Read Runyoro - rutooro 1 Bakam 10 Bible Online

1 Bakam 10 - Runyoro - rutooro bible

1 Bakam 10

¹Omukamakati owa Sebba obu yahuliire Solomooni nkooku arukuranganwa muno habw'ibara lya MUKAMA, yaija kumulengesa, naamukaguza ebikaguzo ebigumire.

²Akahika Yerusaalemu, aina abantu baingi muno abamusendekeriize, aina engamiya ezeetwekere ebintu ebirukuboya, ezaabbu nyingi muno n'amabaale ag'omuhendo; obu yahikireho omukama Solomooni, akamugambira kyona ekikaba kimuli ha mutima.

³Solomooni yamugarukamu byona ebi yamukagwize; hatabeho na kimu ekyayesobere omukama, eki atarasoboire kumusoborra.

⁴Omukamakati owa Sebba obu yaboine amagezi ga Solomooni agarukwingana aho, aboine enju ei yayombekere,

⁵ebyokulya ebya ha meeza ye, omulingo abanyoro be baikaliiremu, abaheereza be nkooku barukuheereza, ebyokujwara ebi bajwaire, abarukutwara ebikopo bye, ebihongwa bye eby'okwokya ebi yahongaga omunju ya MUKAMA, yahunirra muno.

⁶Omukamakati yagambira omukama ati: “Byona ebi nahuliire omu nsi yange ha mirimo yawe na ha magezi gawe, bikaba by'amazima,

⁷baitu ntabiikirize bwango, okuhika obu nakaizire nabyeerorra nyenka; baitu haroho ekintu eki batarangambiire; amagezi gawe n'obusinge bwawe, nibikiraho ebi bangambiire.

⁸Abantu baawe ka bakahiirwa! Abaheereza bawe banu, abaikara butoosa omumaiso gawe nibahurra amagezi gawe, nabo ka bahiirwa!

⁹MUKAMA Ruhanga wawe ayakugondeze, yakuta ha kitebe eky'obukama ekya Isirairi, ahaisanizibwe! Habwokuba MUKAMA akagonza Isirairi obusinge bwona, nukwo kukufoora mukama, ocwege emisango ey'obwinganiza, n'ogendera ha bulyo.”

¹⁰Hanyuma yarabuka omukama talenta kikumi n'abiri ez'ezaabbu, ebintu bingi ebirukuboya n'amabaale ag'omuhendo; Solomooni atagaruke kutunga ebintu ebirukuboya ebingi muno nk'ebi, ebirukwingana ebi yahairwe omukamakati owa Sebba.

¹¹Kandi meeri eza Hiramu ezaasombaga ezaabbu nizigiiha Ofira, zaihayoga n'embaaho ez'alumunungi, n'amabaale ag'omuhendo.

¹²Omu mbaaho ezi ez'alumunungi, omukama akakoramu enyomyo ez'okuhangiza enju ya MUKAMA n'ey'omukama, enanga n'endongo ez'abazini; emiti ey'alumunungi nk'egi, etagaruke kwija kandi etagaruke kurorwa okuhika na hati.

¹³Omukama Solomooni, akaha omukamakati wa Sebba byona ebi yagondeze, kyona eki yakasabire, otabaliiremu omukama ebi yamuhaire habw'okugonza kwe atabimusabire. Aho yaimuka yagaruka omunsi ye, hamu n'abaheereza be.

¹⁴Ezaabbu omukama Solomooni ei yatungaga buli mwaka, yahikaga talenta rukaaga omu nkaaga na mukaaga,

¹⁵otabaliireho egi eyaleetwaga abasuubuzi n'eyaleetwaga ebyoma by'abasuubuzi, eyarugaga omu bakama b'Arabiya, n'omu balemi b'ensi abakuru.

¹⁶Omukama Solomooni, akakora engabu enkooto ez'ezaabbu ebikumi bibiri, buli emu ekagendwamu ezaabbu erukuhikya sekeri rukaaga.

¹⁷Kandi yagaruka yakora n'ezindi ebikumi bisatu enke, nazo za zaabbu; buli emu ekagendwamu miina isatu ez'ezaabbu; ezi omukama akaita omunju eyayombekisiibwe enyomyo ezaatemerwe omu kibira ekya Lebanoni.

¹⁸Kandi omukama yakora ekitebe eky'obukama kikooto eky'isanga, yakisiiga ezaabbu enungi.

¹⁹Ekitebe ky'obukama eki, kikaba kiina amatembero mukaaga, enyuma yakyo, hakaba haliyo ekisisani eky'omutwe gw'enyana, kandi ha mbaju zombi, hakaba haliyo eky'okutaho emikono, n'ekisisani eky'entale ibiri zeemeriire haihi n'ebintu biri eby'okutaho emikono,

²⁰n'ebisisani by'entale ebindi ikumi na bibiri byemeriire, buli kimu kiri itembero ha lirukugarukira, ha matembero ago omukaaga, Omu makama agandi, ekitebe nk'eki, kikaba kitakakorwahoga.

²¹Embonekyo z'omukama Solomooni zoona, zikaba ziri z'ezaabbu, kandi ebikopo byona eby'omunju eyayombekerwe n'enyomyo ezaatemerwe omu kibira ekya Lebanoni, bikaba biri by'ezaabbu enungi; hakaba hataroho eky'efeeza, omu businge bw'omukama Solomooni, efeeza kikaba kitali kintu ekirukumanywa.

²²Omukama akaba aina emeeri eza Tarasiisi ezaikaraga ha nyanja, hamu n'emeeri eza Hiramu. Omurundi gumu buli myaka esatu, emeeri eza Tarasiisi, nubwo zaijaga zireeta: ezaabbu, efeeza, amasanga, enkerebe, n'enyonyi enungi.

²³Omukama Solomooni nukwo yakirize ati abakama boona ab'ensi itungo n'amagezi.

²⁴Ensi yoona yayegombaga kurora Solomooni, ehurre amagezi ge MUKAMA aga yamuhaire.

²⁵Buli muntu, yaleetaga ekisembo: ebintu eby'efeeza n'ezaabbu, eby'okujwara, ebintu ebirukuboya, embaraasi n'enyumbu, baaleetaga bingi buli mwaka.

²⁶Solomooni akasorooza ebigaali n'abatembi b'embaraasi; akaba aina ebigaali omutwaro gumu omu nkumi ibiri, n'abatembi b'embaraasi, na bo omutwaro gumu n'enkumi ibiri, abo akabata omu mbuga ezaikarwamuga ebigaali hamu n'omukama omu rubuga Yerusaalemu.

²⁷Omukama, omu rubuga Yerusaalemu, efeeza akagifoora kintu kya butoosa nk'amabaale, kandi emikogoto akagikanyisa muno nk'emisikamooli eya Sefera.

²⁸Embaraasi Solomooni ezi akaba ainazo, zaarugaga omunsi Misiri na Sirisia, kandi abasuubuzi b'omukama nubo baaziguraga Sirisia.

²⁹Ekigaali kimu ekyarugaga Misiri, kyaheerwaga sekeri rukaaga ez'efeeza, kandi embaraasi sekeri kikumi mu ataano; habweki abasuubuzi b'omukama, ebi nubo baabihikyahoga abakama boona ab'Abahiiti, n'abakama aba Siriya.