Read Runyoro - rutooro 2 Sam 19 Bible Online

2 Sam 19 - Runyoro - rutooro bible

2 Sam 19

¹Yowabbu bakamugambira ngu: “Omukama Daudi naalirirra kandi naasaalirirwa Abusalomu.”

²Habweki kiro eki, amahe ga Daudi goona, omukiikaro ky'okusemererwa habw'okusingura, gakaba omubujune, habwokuba abantu nubwo baahuliire ngu: “Omukama naalirirra omutabani.”

³Kiro eki, abantu bakeyiiba baataaha omurubuga, nk'abaserikale, abakwasirwe ensoni habw'okwiruka ha bulemu nkooku beyiba.

⁴Omukama akeeswekerra amaiso, yatamu omukungo, naatongyatongya ati: “Ai, mwiru wange Abusalomu, Ai Abusalomu mwiru wange, mwiru wange!”

⁵Nubwo Yowabbu yataahire omunju y'Omukama yamugambira ati: “Kiro kinu, abairu bawe abanyakukujunire, abanyakujunire batabani bawe na bahara bawe, abanyakujunire bakazi bawe n'abazaana bawe, boona obakwasize ensoni,

⁶habwokuba noogonza abakunoba, kandi abanyakukugonza nubo onoba. Kiro kinu, bakuru b'amahe gawe n'abaheereza, bawe oyolekere nkooku otabaroho; habwokuba hati nayetegereza, kakuba Abusalomu abaire akyali mwomeezi, abandi itwena niitwe tufiire, waakusemeriirwe muno.

⁷Habweki, hati imuka ogende obalize abaheereza bawe akagambo ak'embabazi, ndahiire MUKAMA, obwotaagendeyo, kiro kinu busaho noomu araasigara na iwe; eki nikiija kukusaaliza muno okukira byona ebyakusaaliize, okuruga omu buto bwawe okuhika na hati.”

⁸Omukama nukwo kwimuka, yasinga hairembo; abantu boona baagambirwa ngu: “omukama asingire”, baija omumaiso ge. Abaisirairi boona bakaba bagenzire, buli muntu atomere ogw'owabo.

⁹Abantu ab'enganda za Isirairi boona, bakaba nibakungana nibagamba bati: “Omukama Daudi nuwe yatujunire abanyanzigwa baitu, nuwe yatujunire Abafirisiti; kandi nuwe hati, airukire omunsi ye nukwo ayejune Abusalomu.

¹⁰Baitu Abusalomu ou twaseesireho amagita abe mukama waitu, akagwa omu bulemu. Kandi hati, tusobora tuta kuculeera, tukalema kubaza ha kigambo eky'okugarra omukama Daudi?”

¹¹Omukama Daudi yatumaho Zadooki na Abyasara banyakatagara naagamba ati: “Mukaguze abakuru ab'oruganda rwa Yuda muti: ‘Musobora muta kuba bantu ab'okumalirra hakigambo kyokugarra omukama omunju ye, kandi kunu byona Abaisirairi ebibarukugamba amazire kubimanya?

¹²Inywe muli b'oruganda rwange, muli b'enda yange kandi muli b'esagama yange; musobora muta kuba b'okumalirra omu kungarra?’

¹³Kandi mukaguze Amasa muti: ‘Iwe toli w'enda yange kandi toli w'esagama yange? Okuruga hati nookweyongera omumaiso, ndahire Ruhanga omwomeezi, niiwe ndafora mukuru wihe lyange omukiikaro kya Yowabbu. Ndahiire Ruhanga omwomeezi.’ ”

¹⁴Daudi ebiyagambire, ab'oruganda rwa Yuda boona baabiikiriza, nukwo kumutumaho, nibamuragira ngu agaruke hamu n'abanyoro be.

¹⁵Omukama obwakaba naagaruka, Yuda akagenda kumwitirana Girigaali, n'okumusendekereza kumuhikya hakyambu Yorudaani.

¹⁶Simeyi mutabani wa Gera, ow'oruganda rwa Bbenyamiini ayarugire Bahulimu, atabandaale, yagenda hamu n'abasaija ab'oruganda rwa Yuda kwitirana omukama Daudi;

¹⁷akaba aina abasaija rukumi ab'oruganda rwa Bbenyamiini. Ziba omuheereza ow'omunju ya Saulo, hamu n'abatabani ikumi na bataano, n'abaheereza makumi abiri, na uwe yagenda bwango Yorudaani omumaiso g'omukama,

¹⁸baayambuka omwogo kwambura abantu b'omukama n'okukora ekyarukusiima. Omukama obwakaba ali haihi kwambuka Yorudaani, Simeyi mutabani wa Gera yajuumara omumaiso ge

¹⁹yamugambira ati: “Mukama wange otanjunaana kandi ekibi nyowe omwiru wawe ekinakozire, ha kiro ekiwarugiireho Yerusaalemu; oleke kukiijuka.

²⁰Nyowe omwiru wawe, mmanyire nkooku nasiisire; kiro kinu, nikyo nyiziire ndi w'okubanza ha bantu boona ab'enju ya Yosefu, nyije nkutangaane iwe MUKAMA wange omukama.”

²¹Abisayi mutabani wa Zeruya yakaguza ati: “Simeyi tasemeriire kwitwa habwokuba akakondereza omuseeswaho amagita wa MUKAMA?”

