Read Runyoro - rutooro 2 Sam 18 Bible Online

2 Sam 18 - Runyoro - rutooro bible

2 Sam 18

¹Nubwo Daudi, yasoroize abasaija abaakaba ainabo, yakomamu abakuru b'amahe ab'okulema abantu enkumi, n'ab'okulema ebikumi.

²Nubwo yatweka ihe, kimu kya kasatu kyebembiirwe Yowabbu, kimu kya kasatu ekindi kyebembiirwe Abisayi mutabani wa Zeruya owanyina Yowabbu, kandi kimu kya kasatu ekindi kyebembiirwe Itaayi Omugiti. Omukama akagambira abantu be ati: “Na nyowe ninyija kuramaga na inywe.”

³Baitu abantu baamugarukamu bati: “Iwe otaramaga, habwokuba itwe obuturairuka, busaho araatuteekerezaaho. Kakuba hali itwe hafaaho ekicweka, busaho” n'omu araatuganya. Baitu iwe, oli w'omuhendo okwingana abantu omutwaro hali itwe; habweki, ekirukukira oburungi, iwe nukwo kututwekera ebintu nooyema omurubuga.

⁴Omukama yabagarukamu ati: “Kyona eki murukurora ekirukukira oburungi, nikyo ndaakora.” Ihe obulikaba niriramaga libaganiziibwemu abantu ebikumi n'enkumi, uwe akeemerra haihi n'irembo.

⁵Akaragira Yowabbu, Abisayi na Itaayi ati: “Mbeesengeriize omusigazi Abusalomu mutamukoraho akabi.” Omukama obwakaba naaragira engabwa zoona ebirukukwataho Abusalomu, abantu boona eki bakakihurra.

⁶Kandi ihe lyaramaga omubwerre okurwanisa Abaisirairi; obulemu bukarwanirwa omukibira ekya Efuraimu.

⁷Abaheereza ba Daudi baasingura Abaisirairi, kiro eki Abaisirairi bakafa baingi muno, emitwaro ebiri.

⁸Obulemu bukamara ensi yoona; kiro eki, abantu abaagwire omukibira, bakaba baingi okukira abaisirwe empirima.

⁹Abusalomu akaitirana abaheereza ba Daudi, akaba atembere enyumbu ye, enyumbu ye yaraba hansi y'amataagi amakooto ag'omuti omuhomozi, omutwe gwe gwakwatirwa omumataagi ago, yasigara naalengiizira omumwanya, enyumbu ei akaba atembere yayeyongera omumaiso.

¹⁰Hakabaho omuntu omu ayarozire ekintu eki yagenda yakigambira Yowabbu ati: “Mboine Abusalomu naalengiizira omumataagi g'omuti omuhomozi.”

¹¹Yowabbu yakaguza omusaija oli kimugambira ati: “Ogizire ota? Oboine kwo Abusalomu! Obuwamubona, kiki ekikutangire kumwitira aho nambere omuboine? Naakukuhaire ebicweka by'efeeza ikumi, nkuteeraho n'orukoba.”

¹²Baitu omusaija akagarukamu Yowabbu ati: “Noobwokumpa ebicweka by'efeeza rukumi, tinaakukwasireho mutabani w'omukama; habwokuba omukama akabaragira: iwe, Abisayi na Itaayi, itwena nitwehulirra ati: Omusigazi Abusalomu mutalimukoraho akabi.

¹³Ekindi, kakuba nkaba nkozire akabi ha bwomeezi bwe, (kandi eki omukama akakimanya) iwe waakukyehugwire.”

¹⁴Yowabbu yagamba ati: “Tindukwija kwongera kusiisa akasumi ngu nimbaza na iwe.” Yakwata emisogi esatu yagirasa Abusalomu omumutima, akyali mwomeezi naalengiizira hamuti omuhomozi.

¹⁵Abasaija abasigazi ikumi, abaayetwekaga ebyokurwanisa bya Yowabbu bairra haihi Abusalomu, baamuteera, baamwita.

¹⁶Nubwo Yowabbu yatiire engwara, amahe gaagaruka, nigaruga kwirukya Abaisirairi; habwokuba akagatanga.

¹⁷Baatwara omutumbi gwa Abusalomu, baaguhungura omukiina ekihamire ekikaba kiri omukibira, baatuumaho entuumo y'amabaale maingi; Abaisirairi boona baayegendera; buli muntu yakwata ogw'owaabo.

