Read Runyoro - rutooro 2 Sam 20 Bible Online

2 Sam 20 - Runyoro - rutooro bible

2 Sam 20

¹Omu biro ebi, omukiikaro eki, hakaba haliyo omusaija omubi ibara lye Seba mutabani wa Bikiri ow'oruganda rwa Bbenyamiini; akateera engwara naagamba ati: “Itwe titwine mugabo omu ruganda rwa Daudi, kandi titwina bugwetwa omu ruganda rwa mutabani wa Yese; inywe Abaisirairi, buli omu agaruke omu heema ye!”

²Nubwo Abaisirairi boona baarugaho Daudi, baahondera Seba mutabani wa Bikiri: baitu abantu ab'oruganda rwa Yuda, bakagumiraho mukama wabo, baamuhondera okuruga Yorudaani okuhika Yerusaalemu.

³Daudi obuyataahire omukikaali kye Yerusaalemu, akakwata abakazi be abandi ikumi, abaakaba asigire barolerre enju ye, yabata omunju nuho balindirwe bali banyankomo, yabahaga byona ebibarukwetaaga, baitu tiyatembaga kitabu kyabo. Bakaikara omunkomo okuhika okufa kwabo bali nk'abafaakati, kandi kunu iba bo aikaire.

⁴Nubwo omukama yagambiire Amasa ati: “Onsorooleze ab'oruganda rwa Yuda omumwanya gw'ebiro bisatu, na iwe obeho.”

⁵Nubwo Amasa yagenda kweta ab'oruganda rwa Yuda; baitu akakeerererwa yahinguza akasumi akayahairwe.

⁶Daudi akagambira Abisayi ati: “Seba mutabani wa Bikiri, naija kutukora kubi okukira Abusalomu; kwata abaheereza bange nyowe mukama wawe, omuhondere, ataikara kwetungira embuga ziri ezigumire kandi akatuleetera akabi.”

⁷Yowabbu, Abakeresi, Abapaasa, n'abasaija boona ab'amaani, baahondera Abisayi; bakaruga Yerusaalemu bahondera Seba mutabani wa Bikiri.

⁸Obubaahikire ha ibaale erikooto erinyakuli Gibbyoni, Amasa yaija kubatangirra. Yowabbu akaba ajwaire ekijwaro eky'omuserikale, haruguru yakyo haroho orukoba n'empirima eri omukiraaro kyaayo, agyeteegere omunda, obwakaba naagenda omumaiso, empirima yaruga omukiraaro yagwa.

⁹Yowabbu yaramukya Amasa ati: “Mwana wa Mau, mirembe?” Yowabbu yakwata Amasa omuleju n'omukono gwe ogw'obulyo, amugwe omunda.

¹⁰Baitu Amasa atarole mpirima Yowabbu eyakaba akwasire; Yowabbu yatimba Amasa empirima, amara gaabooga haitaka, obwakaba atakamutimbire obwa kabiri, yafa. Nubwo Yowabbu na Abisayi owanyina nubwo baahondiire Seba mutabani wa Bikiri.

¹¹Omu ha basaija ba Yowabbu, yayemerra haihi na Amasa yamugambira ati: “Weena arukugonza Yowabbu, kandi weena anyakuli harubaju rwa Daudi, akurate Yowabbu.”

¹²Amasa, omutumbi gwe gwona gwijwire esagama, gukaba guli omuruguudo. Weena ayabaga naarabaho obuyamuroraga, yayemerraga; omusaija wa Yowabbu yarora buli muntu nkooku arukwemerra, nukwo kwiha Amasa omuruguudo yamugarra omukisaka, yamusweka orugoye.

¹³Amasa obuyamazire kwihwa omuruguudo, abantu boona baakurata Yowabbu, baahondera Seba mutabani wa Bikiri.

¹⁴Seba akarabamu enganda za Isirairi zoona, yahika Abberi eya Beesi-maaka; Abaabikiri boona baayesorooza baamukuraatira.

¹⁵Abasaija boona abakaba baina Yowabbu, bakaija baamugotera omurubuga Abberi orwa Beesi-maaka; baatuuma entuumo y'itaka okwehinguliriza orubuga, yatuuma okwingana ekisiika; baatandika kuteera orubuga baruseese.

¹⁶Hakabaho omukazi omunyamagezi, ayayesire naayema omurubuga, yagamba ati: “Muhurre, muhurre!” Mugambire Yowabbu muti: “Oirre hanu nkugambire.”

¹⁷Yowabbu yairirra omukazi ogu, omukazi yakaguza Yowabbu ati: “Niiwe Yowabbu?” Yowabbu yagarukamu ati: “Ninyowe.” Omukazi yagambira Yowabbu ati: “Ohurre nyowe omuzaana wawe ebindukukugambira.” Yowabbu yagarukamu omukazi ati: “Ntegere okutu.”

¹⁸Omukazi yagamba ati: “Omubiro ebya ira, abantu baagambaga ngu: ‘Mugende mwekaguze hali Abberi’; nukwo baamaraga bati ebigambo byabo.

¹⁹Ninyowe omu hali abo abaina obusinge, kandi abeesigwa omu Isirairi; nooyenda kuhwerekereza orubuga oruzaara Isirairi yoona; kiki ekyorukwendera kuhwerekereza ebintu bya MUKAMA?”

²⁰Yowabbu yagarukamu ati: “Nikikafuuhe, nikikafuuhe, nyowe kukora ekintu nkeeki.

²¹Eki tikiri ky'amazima. Baitu omusaija ow'omunsi ey'ensozi eya Efuraimu, ibara lye Seba mutabani wa Bikiri, ayemiire omukama Daudi; omusaija ogu wenka nuwe muheyo, nyowe nukwo nduge omurubuga.” Omukazi yagambira Yowabbu ati: “Omutwe gwe nitwija kugurabya hakisiika eruguru, tugukunagire.”

²²Omukazi yahikaho abantu boona yababaliza n'amagezi, nukwo kutemaho Seba mutabani wa Bikiri omutwe, baagunagira Yowabbu. Yowabbu yateera engwara, abasaija boona baaruga omurubuga, buli omu yatoma ogw'owaabo. Yowabbu yagaruka Yerusaalemu omw'omukama.

²³Omukasumi ako, Yowabbu nuwe akaba ali ngabwa y'ihe ryona erya Isirairi; Benaaya mutabani wa Yehoyaada, uwe akaba ali ngabwa y'Abakeresi n'Abapaasa;

²⁴kandi Adoramu, nuwe akaba ali mukuru w'emirimo; Yehosafaati mutabani wa Ahirudi, nuwe akaba ali muhandiiki;

²⁵Seva akaba ali muhandiiki w'eby'ensita; Zadooki n'Abyasara bakaba bali banyakatagara;

²⁶Ira Omuyairi, na uwe akaba ali nyakatagara wa Daudi.