Read Runyoro - rutooro 2 Sam 17 Bible Online

2 Sam 17 - Runyoro - rutooro bible

2 Sam 17

¹Ahisofeeri yayongera yagambira Abusalomu ati: “Leka nkome abasaija omutwaro gumu n'enkumi ibiri, nkuraatire Daudi kiro kinu,

²ninyija kumuhikaho amazire kujwaha atakyaina maani, mmukange; abantu boona abaainabo, nibaija kwiruka, omukama wenka nuwe ndukwija kwita.

³Abantu be boona ninyija kubakugarurra, omugole nkooku ataaha omuka ya iba. Ekirukwetaagwa, nukwo kwita omuntu omu wenka, abantu abandi nukwo baikale n'obusinge.”

⁴Abusalomu n'abakuru boona aba Isirairi baasima ekiteekerezo eki.

⁵Abusalomu nubwo yagambire ati: “Mwete na Husayi Omwaraki, tuhurre na uwe ekyaraagamba.”

⁶Husayi obuyahikireho Abusalomu, Abusalomu yamugambira ati: “Ahisofeeri nukwo agambire ati; tukole nkooku agambire? Obu turaaba tutali b'okukora kwo, na iwe tugambire ekituraakora.”

⁷Nubwo Husayi yagambira Abusalomu ati: “Leero amagezi Ahisofeeri agaakuhaire, tigali marungi.”

⁸Husayi yayongera yagamba ati: “Omanyire Sso n'abasaija be nkooku bali bantu b'amaani, kandi nkooku baina ekiniga nk'ebuguma y'edubu ey'omwirungu enyakunyagirweho obwana bwayo, kandi ekindi, Sso ebyobulemu abimanyire kurungi muno; ekiro taikara na basaija be.

⁹Nobwakubaire hati bunu bunu, ayeserekere omubwingira rundi omukiikaro ekindi, obuharaabaho abantu abamu abaraafa hakuseesa okw'okubanza, weena ow'araakakihurra naija kugamba ati: ‘Abantu baingi abanyakuhondiire Abusalomu bafiire.’

¹⁰Obu, noobwakubaire omusaija emanzi, anyakwina omutima nk'ogw'entale, naija kutukumira; habwokuba Abaisirairi boona bamanyire Sso nkooku ali musaija w'amaani, kandi n'abo abaainabo nkooku bali basaija manzi.

¹¹Nyowe hati amagezi agandukukucwera, Abaisirairi boona abaingi nk'omusenyi ogwa hanyanja, aba Daani na Beeriseba obeesorooleze nambere oli, na iwe nukwo oramage nabo.

¹²Nukwo tutahiirre Daudi nambere turakamusanga, tumugwere nkooku orume rugwa haitaka, uwe n'abantu be boona aba aliba aine, tihalisigaraho noomu.

¹³Obwaligaruka omurubuga, Abaisirairi boona balireeta emiguha omurubuga oru rwona turusike turunage okuhika oburulihweraho kimu hatasigaireho na kabaale.”

¹⁴Abusalomu n'Abaisirairi boona baagamba bati: “Amagezi ga Husayi Omwaroki, marungi okukira aga Ahisofeeri.” Habwokuba MUKAMA akamalirra kudibya amagezi aga Ahisofeeri, nukwo aleetere Abusalomu akabi.

¹⁵Nubwo Husayi yagambiire Zadooki na Abyasara banyakatagara ati: “Abusalomu n'abakuru ba Isirairi, Ahisofeeri nukwo yabahabwire ati; kandi nyowe nabahabura nti:

¹⁶Habweki hati, tuma bwango abantu bagambire Daudi ngu kiro kinu ataraara ha mambukiro g'irungu, acwe amagezi ge goona ayambuke, omukama hamu n'abantu be boona abaaine, bataikara kumirwa amaizi.”

¹⁷Omukasumi ako, Yonasaani na Ahimaazi baikaraga bategeriize omukiikaro Enirogeri, hakaba haroho omuzaana ayagendaga naabagambira ebyabahoga, kandi baagendaga babigambira omukama Daudi; habwokuba bakaba nibatiina kweyoleka nibataaha orubuga.

¹⁸Baitu kiro kimu, hakabaho omusigazi ayababoine, yagenda yagambira Abusalomu; aho boombi batabandaale, bakagenda bwango, baahika hanju y'omusaija owa Bahulimu ow'akaba alimire iziba omuzigati ye; baaragara omwiziba eri.

¹⁹Omukazi muka Bahulimu, yakwata ekifundikizo yafundikira omunwa gw'iziba; yamiisamiisaho engano; omunwa gw'iziba tigwamanyirirwa.

²⁰Abaheereza ba Abusalomu obubaahikireho omukazi omuka, baamukaguza bati: “Ahimaazi na Yonasaani baraha?” Omukazi yabagarukamu ati: “Baambukire akasaaru ako.” Obubaaserwire tibaabazoora, baagaruka Yerusaalemu.

²¹Abaheereza ba Abusalomu obubaamazire kugenda, abasaija baaruga omwiziba, baagenda baagambira omukama Daudi bati: “Mutabandaara mwimuke mwambuke bwango; ganu nugo magezi Ahisofeeri agaacwire kubarwanisa.”

²²Nubwo Daudi yaimukire n'abantu boona abaakaba ainabo, baayambuka Yorudaani; emamba kwija kusara, boona bakaba bamazire kwambuka.

²³Ahisofeeri obuyarozire amagezi ge nkooku gatakuraatirwe, yateekaniza endogoyi ye, yataaha omuka omurubuga rwe. Obuyamazire kutereekereza eby'omuka ye, yayehanika, yafa yaziikwa omukituuro kya ise.

²⁴Hanyuma Daudi yahika Mahanaimu. Abusalomu yayambuka Yorudaani n'Abaisirairi boona.

²⁵Abusalomu omukasumi ako, Amasa akaba afoire kuba ngabwa y'ihe omukiikaro kya Yowabbu. Amasa ogu akaba ali mutabani w'omusaija ibara lye Isira Omwisimairi, ow'akaba aswire Abigairi muhara wa Nahasi, munyanya Zeruya, nyina Yowabbu,

²⁶Abaisirairi na Abusalomu bateera orukande omunsi Giryadi.

²⁷Daudi obuyahikire Mahanaimu, Sobi mutabani wa Nahasi owa Raba orubuga rw'Abamooni, na Makiri mutabani wa Amyeri owa Lodeba, na Bbazilayi Omugiryadi owa Rogerimu,

²⁸baaleeta ebitabu, ebbeseni, ebinaga, engano, sayiri, ensaano, engano enyakukarangire, ebihimba n'enkoole,

²⁹obwoki, entaama, n'amagita g'ente, ebi byona baabireetera Daudi n'abantu be babirye; habwokuba bakatekereza bati: “Abantu abo omwirungu, barumiirweyo enjara, bajwahiireyo, kandi bagweriireyo ensazi.”