Read Runyoro - rutooro 1 Bakam 1 Bible Online

1 Bakam 1 - Runyoro - rutooro bible

1 Bakam 1

¹Omu kasumi ako, Daudi omukama akaba akuzire muno agundagunzire, abaheereza be noobu baamuswekaga bulangiti, akaba atarukusobora kutagata.

²Abaheereza be abo nukwo kumuhanurra bati: “Ka tukuserurre omwisiki omuto akuheereze, akurolerre; araale na iwe, akutagase.”

³Aho baaserra omwisiki anyakusemiire omu Isirairi yoona, baazoora Abisaagi Omusunamu, baamuleetera omukama.

⁴Omwisiki ogu akaba asemiire muno; yatandika kurolerra omukama n'okumuheereza. Baitu omukama atamumanye.

⁵Aho Adoniya mutabani wa Hagisi yayekuza naagamba ati: “Ninyowe ndukwija kulya obukama;” yayeteekaniriza ebigaali, abatembi b'embaraasi, n'abasaija amakumi ataano ab'okumwebemberaga.

⁶Ise akaba atakamubiihizaahoga omurundi na gumu, naamukaguza ati: “Kiki ekikukoleze oti n'oti?” Kandi na uwe, akaba ali musaija anyakusemiire; nuwe yakurasire Abusalomu,

⁷Akabaza na Yowabbu mutabani wa Zerwiya, n'Abyasara nyakatagara; baamuhondera baamukonyera.

⁸Baitu Zadoki nyakatagara, Benaaya mutabani wa Yehoyaada, Nasani nyakatagara, Simeyi, Leyi, n'abasaija ba Daudi ab'amaani, bakaba batarukusagika Adoniya.

⁹Adoniya akatamba entaama, enimi, n'endaawa haihi n'ibaale ery'enjoka Zohereesi erikaba liri haihi na Enirogeri, yaraaliza bagenzi be batabani b'omukama, n'abanyoro boona aba Yuda,

¹⁰baitu Nasani omurangi, Benaaya, abasaija ab'amaani, na Solomooni owanyina atabaraalize.

¹¹Nubwo Nasani yakagwize Besiseba nyina Solomooni ati: “Tokahuliire Adoniya mutabani wa Hagisi nkooku aliire obukama, kandi Daudi omukama waitu, eki nkooku atakakimanyire?

¹²Habweki nu, ija nkucwere amagezi nukwo otabule obwomeezi bwawe n'obwa mutabani wawe Solomooni.

¹³Genda bwango hali omukama Daudi omukaguze oti: ‘Mukama wange omukama, otarahire nyowe omuzaana wawe noogamba oti: Mutabani wawe Solomooni alirya obukama, nyowe ntakyaroho, nubwo aliikarra ha kitebe kyange?’ Kandi hati, Adoniya asobora ata kuba mukama?

¹⁴Hati obu oraaba nokyabaza n'omukama, na nyowe ndaija ngumye ebi orukugamba.”

¹⁵Aho Besiseba yagenda omu kisiika ky'omukama (omu kasumi ako, omukama akaba akuzire muno, kandi Abisaagi Omusunamu, nuwe akaba naamuheereza)

¹⁶Besiseba yainama omumaiso g'omukama, omukama yamukaguza ati: “Nooyenda ki?”

¹⁷Besiseba yagarukamu ati: “Mukama wange, okandahira nyowe omuzaana wawe, noorahira MUKAMA Ruhanga wawe oti: Mutabani wange Solomooni, alirya obukama, nyowe ntakyaroho, nubwo aliikarra ha kitebe kyange.

¹⁸Hati nu waitu, iwe noobu oraaba otakakimanyire, Adoniya nuwe mukama.

¹⁹Atambire enimi, esajwa, n'entaama ebitarukubarwa, kandi araaliize batabani b'omukama boona: Abyasara nyakatagara, Yowabbu engabwa y'ihe, baitu Solomooni omuheereza wawe tamuraaliize.

²⁰Hati, mukama wange Agutamba, Abaisirairi boona bakuhangire amaiso, niiwe obagambire ow'alikarra ha kitebe kyawe, iwe otakyaroho.

²¹Obu otaakole oti, obu olifa baaswenkuru nkooku baafiire, ekiribaho, nyowe na mutabani wange Solomooni, abantu balitweta beemi.”

²²Besiseba obu akaba naakyabaza n'omukama, Nasani omurangi yahika.

²³Abantu baagambira omukama ngu: “Nasani omurangi ngunu ali hanu.” Nasani obu yahikire omumaiso g'omukama, yainama, yajuumara hansi,

²⁴yakaguza ati: “Agutamba, okagamba oti: ‘Adoniya alirya obukama, nyowe ntakyaroho, nuwe aliikarra ha kitebe kyange’?

²⁵Habwokuba kiro kinu, ahongere: enumi, esajwa, n'entaama ebitarukubarwa, araaliize batabani b'omukama bomu Yowabbu omuddumizi w'amahe, Abyasara nyakatagara, dora hati, nibalya kandi nibanywa, nibahangiriza omumaiso ge ni bagamba bati: ‘Hangiriza omukama Adoniya.’

²⁶Baitu nyowe, omwiru wawe, Zadoki nyakatagara, Benaaya mutabani wa Yehoyaada n'omuhereza wawe Solomooni taturaalize.

²⁷Ekintu kinu kikozirwe iwe mukama wange omukama, kandi itwe abairu bawe tiwatugambira ow'aliikarra ha kitebe kyawe iwe otakyaroho?”

