Read Runyoro - rutooro 2 Sam 23 Bible Online

2 Sam 23 - Runyoro - rutooro bible

2 Sam 23

¹Binu nibyo ebigambo eby'okumalirra Daudi ebiyagambire; Binu nibyo ebigambo ebya Daudi mutabani wa Yese, ebigambo by'Omusaija ayakuziibwe muno, Ruhanga wa Yakobbo ou yakomere ateere engoma, kandi ayahandiikiire Isirairi ebizina ebirungi.

²“Mwoyo wa MUKAMA naabaliza omuli nyowe, ebigambo bye nibyo ndukubaza.

³Ruhanga owa Isirairi abalize, omwandara gwa Isirairi angambiire ati: omukama obwalema kurungi abantu, akabalema naatiina Ruhanga,

⁴abamulikira nk'ensonooki, asisana nk'omusana ogunyakujwa obwire obu buba bukiire kurungi, asisana nk'enjura enyakumeza obunyansi.

⁵Ego, n'enju yange tinukwo eri eti hali Ruhanga? Habwokuba akakora na nyowe endagaano ey'ebiro n'ebiro, endagaano etalicwibwa, etalihinduku, eki nikyo ndukugonza kyonka; kandi eki Ruhanga alikikora kwo.

⁶Baitu abantu ababi abataikiriza Ruhanga basisana amahwa aganyakuhungurwa hara; habwokuba busaho asobora kugakwata ngaro nsa;

⁷baitu omuntu anyakugakwata ajwara ekyoma, akwata n'orubango rw'icumu, kandi abo omurro gulibasiiririza kimu.”

⁸Ganu nugo amabara ag'abasaija ab'amaani abakaba bali na Daudi: Yosebu-basibesi Omutakimooni; nuwe akaba ali mukuru owa bali abasatu; akarwanisa abasaija runaana n'icumu lye, boona yabaita omurundi gumu.

⁹Ayakurataga ogu hali abasaija bali abasatu ab'amaani, nuwe Eryeza mutabani wa Dodo, Dodo mwijukuru wa Ahohi. Obu baasosoimize Abafirisiti abakaba beesoroize kurwana, akaba ali na Daudi. Abaisirairi baagaruka enyuma.

¹⁰Akeemerra yacumita Abafirisiti okuhika omukono gwe obugwakajwahire, yalemwa n'okulekera empirima ye; kiro eki MUKAMA akasingura muno abamu nubwo kukuratira Eryeza, baiheho abaisirwe ebyokurwanisa.

¹¹Owa kasatu ha basatu bali abaranganwa, nuwe Sama mutabani wa Ageye, Omuharali, Abafirisiti bakeesorooleza Leehi, nambere hakaba hali omusiri ogwijwire enkoole, Abaisirairi bairuka Abafirisiti.

¹²Baitu Sama yayemerra omumusiri, yagurwanirra, yaita Abafirisiti, ha kiro eki, MUKAMA nabwo yasingura muno.

¹³Ekitebe ky'Abafirisiti obukikaba kitiire orukande omukyeya eky'Abarefaimu, ha basaija amakumi asatu abakuru hagendaho basatu baahikaho Daudi nk'omukasumi ak'igesa, baamusanga omubwingira obwa Aduraamu.

¹⁴Omukasumi ako, Daudi akaba ali omukigo; kandi ihe erya Abafirisiti, likaba liri Beterehemu.

¹⁵Daudi yagamba n'ekihika ati: “Ha, boojo, omuntu abaire kumpa amaizi g'okunywa ag'iziba erya Beterehemu erinyakuli haihi n'irembo!”

¹⁶Abasaija bali abasatu ab'amaani nubwo baahagwire orukande rwa Abafirisiti, baataha amaizi omwiziba erya Beterehemu erikaba liri haihi n'irembo, baagamutwarra. Baitu amaizi ago ataganywe, okwakubaire kuganywa, akagaseesa kibe kihongwa kya MUKAMA,

¹⁷yagamba ati: “MUKAMA, nikikafuuhe nyowe kunywa amaizi ganu! Naakubaire nt'anywire esagama ey'abasaija abo abaahoiremu obwomeezi bwabo!” Eki nikyo kyamutangire kuganywa. Ebi nibyo ebintu abasaija abasatu ab'amaani ebibaakozire.

¹⁸Abisayi owanyina Yowabbu mutabani wa Zeruya, nuwe akaba ali mukuru wa bali amakumi asatu, akarwanisa abasaija ebikumi bisatu n'icumu lye, yabaita,

¹⁹yaba muranganwa okukira amakumi asatu bali, kandi yafooka ngabwa yabu, baitu atainganaingane n'abasatu bali.

²⁰Benaaya mutabani wa Yehoyaada, ayarugire Kabuzeeri, ayakozire ebintu bingi ebikuru, otaireho n'okwita abaserikale babiri aba Mowabbu, akaba ali musaija emanzi. Kiro kimu, obuhakaba hagwire ebirika, akagenda yaita entale yagiitira omubuhya.

²¹Kandi akaita n'Omunyamisiri, omusaija owakaba asemiire aina icumu; Benaaya yamugendera akwasire omwigo, yamujakuraho icumu lye eryakaba akwasire, niryo yamwisa.

²²Ebintu ebi, Benaaya mutabani wa Yehoyaada nibyo yakozire, yaba muranganwa okukira abasaija bali abasatu ab'amaani.

²³Akaba murangaanwa ha makumi asatu, baitu ataingane n'abasatu. Daudi nukwo kumuha okurolerra abaserikale be abalinzi.

²⁴Banu nubo abantu abandi hali bali amakumi asatu: Asaheeri owanyina Yowabbu, Erihanani mutabani wa Dodo owa Beterehemu,

²⁵Sama owa Harodi, Erika owa Harodi,

²⁶Herezi Omuparuti, Ira mutabani wa Ikesi owa Tekoha,

²⁷Abyezeri wa Anasosi, Mebunahi Omuhuusi,

²⁸Zarumoni owa Ahohi, Maharahi owa Netofa,

²⁹Herebu mutabani wa Bbaana owa Netofa, Itaayi mutabani wa Ribayi owa Gibeha ey'ab'oruganda rwa Bbenyamiini,

³⁰Benaaya owa Pirasoni, Hidaayi ow'omu busaaru bwa Gaasi,

³¹Abiyaliboni Omurubasi, Azimavesi owa Bahulimu,

³²Eryahaba owa Salibooni, batabani ba Yaseni, Yonasaani,

³³Sama Omuharati, Ahyamu owa Sara omuharaki,

³⁴Erifereti mutabani wa Ahasibayi owa Maaka, Eryamu mutabani wa Ahisofeeri owa Giro,

³⁵Heziro owa Karumeeri, Parayi Omwarubi,

³⁶Igaali mutabani wa Nasani owa Zoba, Bbaana Omugaadi,

³⁷Zereki Omumooni, Naharayi owa Beeroosi, ayayetwekaga ebyokurwanisa bya Yowabbu mutabani wa Zeruya,

³⁸Ira Omwisiri, Galebu Omwisiri,

³⁹na Uliya Omuhiiti. Boona hamu, makumi asatu na musanju.