Read Runyoro - rutooro 2 Sam 3 Bible Online

2 Sam 3 - Runyoro - rutooro bible

2 Sam 3

¹Hakabaho obulemu obw'amaani, enju ya Saulo yarwana n'enju ya Daudi; enju ya Saulo yagenda neeyeyongera obuceke, kandi eya Daudi yayeyongera amaani.

²Daudi obwakaba ali Hebburoni, akazaara abaana b'obwojo: omuzigaijo, ou yazaireho Ahinohamu, ayarugire Yezereeri; ibara lye nuwe Amunooni;

³owakabiri nuwe Kiryeba, ogu akamuzaaraho Abigairi omufakati muko mubule Nabbali, ayarugire Karumeeri; owa kasatu nuwe Abusalomu, ogu akamuzaaraho Maaka muhara wa Taalimai omukama wa Gesura;

⁴owa kana, nuwe Adoniya, ogu akamuzaaraho Hagisi; owa kataano, nuwe Sefatiya, ogu akamuzaaraho Abitaali;

⁵owa mukaaga, nuwe Isireyamu owa Egira muka Daudi. Abo nubo abaana Daudi abayazaaliire Hebburoni.

⁶Enju ya Saulo obwekaba n'ekyarwana n'enju ya Daudi, Abbuneeri akeefoora mukuru omunju ya Saulo.

⁷Saulo akaba aina omukazi ondi muhara wa Aiha ibara lye Rrizipa; Iseboseesi yakaguza Abbuneeri ati: “Kiki ekikutembeseze ekitabu kya muka ise nyowe?”

⁸Iseboseesi ekigambo yagambire eki, kyabiihiza muno Abbuneeri, Abbuneeri mukwo kukaguza Iseboseesi ati: “Nooteekereza, nyowe ndi mbwa ya Yuda? Okuruga ira lyona, mba mwesigwa omunju ya sso Saulo, hali bagenzi be, na hali banywani be, kandi iwe nkakujuna Daudi; hati niiwe orukunjunaana omukazi?

⁹Kinu MUKAMA akakinihiza Daudi, nkooku aliihaho Saulo na baijukuru be obukama, Daudi nuwe afoole MUKAMA wa Isirairi na Yuda, okuruga ha mutaano gumu ogw'ensi okugarukira ha mutaano ogundi. Ruhanga naakanyite, obu ntaacwe goona eki kikahikirra.

¹⁰Okwiha obukama omunju ya Saulo, n'okufoora Daudi omukama ow'okulema Isirairi na Yuda, okuruga Daani okugarukira Beeri-sebba.”

¹¹Iseboseesi atagarukemu Abbuneeri ekigambo ekindi, habwokuba yamutiinaga.

¹²Abbuneeri yatumira Daudi abakwenda, baamusanga Hebburoni baamukaguza bati: “Ensi enu y'oha? Tukole hamu endagaano, nukwo nkukonyere, Isirairi yoona ebe yaawe.”

¹³Daudi yagamba ati: “Ego; nyikiriize okukora na iwe endagaano; baitu ninkusaba ekintu kimu kyonka nikyo kinu, tolindora otabandize kuleeta Mikaali muhara wa Saulo.”

¹⁴Nubwo Daudi yatumira Iseboseesi mutabani wa Saulo abakwenda naagamba ati: “Ngarurra mukazi wange Mikaali ou najugire ebisusu kikumi eby'Abafirisiti.”

¹⁵Iseboseesi yatuma, baaleeta Mikaali, baamwihaho iba Parutyeri mutabani wa Laisi.

¹⁶Baitu iba Mikaali yamukuraatira yagenda naamulirirra omu muhanda, okuhika kutaaha Bahulimu. Aho Abbuneeri yamucoomera ati: “Rugaho ogende,” Parutyeri yagenda.

¹⁷Abbuneeri akahanuura n'abakuru ba Isirairi naagamba ati: “Omukasumi akaahingwire, mukaba nimwenda Daudi nuwe abe mukama wanyu.

¹⁸Hati, kanu nuko akasumi ak'okukora ekintu eki; habwokuba MUKAMA akanihiza Daudi naagamba ati: Omwiru wange Daudi nuwe ndyekonyeza kujuna abantu bange Abaisirairi, mbaiheho Abafirisiti n'abanyanzigwa baabo boona.”

¹⁹Kandi Abbuneeri nawe yabaza na Bbenyamiini; nubwo yagenda Hebburoni kugambira Daudi, byona Isirairi n'enju ya Bbenyamiini ebibaateekeriize nkooku bisemeriire kukorwa.

