Read Runyoro - rutooro 2 Sam 2 Bible Online

2 Sam 2 - Runyoro - rutooro bible

2 Sam 2

¹Ebi obubyahoire, Daudi akakaguza MUKAMA ati: “Ngende omumbuga ezimu eza Yuda?” MUKAMA yamugarukamu ati: “Irooko ogende.” Daudi yagaruka yakaguza MUKAMA ati: “Hali ezi ngende omurubuga ki?” MUKAMA yamugarukamu ati: “Genda Hebburoni.”

²Daudi yakwata omuhanda yagenda Hebburoni na bakazi be babiri: Omu nuwe Ahinohamu ayarugire Yezereeri, ondi nuwe Abigairi omufaakati muka Nabbali owa Karumeeri.

³Yatwara n'abasaija be abayaikaraga nabo, buli omu yamutwara hamu neeka ye; baikara omumbuga za Hebburoni.

⁴Kandi abantu ba Yuda bakaija Hebburoni, baaseesaho Daudi amagita, baamufoora mukama wa Yuda. Daudi obubaamugambiire ngu abantu aba Yabbesi-giryadi nubo baaziikire Saulo,

⁵yabatumira abakwenda baabagambira bati: “MUKAMA abahe omugisa, habwokuba mukakoora obwesige, Saulo mukama wanyu mwamuziika!

⁶Na inywe MUKAMA abagirre embabazi nyingi kandi abakorre ebirungi! Na nyowe ninyija kubakorra ebirungi, habw'ekintu ekirungi ekimwakozire.

⁷Kyonka mugume kandi mube manzi, habwokuba Saulo mukama wanyu afiire kandi abantu ba Yuda, ninyowe bakomere mbe mukama wabo.”

⁸Abbuneeri mutabani wa Neeri, engabwa y'ihe rya Saulo akaba akwasire Iseboseesi mutabani wa Saulo, yamutwara Mohanahimu;

⁹yamufoora mukama ow'okulema Giryadi, Abasuura, Yezereeri, ab'oruganda rwa Efuraimu noorwa Bbenyamiini, n'Abaisirairi boona.

¹⁰Iseboseesi mutabani wa Saulo ogu, kwija kutandika kulema Isirairi, akaba ahikize emyaka amakumi ana, kandi akalemera emyaka ebiri. Baitu oruganda rwa Yuda rukasagika Daudi.

¹¹Kandi akasumi Daudi akayamazire ali mukama w'enju ya Yuda omurubuga Hebburoni, kakaba k'emyaka musanju n'ekicweka.

¹²Abbuneeri mutabani wa Neeri, n'abairu ba Iseboseesi mutabani wa Saulo bakaruga Mahanaimu baagenda Gibbyoni.

¹³Yowabbu mutabani wa Zerwiya, n'abairu ba Daudi bakagenda babaitirana hakiyanja ekya Gibbyoni; baikarra, ekitebe ekimu kyaikarra harubaju orumu orw'ekiyanja, ekindi kyaikarra harubaju orundi.

¹⁴Abbuneeri yagambira Yowabbu ati: “Ikiriza abasigazi abo baimuke batuzaanire.”

¹⁵Aho abasigazi baimuka, baagenda babazirwe, ikumi na babiri baagenda habw'oruganda rwa Bbenyamiini, n'orwa Iseboseesi mutabani wa Saulo, ikumi na babiri abandi habw'abairu ba Daudi.

¹⁶Buli omu yakwata omunyanzigwa we omutwe, yamusimba empirima omurubaju; boona abiri na bbana, nukwo kufa bakahwaho. Ekiikaro eki, nukwo kwetwa Herikasi-hazulimu[1] amakuru gaalyo ekiikaro eky'empirima kiri Gibbyoni.

¹⁷Ha kiro eki, obulemu bwasarra. Abairu ba Daudi baabinga Abbuneeri n'Abaisirairi boona.

¹⁸Abaana ba Zeruya basatu: Yowabbu, Abisayi na Asaheeri, nabo bakaba baroho. Asaheeri akaba nairuka nk'empara,

¹⁹yairukya Abbuneeri, atarukukubuutuka ha bulyo rundi hamoso.

²⁰Abbuneeri nubwo yarozire enyuma yakaguza ati: Asaheeri, niwe? Asaheeri yagarukamu ati: “Ninyowe”.

²¹Abbuneeri yagambira Asaheeri ati: “Kubuutuka ha mukono gwawe ogw'obulyo rundi ogw'emoso okwate omu ha basigazi abo, omunyage ebyainabyo.”

²²Abbuneeri yagaruka yagambira Asaheeri ati “Lekera aho kunyirukya; habwaki noompambiriza kukwita? Obu, ndigaruka ndole nta mugenzi wawe Yowabbu?”

²³Baitu Asaheeri yalema kukubuutuka. Nubwo Abbuneeri kumudukura icumu, lyamuturukira omumugongo; yagwa, aho atarugeho. Boona abaahikaga Asaheeri nambere yafeeriire, baayemerraga bamaraho akasumi.

²⁴Baitu Yowabbu na Abisayi bairukya Abbuneeri; izooba obulikaba lyasa kugorooba, baahika harusozi orwa Ama orunyakuli omumaiso ga Gaaya, hamuhanda ogunyakutwara omwirungu erya Gibbyoni.

²⁵Ab'oruganda rwa Bbenyamiini baayesorooza enyuma y'Abbuneeri, baaba kitebe kimu, baayemerra ha mutwe gw'orusozi.

²⁶Nubwo Abbuneeri yayeta Yowabbu yamukaguza ati: “Nukwo turakaikara niturwana tuti obutamara? Torukumanya omumaiso nkooku harukwija kubayo akabi? Abantu bawe oraabatanga di bakalekera aho kwirukya bagenzi baabo?”

²⁷Yowabbu yagarukamu ati: “Ndahiire Ruhanga omwomeezi, mazima kwo kakuba waba otagambire, abantu bange banu baakwongiire kwirukya bagenzi baabo okuhika nyenkya.”

²⁸Yowabbu nukwo kuteera engwara, abasaija boona baayemerra, baalekera aho kwirukya Abaisirairi, tibaayongera kurwana.

²⁹Kiro eki kyona, Abbuneeri n'abasaija be bakaraba Araba; bayambuka ekyambu Yorudaani, baarubata omusana gwona, baahika Mohanaimu.

³⁰Yowabbu yalekera aho kwirukya Abbuneeri; obuyasoroize abantu be boona, ha baheereza ba Daudi hakaba nihaburaho abasaija ikumi na mwenda otatairemu Asaheeri.

³¹Abaheereza ba Daudi ha basaija ba Bbenyamiini, bakaitaho bikumi bisatu, kandi ha ba Abbuneeri, baitaho nkaaga.

³²Bakatwara omutumbi gwa Asaheeri, baaguziika omukituuro ekikaba kiri Beterehemu ise ekiyaziikirwemu. Yowabbu abasaija be baarubata ekiro kyona, obwire kukya, bukabasanga baataaha Hebburoni.