Read Runyoro - rutooro 2 Sam 22 Bible Online

2 Sam 22 - Runyoro - rutooro bible

2 Sam 22

¹Ha kiro MUKAMA ekiyajuniireho Daudi, yamukiza Saulo n'abanyanzigwa be boona,

²Daudi akamuzinira ekizina kinu ati: MUKAMA nuwe mwandara gwange, nuwe kigo kyange, kandi nuwe mujuni wange,

³Nuwe Ruhanga wange, nuwe mwandara gwange ou nyebinga, nuwe ngabu yange arukusobora kunjuna, nuwe bugumizo bwange kandi bwirukiro bwange, niiwe omujuni wange; iwe anyakunjuna ebizibu.

⁴Ndaayetaga MUKAMA anyakusemeriire kuhaisanizibwa, anjunire abanyanzigwa bange.

⁵Habwokuba ebigonzi by'orufu bikanyehinguliriza, ebiisurumba eby'okuhwerekerra byantahirra;

⁶emiguha eya Nyabuyonga ekanzingiza, emitego y'orufu yanturuka omumaiso.

⁷Obunabaga ndi omumuhito nayetaga MUKAMA; nayamirraga Ruhanga wange. Yayemaga omunju ye ahurra iraka lyange, kandi yahurraga nkooku ndukumutaagira.

⁸Nubwo ensi yatengesire yakankana; emisingi y'iguru yatengeeta kandi yatukumira, habwokuba akaba abiihiirwe.

⁹Enyindo ye ekacuukwamu omwika, akanwa ke kaarugwamu omurro kahwerekereza; weena yarugwamu amakura agengere.

¹⁰Akainika iguru, lyainama; omwirima kasira gwateera hansi y'ebigere bye.

¹¹Akatemba ekihangwa kyamapapa yahurruka; yarorwa ali ha mapapa g'omuyaga.

¹²Omwirima ogukaba gumwehinguliriize akagufoora kyesweko, ebicu ebikwasire, yabifoora isoroolezo ly'amaizi.

¹³Okumuliikana okukaba kumuli omumaiso kukarugwamu amakara agarukwaka.

¹⁴MUKAMA akeema omwiguru yahiinda, Rutakirwa akagamba iraka lye lyahulirwa.

¹⁵Akarasa emyambi ye, yararangya abanyanzigwa be; yabamulika yabasingura.

¹⁶MUKAMA obu yahanire abanyanzigwa be, obuyabbukwire akwasirwe ekiniga, nubwo emikura y'enyanja yarozirwe, emisingi y'ensi yazooka.

¹⁷MUKAMA akeema haiguru, yanaga omukono yantwara, yanyiburra omunziha y'amaizi.

¹⁸Akanjuna omunyanzigwa wange ow'amaani, akanjuna abo abanyakunnoba, habwokuba bakaba bampinguraine amaani.

¹⁹Bakanseesira obunkaba ndi omumuhito; baitu MUKAMA nuwe yabaire bugumizo bwange.

²⁰Akantwara omukiikaro ekigalihire; akanjuna, habwokuba akangonza.

²¹MUKAMA akampeera naarorra ha kuhikirra kwange; akansasura habw'okurora ntaina kabi.

²²Nkakora MUKAMA ebyagonza, Ruhanga wange tinkamurugahoga.

²³Ebiragiro bye byona nabikwataga, kandi ebigambo bye tinkabirugahoga.

²⁴Nkaikara ntanyina kamogo hali uwe, kandi ninyetantara ekibi.

²⁵Nikyo MUKAMA yansasuliire naarorra ha kuhikirra kwange, naarora nkooku ntaina kabi.

²⁶Ha beesigwa, oba mwesigwa; ha muntu omurungi oba murungi.

²⁷Ha bantu abarukwera, oba arukwera, ha bantu ababi, togira mbabazi.

²⁸Niiwe ojuna abantu abanyakwebundaaza, baitu oikara oroleriire abeekuliiriza, nukwo obabundaaze

²⁹Ai MUKAMA, niiwe taara yange, ai Ruhanga wange, niiwe ommulikira.

³⁰Ego, habw'okukonyerwa iwe nsobora kusasangura ihe, habw'okukonyerwa Ruhanga wange, nsobora kuguruka ekisiika.

³¹Ruhanga onu kaakora ebirungi! Kaabaza ebigambo eby'obwesige nuwe ngabu y'abo boona abamwebinga.

³²Noha Ruhanga oihireho MUKAMA? Omwandara ogundi niguha, oihireho Ruhanga waitu? Nuwe ngabu y'abo boona abanyakumwebinga.

³³Ruhanga onu nuwe bwirukiro bwange obw'amaani, nuwe yampaire omuhanda ogw'obusinge.

³⁴Akampa ebigere ebirukwanguha nk'eby'enjaza, yanyikaza kurungi hansozi.

³⁵Antendeka nukwo nsobole kurwana obulemu, nukwo nsobole kugema obuta obw'omulinga.

³⁶Niiwe wampaire obusobozi obw'okujunwa, kandi obukonyezi bwawe nubwo bwankulize.

³⁷Hansi okanteraho omwanya ogugalihire ogw'okurubataho, kandi tinkaterebukaga;

³⁸Nkairukya abanyanzigwa bange nabahwerekereza, ntagaruke enyuma okuhika boona obunakabamazireho.

³⁹Nkabacumita nabamaraho tibaasobora kwimuka, baagwa hansi y'ebigere byange.

⁴⁰Niiwe wampaire amaani ag'okurwana obulemu; Niiwe wansingwize abanyanzigwa bange.

⁴¹Niiwe wanyirukiize abanyanzigwa bange, abo abannobaga, na nyowe nukwo kubahwerekereza.

⁴²Bakamagamaga, baitu hakaba hataroho muntu ow'okubajuna, bakamirra MUKAMA, baitu atabaanuukule;

⁴³Nkabasasangura nabafoora cuucu nk'ey'itaka, nkababberengura nabarubatirra nabasambasamba nk'esaabu ey'omunguudo.

⁴⁴Niiwe wanjunire abantu abeemi; niiwe wansoboize okulema amahanga; Abantu abankaba ntamanyire hati nubo batungwa bange.

⁴⁵Abanyamahanga bakaija nibanyebundaaliza; ahonaaho obubaahuliire iraka lyange baakora ekinaragiire.

⁴⁶Abanyamahanga bakahwa amasiko, baaruga omukigo kyabo baija nibakankana.

⁴⁷MUKAMA ahangirize; kandi ogu omwandara gwange akugizibwe, Ruhanga wange, obusobozi obw'okujunwa kwange anyumizibwe.

⁴⁸Ruhanga ayampoliire enzigu ayambundaaliize amahanga,

⁴⁹ayanjunire abanyanzigwa bange; iwe ayanyimukize wankiza abazigu bange, Niiwe wanjunire abantu ababi.

⁵⁰Habweki Ai MUKAMA ndaakunyumizaaga, omumahanga, kandi ndaakuhaisanizaaga.

⁵¹Akaha omukama okusingura, akagonza muno omuseeswaho magita we, nuwe Daudi n'abaijukuru be, ebiro byona.