Read Runyoro - rutooro 2 Sam 8 Bible Online

2 Sam 8 - Runyoro - rutooro bible

2 Sam 8

¹Ebi obubyahoire, Daudi yasingura Abafirisiti yabajeemura yabaihaho ensi Mesegama.

²Hanyuma yasingura Abanyamowabbu, yaragira abanyankomo babyame hansi, ha buli banyankomo basatu, yagenda naitaho babiri. Aho bafooka batungwa be, baatandika kumuha omusoro.

³Kandi na Hadadezeeri mutabani wa Rrehobu omukama wa Zoba, obwakaba naagenda kwegarurra ensi ye eya ha bukiizi obw'emoso obw'ekisaaru Efuraate, na uwe yamusingura.

⁴Omukama ogu, Daudi yamunyagaho abasaija abatembi b'embaraasi rukumi n'orusanju, kandi abaserikale abarwani ab'ebigere mitwaro ebiri; yatema ebiteega eby'embaraasi zoona ezaasikaga ebigaali, baitu akasigaho ezirukumara kusika ebigaali kikumi.

⁵Abasiriya aba Damasiko obubaizire kukonyera Hadadezeeri omukama wa Zoba, omukama Daudi yabaitamu abasaija mitwaro ebiri omu nkumi ibiri;

⁶yata abalinzi omurubuga Damasiko orw'omunsi Siriya; Abasiriya baafooka batungwa be, baatandika kumuha omusoro; hoona nambere yakagendaga, MUKAMA yamuhaga obusinguzi.

⁷Daudi yahamba engabu eza zaabbu abaheereza aba Hadadezeeri ezi bakaba bainazo, yazitwara Yerusaalemu.

⁸Kandi Beta na Berasayi, embuga eza Hadadezeeri, akanyagamu omulinga mwingi.

⁹Toyi omukama wa Hamasi obuyahuliire ngu Daudi, ihe rya Hadadezeeri ryona alisinguliire kimu,

¹⁰yatumira omukama Daudi omutabani Yoramu, amuramukye, kandi amusiime, habw'okurwanisa Hadadezeeri akamusingura; habwokuba Hadadezeeri akaba arwanisize Toyi emirundi nyingi. Yoramu yatwara ebintu eby'efeeza, eby'ezaabbu n'eby'omulinga;

¹¹ebi nabyo hamu n'efeeza n'ezaabbu ei yaihire omumahanga goona aga yasingwire, omukama Daudi yabihongera MUKAMA,

¹²ebiyaihire Edomu, Mowabbu, ebiyaihireho Abamooni, Abafirisiti, Abamaleki, na ha munyago oguyanyagireho Hadadezeeri mutabani wa Rrehobu omukama wa Zoba.

¹³Daudi obuyagarukire, amazire kwita aba Edomu omutwaro gumu n'akanaana omukihanga eky'ekisura, yafooka muntu omurangwibara.

¹⁴Edomu yoona yagitamu abaserikale ab'okulinda, Abeedomu baafooka batungwa be. Daudi hoona nambere yakagenzire, MUKAMA yamuhaga obusinguzi.

¹⁵Daudi nukwo yalemere Isirairi ati; yalemesa obulyo n'obwinganiza.

¹⁶Yowabbu mutabani wa Zeruya nuwe yaragiraga ihe; kandi Yehosofaati mutabani wa Ahirudi, akaba ali muhandiiki w'amakuru;

¹⁷Zadooki mutabani wa Ahitubu, na Ahimereki mutabani wa Abyasara, bali banyakatagara; Seraaya akaba ali muhandiiki w'orukurato;

¹⁸Bbenaaya mutabani wa Yehoyaada nuwe yarolerraga abakeresi n'abapaasa, kandi batabani ba Daudi nubo bakaba bali banyakatagara.