange omukama? Nyikiriza ngende mmucweho omutwe.”

¹⁰Baitu omukama yagamba ati: “Nyowe na inywe batabani ba Zeruya, twina bukwatane ki? Obwaraaba nankondereza, habwokuba MUKAMA amuragiire ati: ‘Kondereza Daudi’, kandi n'oha araamukaguza ngu: ‘Kiki ekirukukukoza kiti?’ ”

¹¹Daudi yagambira Abisayi n'abaheereza be boona ati: “Mutabani wange wonyini obwaraaba naayenda kunyita; kandi leero ow'oruganda rwa Bbenyamiini araasura ki mumuleke akondereze; habwokuba MUKAMA nuwe amuragiire.

¹²Rundi MUKAMA alirora okusaalizibwa kwange kunu, angarurre ebirungi habw'okukonderezibwa kunu okw'ekiro kya hati.”

¹³Daudi n'abasaija be baakwata omuhanda baagenda, Simeyi yabahondera ali harubaju rw'orusozi omumaiso ga Daudi, naamukondereza, naamuhungurra amabaale, naamumiisira ecuucu.

¹⁴Omukama n'abantu be boona abaakaba ainabo, bakahika Yorudaani bajwahire, aho nuho omukama yaruhuukiire.

¹⁵Omukasumi ako, Abusalomu n'abantu ba Isirairi boona baahika Yerusaalemu, na Ahisofeeri abarumu.

¹⁶Husayi Omunyaruki munywani wa Daudi obuyahikireho Abusalomu, yamuramya ati: “Hangiriza Agutamba! Hangiriza Agutumba!”

¹⁷Abusalomu yakaguza Husayi ati: “Obu nubwo obwesige obwonyina hali munywani wawe Daudi? Kiki ekikutangire kugenda na uwe?”

¹⁸Husayi yagarukamu Abusalomu ati: “Nangwa; habwokuba ogu, mukama, n'abantu Abaisirairi boona ou bakomere, nuwe ndiba nawe, kandi nuwe ndiikara na uwe.

¹⁹Kandi ekindi, nsemeriire kuheereza oha? Tinsemeriire kuheereza mutabani we? Nkooku naheeriize Sso, na iwe nukwo ndukwija kukuhereza.”

²⁰Nubwo Abusalomu yagambiire Ahisofeeri ati: “Hati banza otuhabule, tukole ki?”

²¹Ahisofeeri yagarukamu Abusalomu ati: “Genda otembe ekitabu kya bakaaso, abayasigire kulinda enju; Abaisirairi boona nubwo baraamanya nkooku oyenobeseze Sso, abo boona abanyakuli harubaju rwawe nibaija kweyongera amaani.”

²²Nubwo baateeriire Abusalomu eheema harusu, Abusalomu yabyama n'abaranga baise, Abaisirairi boona bali aho.

²³Omukasumi ako, ekigambo Ahisofeeri ekiyagambaga, kyaikirizibwa nk'ekinyakugambirwe Ruhanga; habweki kyona Ahisofeeri ekiyagambaga, Daudi n'Abusalomu, boombi nikyo baahonderaga.