Read Runyoro - rutooro 2 Sam 24 Bible Online

2 Sam 24 - Runyoro - rutooro bible

2 Sam 24

¹MUKAMA akagaruka yakwatirwa muno Abaisirairi ekiniga, nukwo kwohereza Daudi ati: “Genda obale Abaisirairi n'ab'oruganda rwa Yuda.”

²Omukama nukwo kugambira Yowabbu n'engabwa ez'ihe abakaba bali na uwe ati: “Murabemu enganda eza Isirairi zoona, okurugirra ha rwa Daani okugarukira ha rwa Beriseba, mubale abantu.” Nukwo mmanye omuhendo gwabo.

³Baitu Yowabbu yagarukamu omukama ati: “MUKAMA Ruhanga wawe, akanyise abantu, emirundi kikumi okukira nkooku bali hati, kandi na iwe oyomeere orole MUKAMA nkooku arukubakanyisa; baitu mukama wange omukama, ekintu kinu, nookigondeza ki muno oti?”

⁴Baitu omukama yahambiriza Yowabbu n'abanyoro bakole ekyaragiire; baamuruga omumaiso baagenda kubara Abaisirairi.

⁵Baayambuka Yorudaani baatandikira ha bukiizi obw'obulyo obwa Aroheri, na harubuga orunyakuli hagati y'ekihanga, oroleriire Gaadi, baayeyongerayo okuhika Yazeri.

⁶Hanyuma baahika Giryadi na Kadesi, omunsi ey'Abahiiti; baahika Daani, obubaarugire Daani, baagenda Sidoni;

⁷baahika ha kigo ekya Taya, na hambuga zoona ez'Abahiivi n'ez'Abanyakanaani; bairrayo baahika Negebbu eya Yuda, enyakuli Beriseba.

⁸Obubaamazire kurabamu ensi yoona hahingwireho ameezi mwenda n'ebiro amakumi abiri, baahika Yerusaalemu,

⁹Yowabbu yagambira omukama omuhendo gw'abantu abaabazirwe. Abaisirairi, abasaija emanzi abaakwataga empirima, bakahika emitwaro kinaana, kandi aba Yuda bakahika emitwaro ataano.

¹⁰Daudi obuyamazire kubara abantu, omutima gwamusarra, nukwo kugamba MUKAMA ati: “Nsiisire muno okukora ekintu nka kinu! Baitu MUKAMA wange nkwesengeriize onganyire, eki nkikozesiibwe obudoma.”

¹¹Nyenkya Daudi obuyaimukire, MUKAMA akagambira Gaadi omurangi, omuraguzi wa Daudi ati:

¹²“Genda ogambire Daudi oti: MUKAMA naagamba ati: Ninkuha ebintu bisatu; okomeho ekimu hali byo, eki nikyo ndaakukorra.”

¹³Gaadi yagenda hali Daudi yamukaguza ati: “Nooyenda ogwerwe kiihe omunsi yawe okumara emyaka esatu? Rundi okumara ameezi asatu noirukibwa abanyanzigwa bawe? Rundi ensi yawe egwibwemu kagingo okumara ebiro bisatu? Hati, oteekereze, nukwo ommanyise ekindaagambira oli ayantumire.”

¹⁴Daudi yagarukamu Gaadi ati: “Binu binsobiire! Baitu tindukwenda kufubirwa abantu. MUKAMA wenka leka nuwe anfubire, habwokuba munyambabazi.”

¹⁵Nubwo MUKAMA yanagamu Abaisirairi kagingo okuruga nyenkya okuhika ha kasumi akaagumiibwe; okuruga Daani okuhika Beriseba, haafa abantu mitwaro musanju.

¹⁶Malaika obuyagoroire omukono agwolekiize Yerusaalemu aruhwerekereze, MUKAMA yagira embabazi, nukwo kugambira malaika ow'akaba naahwerekereza abantu ati: “Lekera aho, otongera.” Malaika wa MUKAMA akaba ali haihi n'orubuga orwa Arahuna Omuyebusi orwahuulirwahoga.

¹⁷Daudi obuyaboine malaika ow'akaba naita abantu, yagambira MUKAMA ati: “Ego ninyowe nsiisire kandi nkozire kubi; baitu abantu abo, bbo bakozire ki? Nkwesengeriize, ofubire nyowe neeka ya ise nyowe.”

¹⁸Kiro eki, Gaadi yagenda hali Daudi yamugambira ati: “Genda oyombekere MUKAMA itambiro harubuga orwa Arahuna Omuyebusi, orunyakuhuulirwaho.”

¹⁹Daudi yahurra MUKAMA eki yaragiire, yagenda Gaadi nkooku yamugambiire.

²⁰Arahuna obuyanagire amaiso, yabona omukama n'abaheereza be nibamwirirra; nukwo kugenda kumutangirra, yajuumara omumaiso ge.

²¹Arahuna yakaguza ati: “Waitu, kiki ekikuleesire hali nyowe omwiru wawe?” Daudi yagarukamu ati: “Nyizire kugura orubuga rwawe oru ohurraho, nyombekereho MUKAMA itambiro, nukwo abantu bajunwe kagingo.”

²²Hanyuma Arahuna yagambira Daudi ati: “Nyina enimi nzizo, ez'ekihongwa eky'okwokya, nyina emigamba n'embaaho ez'okuteeza, ezi nizo enku.

²³Ebi byona Arahuna yabiha omukama”, kandi yamugambira ati: “MUKAMA Ruhanga wawe ekihongwa kyawe akisiime.”

²⁴Baitu omukama yagarukamu Arahuna ati: “Ekihongwa eki noija kukinguza; tindukwija kuhongera MUKAMA Ruhanga wange ebihongwa eby'okwokya ebitantwaireho kantu.” Nubwo Daudi yagura orubuga orwahulirwahoga, n'enimi, yabiheera kiloguraamu ezirukukira mukaaga n'ekicweka eza zaabbu.

²⁵Daudi nuho yayombekiire MUKAMA itambiro, yahongeraho ebihongwa eby'okwokya n'eby'okusaba obusinge. MUKAMA yamuha ekiyasabire, kagingo yakira omu Isirairi.