²⁰Abbuneeri obuyahikire Hebburoni omwa Daudi, hamu n'abasaija be amakumi abiri, Daudi yabakorra obugenyi.

²¹Abbuneeri yagambira Daudi ati: “Ninyija kugenda nsorooze Abaisirairi boona mbaleetere iwe mukama wange omukama, bakole na iwe endagaano, nukwo oleme abo boona abogonza muno oti.” Nubwo Daudi yaraga Abbuneeri, Abbuneeri yagenda n'obusinge.

²²Omukasumi ako, abaheereza ba Daudi baahika, bali hamu na Yowabbu, nibaruga kuramaga, baaleeta ebintu bingi ebibakaba banyagire. Baitu Abbuneeri, akaba atakyali Hebburoni hamu na Daudi, habwokuba Daudi akaba amuragire, yamurugaho yagenda n'obusinge.

²³Yowabbu obuyahikire hamu n'abantu be boona, baamugambira ngu: “Abbuneeri mutabani wa Neeri akaija ow'omukama, omukama yamuraga yagenda n'obusinge.”

²⁴Yowabbu nubwo yagenzire hali omukama yamukaguza ati: “Eki okakora ki? Abbuneeri akakuhikaho; kiki ekyamukulekeseze akagenda?

²⁵Ekyamuleesire hanu, akaija kukubiihabiiha, ayetegereze byona ebyokora, amanye hoona nambere ogenda.”

²⁶Yowabbu obuyarugire omumaiso ga Daudi, yatuma abakwenda yabakurasa Abbuneeri, baamusanga haiziba lya Sira, baamugarra; baitu eki Daudi atakimanye.

²⁷Abbuneeri obuyagarukire Hebburoni, Yowabbu yamugarra harubaju hagati y'irembo, nk'arukwenda kumubaliza ensita. Aho nuho yamucumitiire enda, Abbuneeri yafa, Yowabbu yahoora enzigu habw'esagama y'owanyina Asaheeri.

²⁸Hanyuma Daudi obuyahuliire ekigambo eki, yagamba ati: “Nyowe n'engoma yange, MUKAMA talitujunaana esagama y'Abbuneeri mutabani wa Neeri.

²⁹Esagama ye ejunaanwe Yowabbu n'eka ya ise yoona; omunju ye, hataliburamu omurwazi w'ekiigarro, hataliburamu omugenge, rundi arukwesimbagiriza omwigo, rundi owaliitwa empirima, rundi ow'aliburwa ebyokulya!”

³⁰Yowabbu na Abisayi nukwo baisire bati Abbuneeri, habwokuba akaita mugenzi wabo Asaheeri, yamunaga omubulemu obwa Gibbyoni.

³¹Nubwo Daudi yagambira Yowabbu n'abantu boona abaakaba ainabo ati: “Mutemule engoye zanyu, mujwale ebitengo, mulirirre Abbuneeri,” omukama Daudi yakuraatira

³²Abbuneeri bakamuziika Hebburoni; omukama yateera ekyoboobo, yalirirra ha kituuro kye, n'abantu boona baarra.

³³Omukama yalirirra Abbuneeri naagamba ebigambo binu: “Abbuneeri yaakufiire nk'omudoma?

³⁴Emikono yawe etabohwe, amaguru gawe gatatebwemu mpinga; okafa nk'omuntu anyakwisirwe abantu ababi.” Abantu baagaruka baalirirra Abbuneeri.

³⁵Nubwo abantu baija kuhambiriza Daudi alye ebyokulya obwire butakaizire; baitu Daudi yarahira naagamba ati: “Ruhanga naakanyite, kakuba ngira ekindiire izooba litakagoroobere!”

³⁶Eki abantu baakyetegereza, kandi baakisiima; byona omukama ebiyakakoraga nkooku byasiimwaga abantu boona.

³⁷Ha kiro eki, abantu boona aba Daudi n'Abaisirairi, bakamanya omukama nkooku ataragondeze kwita Abbuneeri mutabani wa Neeri.

³⁸Omukama yakaguza abaheereza be ati: “Timumanyire kiro kinu, omu Isirairi nkooku hafiiremu omulemi kandi omuntu ow'ekitiinisa?

³⁹Noobu ndaaba ndi mukama ayaseesirweho amagita; kiro kinu nyina obujune, abasaija banu batabani ba Zeruya bandi kubi. MUKAMA asasule enkozi y'ekibi naarorra ha bibi ebiyakozire!”