Read Runyoro - rutooro 2 Sam 9 Bible Online

2 Sam 9 - Runyoro - rutooro bible

2 Sam 9

¹Daudi akakaguza ati: “Hakyaroho omuntu ow'enju ya Saulo anyakusigaireho, mmugirre embabazi habwa Yonasaani?”

²Omukasumi ako, hakaba haroho omuheereza ow'enju ya Saulo, ibara lye Ziba, baamweta, yahikaho Daudi; omukama yamukaguza ati: “Niiwe Ziba?” Oli yagarukamu ati: “Nyowe omwiru wawe, ninyowe Ziba.”

³Omukama yamukaguza ati: “Tihakyaliyo muntu ondi ow'enju ya Saulo, mmugirre embabazi za Ruhanga?” Ziba yagarukamu omukama ati: “Hakyaroho mutabani wa Yonasaani; omuntu ogu mulema.”

⁴Omukama yakaguza Ziba ati: “Araha?” Ziba yagarukamu omukama ati: “Ali Lodeba omunju ya Makiri.”

⁵Nubwo Daudi yatuma abantu, baihe Yonasaani Lodeba omunju ya Makiri mutabani wa Amyeri, bamuleete.

⁶Mefibboseesi mutabani wa Yonasaani, Yonasaani mutabani wa Saulo, yahikaho Daudi yajuumara omumaiso ge, yamutamu ekitiinisa. Daudi yamweta ati: “Mefibboseesi!” Mefibboseesi yayetebuka ati: “Taata, ndi hanu nyowe omwiru wawe.”

⁷Daudi yamugambira ati: “Oleka kutiina; ninyija kukugirra embabazi habwa sso Yonasaani; ensi ya Sso Saulo yoona, ninyija kugikugarurra; kandi turaalyaga hamu ha meeza yange.”

⁸Mefibboseesi yainama yagamba ati: “Nyowe omwiru wawe, ninyowe oha, iwe kukorra ebirungi embwa nka nyowe, eyafiire ira?”

⁹Nubwo omukama Daudi yayesire Ziba yamugambira ati: “Ebintu bya Saulo byona n'ebyeka ye, mbigaruliire mutabani wa mukama wawe.

¹⁰Iwe na batabani bawe, n'abairu bawe mumulimire ensi, mumuleetere ebyokulya, nukwo mutabani wa mukama wawe alye; baitu Mefibboseesi mutabani wa mukama wawe araalyaga na nyowe ha meeza yange.”

¹¹Nubwo Ziba yagarukamu omukama ati: “Mukama wange, byona ebyondagiire nyowe omwiru wawe, ninyija kubikora.” Mefibboseesi nukwo kutandika kuliira ha meeza ya Daudi, nkoomu ha batabani be.

¹²Mefibboseesi akaba aina omutabani, omuto, ibara lye Mika. Boona abaikaraga omunju ya Ziba, baba bairu ba Mefibboseesi.

¹³Mefibboseesi nukwo yaikaire ati Yerusaalemu; yalyaga ha meeza y'omukama, kandi kunu akaba ali mulema.