¹⁸Abusalomu ogu obwakaba akyali mwomeezi, akaba ayebyaliire enyomyo omukihanga ky'omukama, habwokuba akateekereza ati: “Tingira mwana w'obwojo ou ndaijukirwahoga.” Enyomyo egi nukwo kugiruka ibara lye, nookuhika hati, eyetwa ekiijukyo kya Abusalomu.

¹⁹Hanyuma Ahimaazi mutabani wa Zadooki akagamba ati: “Kanyiruke ngende mmanyise omukama, MUKAMA nkooku amutabwire abanyanzigwa be.”

²⁰Yowabbu yamuganbira ati: “Kiro kinu otatwara amakuru; oligatwara kiro kindi, hatali hati, habwokuba omwana w'omukama nuwe afiire.”

²¹Nubwo Yowabbu yaragira Omukuusi ati: “Genda ogambire omukama ebi oboine”, Omukuusi yainamira Yowabbu, yagenda.

²²Nubwo Ahimaazi mutabani wa Zadooki yagarukire yagamba Yowabbu ati: “Na nyowe ka nkurate Omukuusi oli, ekiraaba kiriyo kiije.” Yowabbu yagarukamu ati: “Mwana wange ekirukukutwara kiki, kunu torukwija kutunga empeera habw'amakuru agoraatwara?”

²³Ahimaazi yagarukamu ati: “Ningenda, ekiraaba kiriyo kiije.” Yowabbu yamugarukamu ati: “Irooko ogende.” Nubwo Ahimaazi yaraba omuhanda ogw'ekyeeya, yayebeembera Omukuusi.

²⁴Omukasumi ako, Daudi akaba aikaliire hagati y'amalembo abiri; omulinzi yatemba harusu rw'irembo erikaba liri haihi n'ekisiika, obuyaimukize amaiso yaleeba omusaija nairuka, ali wenka.

²⁵Nubwo omulinzi yayesire omukama yamugambira. Omukama yagarukamu ati: “Obwaraaba ali wenka, aina amakuru agaaleesire” omusaija yairuka bwango yairra haihi.

²⁶Omulinzi yarora omusaija ondi, na uwe nairuka; yayeta omulinzi w'irembo yamugambira ati: “Orole, omusaija ondi nguli, nairuka ali wenka!” Omukama yagarukamu ati: “Na uwe aleesire amakuru.”

²⁷Omulinzi yagamba ati: “Emiirukire ey'omuntu ow'okubanza, neesisana nkeeya Ahimaazi mutabani wa Zadooki.” Omukama yagamba ati: “Ogu, muntu murungi, kandi aleesire amakuru amarungi.”

²⁸Nubwo Ahimaazi yaramya omukama ati: “Hangiriza Agutamba”, yajuumara omumaiso ge naagamba ati: “Haisaniza MUKAMA Ruhanga wawe, anyakukusinguliire abasaija abaakwemiire.”

²⁹Omukama yakaguza ati: “Omusigazi Abusalomu aliyo kurungi?” Ahimaazi yagarukamu ati: “Yowabbu obuyantumire nyowe omwiru wawe, nkarora abantu nibateera akoogo, baitu ntamanye ekibaireho.”

³⁰Omukama yagamba ati: “Garuka harubaju aho oyemerrege.” Ahimaazi yagaruka harubaju yayemerra.

³¹Omukasumi ako, Omukuusi yahika; yagambira omukama ati: “Waitu mukama wange omukama, nkuleetiire amakuru amarungi! Habwokuba kiro kinu, MUKAMA akujunire boona abaakwemiire.”

³²Omukama yakaguza Omukuusi ati: “Omusigazi Abusalomu aliyo kurungi?” Omukuusi yagarukamu ati: “Abanyanzigwa ba mukama wange iwe omukama, na boona abanyakukwimukirra kukukora kubi, babe nk'omusigazi ogu.”

³³Nubwo omukama yasaalirwa muno, yagenda omukisiika ekya hairembo, yatandika kurra, naatongyatongya ati: “Ai mwiru wange Abusalomu, mwiru wange, mwiru wange Abusalomu! Kakuba ninyowe nafiire nkakusiga, Ai Abusalomu mwana wange, mwana wange!”