²²Baitu Daudi yakaguza ati: “Inywe batabani ba Zeruya, abanfookiire banyanzigwa, kiro kya hati mbakole ki? Kiro kya hati tihabeho omuntu araitwa omu Isirairi, habwokuba ninyowe mukama wa Isirairi.”

²³Nubwo yagambira Simeyi ati: “Nkurahiire, torukwija kufa.” Yamurahira.

²⁴Mefibboseesi mutabani wa Saulo na uwe yaija kutangaana omukama; okurugirra ha kiro omukama ekiyarugiireho Yerusaalemu okuhika ha kiro ekiyagarukiireho n'obusinge, Mefibboseesi akaba atakanaabaga bigere, atakamwaga muleju, atakoogyaga byokujwara bye, kandi

²⁵obuyarugire Yerusaalemu kwija kutangaana omukama, omukama akamukaguza ati: “Mefibboseesi, kiki ekyakutangire kugenda na nyowe?”

²⁶Mefibboseesi yagarukamu ati: “Mukama wange omukama, omwiru wange akambiihabiiha; nkamugambira nti: ‘Ntaandiikira enkaina ngitembe ngende n'omukama, nkooku orukummanya’, mba mulema.

²⁷Omwiru ogu akakumbazaaho ebyebisuba iwe mukama wange. Baitu iwe mukama wange omukama, osisana malaika wa Ruhanga; habweki, kora ekyorukurora kihikire.

²⁸Abantu boona ab'enju ya isenyowe, okaba osemeriire kubaita, baitu nyowe omwiru wawe, okanta omuli abo abanyakulya hameeza yawe. Kandi ekindi kiki ekindukwongera kukusaba?”

²⁹Omukama yamugarukamu ati: “Kiki ekirukugaruka kukugambisa ha bigambo byawe ebi? Nkamara kucwamu nti: Iwe na Ziba, mubagane ebintu bya Saulo”.

³⁰Mefibboseesi yagamba ati: “Ziba, leka nuwe atwale ebintu byona nyowe kurora iwe mukama wange omukama ogarukire omuka n'obusinge eki nikimara.”

³¹Omukasumi ako, Bazilayi Omugiryadi, akaba arugire Rogerimu kusendekereza omukama amwambule Yorudaani.

³²Bazilayi ogu, akaba ali mukuru muno, ahikize emyaka kinaana, kandi omukama obwakaba akyali Mahanaimu, nuwe yamuhaga ebyokulya; habwokuba akaba ali muntu atungire muno.

³³Omukama akagambira Bazilayi ati: “Tugende hamu Yerusaalemu ndikurolerra.”

³⁴Baitu Bazilayi yakaguza omukama ati: “Kusiiba naagenzire n'omukama Yerusaalemu, nkyasigaize emyaka ingaha ey'okwomeera?

³⁵Kiro kinu, nahikya emyaka kinaana; nsobora kwetegereza ekirungi n'ekibi? Nyowe omwiru wawe, ninsobora kwahurana ekirukunura n'ekitarukunura? Ninkyasobora kuhuliriza iraka ly'abasaija n'abakazi abarukuzina? Habwaki, kukwongera obulemeezi, iwe mukama wange Omukama?

³⁶Ka nkwirizeeyo kake, nkwambule Yorudaani. Tinsemeriire iwe kumpa ekisimbo nkeeki.

³⁷Nkwesengeriize, nyikiriza ngaruke omuka ngwe omurubuga rw'owaitu, nziikwe haihi n'ekituuro kya ise nyowe na mau, omwiru wawe Kimuhaamu ngugwo, nuwe agende na iwe mukama wange omukama; omukorre kyona ekyorukurora kihikire.”

³⁸Omukama yagarukamu ati: “Ndaagenda na Kimuhaamu, kandi ndaamukorra kyona ekyorukurora kiri kirungi; kyona eki orukwenda ndaakikukorra.”

³⁹Abantu boona baayambuka Yorudaani, omukama na uwe yayambuka; omukama yagwa Bazilayi omu kifuba yamusabira omugisa, Bazilayi yagaruka owaabu.

⁴⁰Omukama yagenda Girigaali, Kimuhaamu yagenda na uwe; abantu boona ab'oruganda rwa Yuda, n'ekicweka eky'abantu ab'oruganda rwa Isirairi bakasendekereza omukama.

⁴¹Nubwo Abaisirairi boona baahikireho omukama, baamukaguza bati: “Bagenzi baitu ab'oruganda rwa Yuda bakwibiire ki kukutwara hara, kukutwara neeka yawe, n'abantu bawe bakakwambura Yorudaani.”

⁴²Ab'oruganda rwa Yuda baagarukamu Abaisirairi bati: “Habwokuba omukama w'oruganda rwaitu orwa haihi. Eki kikubiihiriize ki? Omukama nuwe atuguliire ebituliire? Rundi aina ekisembo ekyatuhaire?”

⁴³Abaisirairi baagarukamu ab'oruganda rwa Yuda bati: “Omukama tumwinamu emigabo ikumi, kandi Daudi tumwinaho bingi okukira inywe. Mukatugayira ki? Tibali niitwe twabandize kubaza ha kigambo eky'okugarra omukama?” Baitu abantu ab'oruganda rwa Yuda, bakakwatwa ekiniga okukira eky'Abaisirairi.