²⁸Omukama Daudi yagarukamu ati: “Munyetere Besiseba.” Besiseba yaija yayemerra omumaiso g'omukama.

²⁹Omukama yarahira naagamba ati: “Ndahiire Ruhanga omwomeezi, ayanjunire emihito yange yoona,

³⁰nkooku nakurahiire MUKAMA Ruhanga owa Isirairi, nagamba nti: mutabani wawe Solomooni nuwe alirya obukama nyowe mmazire kurugaho, kandi nuwe aliikarra ekitebe kyange eky'obukama; ninyija kukikora kiro kya hati.”

³¹Aho Besiseba yajuumara yagamba omukama ati: “Hangiriza Mukama wange Daudi!”

³²Omukama Daudi yagaruka yagamba ati: “Munyetere Zadoki nyakatagara, Nasani omurangi, na Benaaya mutabani wa Yehoyaada.” Obu baizire omumaiso g'omukama,

³³yabagambira ati: “Mukwate abaheereza ba mukama wanyu, mutembye Solomooni mutabani wange ha nyumbu yange yonyini, mumutwale Gihoni;

³⁴Zadoki nyakatagara na Nasani omurangi, bamuseeseho amagita, abe mukama wa Isirairi; hanyuma muteere engwara, mugambe muti: ‘Hangiriza omukama Solomooni!’

³⁵Mumuleete hanu, asinge ha kitebe kyange eky'obukama; habwokuba nuwe arukwija kuba mukama ow'araagaruka omu kiikaro kyange; mmukomere aleme Isirairi n'oruganda rwa Yuda.”

³⁶Benaaya mutabani wa Yehoyaada yagarukamu omukama ati: “Nukwo kibe! MUKAMA Ruhanga wa MUKAMA wange na uwe nukwo akigumye.

³⁷MUKAMA nkooku abaire na mukama wange omukama, nukwo abe na Solomooni ati, nookukiraho, akuze obukama bwe okukira nkooku yakulize obwa mukama wange Daudi.”

³⁸Zadoki nyakatagara, Nasani omurangi, Benaaya mutabani wa Yehoyaada, Abakeresi, n'Abapereti, baagenda, baatembya Solomooni ha nyumbu y'omukama Daudi, baamutwara Gihoni.

³⁹Oku Zadoki nyakatagara nuho yaihiire omu heema ihembe ery'amagita, yagaseesaho Solomooni.

⁴⁰Abantu boona baamukuraatira nibateera endere, baijwire okusemererwa n'omuhimbo, etoko yabo yararra kwata ensi.

⁴¹Adoniya n'abagenyi boona abakaba bali na uwe, obu bakaba nibamaliriza kulya, etoko egi bakagihurra. Yowabbu obu yahulire iraka ly'engwara yakaguza ati: “Akoogo ako koona akanyakuli omu rubuga kaaki?”

⁴²Obu akaba naakyabaza, Yonasani mutabani w'Abyasara nyakatagara yaija; Adoniya yamweta yagamba ati: “Kaije otaahe, oli muntu murungi, kandi otuleetiire amakuru amarungi.”

⁴³Yonasani yagarukamu Adoniya ati: “Nangwa, tindesire makuru marungi, habwokuba mukama waitu Daudi, Solomooni nuwe afoire mukama;

⁴⁴atumire Zadoki nyakatagara, Nasani omurangi, Benaaya mutabani wa Yehoyaada, Abakeresi n'Abapaasa; bamutembeze enyumbu y'omukama;

⁴⁵Zadoki nyakatagara na Nasani omurangi baamuseesaho amagita omu kiikaro Gihoni baamufoora mukama; barugire oku baijwire omuhimbo nuko akoogo ako aka orukuhurra akanyakuli omu rubuga.

⁴⁶Solomooni nuwe atiire engoma: hati nuwe mukama.

⁴⁷Kandi ekindi, abaheereza b'omukama baizire kusiima mukama waitu Daudi nibagamba bati: ‘Ruhanga wawe afoole Solomooni murangaanwa okukira iwe, kandi n'obukama bwe bube bw'obusinge okukira obwawe’; omukama Daudi yainama ha kitabu kye, yayesengereza

⁴⁸naagamba ati: ‘MUKAMA Ruhanga owa Isirairi, anyakwikiriize kiro kya hati omu ha baana bange kwikarra ha kitebe kyange eky'obukama, akugizibwe eki nanyowe nakyeerorra n'amaiso gange.’ ”

⁴⁹Nubwo abagenyi b'Adoniya boona baatukumiire, baimuka, buli muntu yatoma ogwe.

⁵⁰Adoniya akatiina Solomooni; akaimuka yagenda yakwata amahembe g'itambiro.

⁵¹Omukama Solomooni bakamugambira ngu: “Adoniya naakutiina, kandi ngu akwasire ha mahembe g'itambiro naagamba ati: ‘Omukama Solomooni abanze andahire nyowe omwiru we nkooku atalinyisa empirima.’ ”

⁵²Solomooni yagamba ati: “Obu araaba ali muntu murungi, taakorweho kabi; baitu obu araaba ali mubi, araitwa.”

⁵³Aho omukama Solomooni yatuma abantu, baiha Adoniya ha itambiro. Yaija yainama omumaiso g'omukama Solomooni, Solomooni yamugambira ati: “Weetaahire omuka yawe.”