Read Runyoro - rutooro 2 Sam 6 Bible Online

2 Sam 6 - Runyoro - rutooro bible

2 Sam 6

¹Daudi yagaruka yasorooza abasaija boona aba Isirairi abaakomerwe, abarukuhika emitwaro esatu.

²Yaimuka yagenda n'abantu boona abaakaba ainabo, baagenda Baale eya Yuda, kwihayo Esanduuko ey'Endagaano ya Ruhanga, eyayetwaga ibara erya MUKAMA ow'amahe anyakusinga ha Bakerubbi.

³Esanduuko ya Ruhanga egi, baagita ha kigaali ekihyaka, baagiiha omunju ya Abinadabbu eyekaba eri ha kasozi; Uza na Ahiyo batabani ba Abinadabu, nubo bakaba nibasindika ekigaali ekihyaka

⁴ekikaba kiroho Esanduuko ey'Endagaano ya Ruhanga; Ahiyo nuwe akaba ayebembiire.

⁵Daudi n'abantu boona abenju ya Isirairi bakaba nibazina n'amaani gaabo goona, okutamu Ruhanga ekitiinisa, nibateera endongo, endingidi, esurumbeete, amadinda, n'ebitaasa.

⁶Obubaahikire harubuga orwa Nakoni orwahuulirwahoga, Uza yagorra omukono yakwata Esanduuko ya Ruhanga, ereke kugwa, habwokuba ente ikatabaijuka,

⁷MUKAMA yamubiihirirwa muno; yamwitiraho aho, habw'okukwata ha Sanduuko ey'Endagaano; Uza aho nuho yagwire, haihi n'Esanduuko y'Endagaano ya Ruhanga.

⁸MUKAMA habw'okukwatwa ekiniga akafubira Uza, eki kikabiihiza Daudi; ekiikaro eki, nukwo kwetwa Pereezi-uza, nukwo kyetwa okuhika na hati.

⁹Kiro eki, Daudi nukwo kutiina muno MUKAMA yayekaguza naagamba ati “Esanduuko ey'Endagaano ya MUKAMA enu, owange eraijayo eta?”

¹⁰Atagonze kugitwara omurubuga rwe; nukwo kugikubuutura, yagitwara omunju ya Obbededomu Omugiti.

¹¹Esanduuko ya MUKAMA, ekamara omunju ya'Obbededomu ameezi asatu; MUKAMA yamuha omugisa neeka ye yoona.

¹²Omukama Daudi, akahurra MUKAMA nkooku yahaire Obbededomu omugisa neeka ye yoona habw'Esanduuko ey'Endagaano kuba omunju ye. Daudi nukwo kugenda kugiiha omunju ya Obbededomu, yagireeta omurubuga rwe n'okusemererwa;

¹³Abo abakaba bagyetwekere, obubakaba baakarubata entambu nka mukaaga, Daudi yatamba enimi n'enyana enyakugomokere.

¹⁴Daudi ayeteegere orugoye rwa kitaani rwonka, yazina omumaiso ga MUKAMA, n'amaani ge goona.

¹⁵Daudi n'enju ya Isirairi yoona, nukwo baaleesire bati Esanduuko ey'Endagaano ya MUKAMA baina omuhimbo, nibateera engwara.

¹⁶Esanduuko ey'Endagaano ya MUKAMA obuyataahire omurubuga rwa Daudi, Mikaali muhara wa Saulo, yarorra omwidirisa, yarora omukama Daudi naaguruka, naazina omumaiso ga MUKAMA, yamugayisa omutima.

¹⁷Baatahya Esanduuko ya MUKAMA, baagita omukiikaro kyayo, omunda y'Eheema, Daudi ei yagiteeriire. Nubwo Daudi yahongera MUKAMA ebihongwa eby'okwokya n'eby'okusaba obusinge.

¹⁸Daudi obuyamazire kuhonga ebihongwa eby'okwokya n'eby'okusaba obusinge, yasabira abantu omugisa omwibara lya MUKAMA ow'amahe,

¹⁹yainura abantu boona, ekitebe kyona, abasaija n'abakazi, yabaha omugaati, enyama, n'enjuma z'emizabbibbu. Hanyuma, abantu baayahukana, buli muntu yatoma ogw'owabo.

²⁰Daudi yagaruka kusabira eka ye omugisa. Mikaali muhara wa Saulo yaija kumwitirana, yamukaguza ati: “Kiro kya hati omukama wa Isirairi ka nukwo ayetairemu ekitiinisa, kwejuura omumaiso g'abazaana be atarukugira nsoni, nk'omuntu ataina ngeso!”

²¹Daudi yagarukamu Mikaali ati: “Mbaire ninzinira MUKAMA, tinziniire bantu. MUKAMA omwomeezi, ayangondeze okukira sso neeka ye yoona, yankoma yanfoora mwebembezi wa Isirairi, nubo bantu be, ndaamuziniraga.

²²Ninyija kwongera kukora ebirukungayisa okukira kinu, iwe noija kungaya, baitu abazaana abo aboogambire, bbo nibaija kuntamu ekitiinisa.”

²³Mikaali atazaale mwana okuhika okufa kwe.