Read Runyoro - rutooro 2 Sam 5 Bible Online

2 Sam 5 - Runyoro - rutooro bible

2 Sam 5

¹Kandi, enganda za Isirairi zoona zaagenda Hebburoni hali Daudi, baamugambira bati: “Itwe tuli bantu b'esagama yawe, kandi b'enda yawe.

²Omu busumi obwahingwire, obutukaba nitulemwa omukama Saulo, niiwe wayebeemberaga kandi niiwe wagarraga Isirairi; kandi MUKAMA akakugambira ati: Niiwe oliba muliisa w'abantu bange Abaisirairi, kandi niiwe olibalema.”

³Nubwo abakuru ba Isirairi boona baagenda Hebburoni ow'omukama; omukama Daudi yakora nabo endagaano Hebburoni omumaiso ga MUKAMA, baaseesaho Daudi amagita, yafooka mukama wa Isirairi.

⁴Daudi nambere yateeriire engoma, akaba ahikize emyaka amakumi asatu, hangoma akamaraho emyaka amakumi ana.

⁵Hebburoni eya Yuda akagiremera emyaka musanju n'ekicweka; kandi omurubuga Yerusaalemu, akalema Isirairi yoona na Yuda okumara emyaka amakumi asatu n'esatu.

⁶Omukama n'abasaija be bakagenda Yerusaalemu kuseesira Abayebusi enzaarwa z'ensi egi, Abayebusi baagambira Daudi bati: “Hanu tolirubataho, abahimbaara n'ebizingo bonka nubo balikubinga.” Ekyabagambisize kiti, baagiraga ngu Daudi tasobora kuhikayo.

⁷Baitu Daudi akahamba ekigo kya Siyoni, nikyo kyayetiirwe orubuga orwa Daudi.

⁸Ha kiro eki, akagamba ati: “Weena ow'araacumita Abayebusi, atembe omukura gw'amaizi, nukwo aseesire ebizingo n'abahimbaara Daudi abaatarukwenda.” Nikyo kyagambiirwe kiti: “Abahimbaara n'ebizingo tibalitaaha omunju ya MUKAMA!”

⁹Daudi akaikara omukigo eki, yakiruka ibara orubuga rwa Daudi, yaruzitirra rwona okurwehinguliriza, okuruga Miro okuhika omunda yarwo.

¹⁰Daudi akagenda naayeyongera ekitiinisa, habwokuba MUKAMA Ruhanga ow'amahe yaikaraga na uwe.

¹¹Hiraamu omukama wa Taya akatumira Daudi abakwenda, yamutwekera emiti emikogoto, ababaizi n'aboombeki ab'okumwombekera ekikaali.

¹²Aho Daudi nuho yamanyiire MUKAMA nkooku amugumize kuba mukama wa Isirairi, kandi nkooku anyumiize obukama bwe habw'abantu be Abaisirairi.

¹³Daudi obuyamazire kuruga Hebburoni, akongera yaswera abakazi abandi ab'omurubuga Yerusaalemu; yayongera yazaara abaana aboojo n'abaisiki.

¹⁴Ganu nugo amabara g'abaana abayazaaliire Yerusaalemu: Samwa, Sobbabbu, Nasani, Solomooni,

¹⁵Ibbuhaara, Erisuha, Nefegi, Yafiya,

¹⁶Erisama, Eryada na Erifereti.

¹⁷Abafirisiti obubaahuliire ngu Daudi aseesirweho amagita kuteera engoma ya Isirairi, boona baagenda kumuserra; eki Daudi obuyakimanyire, yagenda omukigo.

¹⁸Omukasumi ako, Abafirisiti, bakaba baizire basimbire omukihanga ekya Rrefaimu.

¹⁹Nubwo Daudi yakaguza MUKAMA ati: “Abafirisiti abo, ngende mbarwanise? Oraabampa mbasingule?” MUKAMA yamugarukamu ati: “Irooko ogende; ninyija kubakuha kwo obasingule.”

²⁰Daudi yagenda Baali-perazimu, yarwana n'Abafirisiti, yabasingura, yagamba ati: “MUKAMA ahagwire abanyanzigwa bange, nkooku amaizi gahagura itaka.” Ekiikaro eki, nikyo kyarukiirwe ibara Baali-perazimu.

²¹Abafirisiti obubairukire, ebisisani eby'embandwa zaabo baabisigayo, Daudi n'abasaija be baabitwara.

²²Abafirisiti baagaruka, baasimba omukihanga ekya Rrefaimu.

²³Daudi obuyakagwize MUKAMA, yamugarukamu ati: “Otabarumba, genda obarabe enyuma, obagwere haihi n'emiti emitugunda,

²⁴obworaahurra enswaswa z'abantu abarukurubata omumasonsolya g'emitugunda, obu nubwo obeenagemu; habwokuba omukasumi ako, MUKAMA araaba akwebembiire kuteera ihe ery'Abafirisiti.”

²⁵Daudi yakora nkooku MUKAMA yamuragiire, yabinga Abafirisiti, okuruga Geba okuhika Gezeri.