Read Runyoro - rutooro 2 Sam 7 Bible Online

2 Sam 7 - Runyoro - rutooro bible

2 Sam 7

¹Omukama Daudi obuyaikaire omukikaali kye, MUKAMA amazire kumuhuumuza, amwihireho abanyanzigwa be boona abakaba bamwehinguliriize,

²akagambira Nasani omurangi ati: “Dora nyowe nkooku ndukuraara omunju eyayombekerwe emiti emikogoto, baitu Esanduuko ey'Endagaano ya MUKAMA, yo ikara omuheema.”

³Nasani yagarukamu omukama ati: “Genda okole kyona ekyorukuteekereza, habwokuba MUKAMA ali na iwe.”

⁴Baitu ha kiro eki kyonyini omubwire bw'ekiro, MUKAMA akagambira Nasani ati:

⁵Genda ogambire omwiru wange Daudi oti: Nimmugambira nti: “Tali iwe alinyombekera Enju ey'okwikaramu.”

⁶Okuruga ha kiro eki naihiireho abantu ba Isirairi omunsi Misiri n'okuhika hati, tinkaraaraga omunju, baitu ningendagenda hanu na hali, nindaara omuheema.

⁷Omu bikaaro byona ebinakagendamu, hamu n'abantu bange Abaisirairi, ndakagwize abamu ha bacwi b'emisango aba Isirairi aba naragiire okurolerra abantu bange Abaisirairi nti: “Kiki ekyabatangire kunyombekera enju ey'emikogoto?”

⁸Hati nu, ogambire omwiru wange Daudi oti MUKAMA ow'amahe naagamba ati: “Nkakwiha omwiriisizo nooliisa entaama, nukwo ofooke mulemi w'abantu bange aba Isirairi;

⁹naikaraga na iwe hoona nambere wakagendaga, abanyanzigwa bawe boona nkabahwerekereza, ninyija kukufoora omurangwibara, nk'abarangwibara boona ab'omunsi.

¹⁰Ninyija kukomera abantu bange Abaisirairi ekiikaro nkibatemu, baikale omukiikaro kyabo bonka, baleke kugaruka kutalibanizibwa; abantu ababi tibalyongera kubabonesa nka kara.

¹¹Okuruga omukasumi akanakomiiremu abacwi b'emisango kubalema; kandi ndikuhuumuza nkwiheho abanyanzigwa bawe boona. Ekindi, MUKAMA naakugambira ngu: Nuwe alyombekera iwe enju.

¹²Empero yawe obwerihika, okafa okaziikwa hamu na baswenkuru, omu ha batabani bawe, ndimufoora mukama, kandi obukama bwe, ndibufoora bw'amaani;

¹³Ogu nuwe alinyombeekera enju, ndigumya obukama bwe ebiro byona.

¹⁴Ndiba ise, na uwe aliba mwana wange. Obwalisobya, ndimuteeza omwigo abantu ogubateeza, ndimuteeza enkoba abantu boona ezibateeza abaana baabo;

¹⁵baitu tindireka kumugonza nkooku nakozire Saulo ou naihireho, nukwo iwe otunge obukama.

¹⁶Enju yawe n'obukama bwawe, ndibiikazaaho; obukama bwawe buliba bw'ebiro byona.”

¹⁷Nasani, ebigambo ebi byona, na byona ebiyayolekerwe, yabigambira Daudi.

¹⁸Kandi Daudi yataaha omu Heema ya MUKAMA, yaikarra, yakaguza MUKAMA ati: “Ai MUKAMA Ruhanga, ninyowe oha, kandi enju yange niyo eha, iwe kundeeta kunu hoona?

¹⁹Ai MUKAMA Ruhanga, kinu omumaiso gawe kintu kike; obalizeeho enju ey'omuheereza wawe eyeribaho omubiro eby'omumaiso, kandi onyolekere eby'omumaiso!

²⁰MUKAMA Ruhanga ekindi nkugambe ki?

²¹Niiwe wagondeze kandi niiwe wamaliriire okukora kinu; ekyakukoleze ebikuru binu byona, nukwo kunnyegesa.

²²MUKAMA Ruhanga oli mukuru; habwokuba busaho noomu arukukusisana, okusigikira ha byona ebitwahuliire n'amatu gaitu, tiharoho Ruhanga ondi okwihaho iwe wenka.

²³Ihanga ki erindi omunsi erirukusisana ihanga lyawe erya Isirairi; Ruhanga abayagenzire kucungura nukwo babe bantu be, naayoleka obusobozi, nabakorra ebintu eby'amaani kandi ebirukutiinisa, naabinga ihanga n'embandwa zalyo abantu be batakahikiremu?

²⁴Abantu bawe Abaisirairi, okabagumya, babe bawe ebiro byona; kandi iwe Ai MUKAMA, okafooka Ruhanga wabo.

²⁵Ai MUKAMA hati hikiriza ekiwagambiire nyowe omwiru wawe n'enju yange, okikole nkooku wagambire.

²⁶Ibara lyawe nukwo liikale nirikugizibwa, abantu nibagamba bati: ‘MUKAMA ow'amahe, nuwe Ruhanga owa Isirairi’, kandi ogumye enju ya Daudi omwiru wawe.

²⁷Habwokuba iwe, Ai MUKAMA ow'amahe Ruhanga owa Isirairi, binu niiwe wabyolekere omwiru wawe noogamba oti: ‘Ndikwombekera enju’; omwiru wawe nukwo kutunga amaani g'okusoma esaara enu.

²⁸Mazima kwo, Ai MUKAMA Ruhanga, niiwe Ruhanga kwo, ogamba eby'amazima, ekintu kinu ekirungi niiwe wakinihiize omwiru wawe;

²⁹nkwesengeriize, ikiriza kuha omugisa enju y'omwiru wawe, nukwo eyeyongere okukoraga ebyosiima, habwokuba, Ai MUKAMA Ruhanga kinu niiwe wakigambire habw'omugisa ogu wahaire enju y'omwiru wawe, eraikaraga eri y'omugisa ebiro byona.”