Read Runyoro - rutooro 1 Bakam 11 Bible Online

1 Bakam 11 - Runyoro - rutooro bible

1 Bakam 11

¹Omukama Solomooni akagonza muno abakazi abanyamahanga otabaliireho muhara wa Faraaho omukama wa Misiri, akaswera: Abamowabbu, Abamooni, Abeedomu, Abasidoni, n'Abahiiti,

²abakazi akabaswera omu mahanga MUKAMA aga yatangire Abaisirairi kuswera naagamba ati: “Mutaliswerrana n'abantu abo, habwokuba, nibaija kubahindura emitima, mwemarre ha baaruhanga baabo”; Solomooni akagonza muno abakazi abo.

³Akaswera abakazi ababiitokati rusanju, abazaana bikumi bisatu.

⁴Habwokuba Solomooni obu yagurusire, bakazi be bakamuhindura omutima yayemarra hali baaruhanga baabo; ateesigire kimu MUKAMA Ruhanga nka ise Daudi oku yakoraga.

⁵Solomooni akaramya Asitarosi embandwa y'Abasidoni, na Mirikomu embandwa ekinugwa ey'Abamooni,

⁶Solomooni nukwo yakozire ati ebirukubiihiza MUKAMA, tiyamuhondera nka ise Daudi oku yakozire.

⁷Nukwo kwombekera Kemosi ekinugwa eky'Abamowabbu na Moleki ekinugwa ky'Abamooni itambiro, ha rusozi Yerusaalemu.

⁸Eki akakikorra bakazi be boona abanyamahanga, abacumiikirraga obubbani kandi abaatambiraga baaruhanga baabo.

⁹MUKAMA nukwo kubiihirirwa Solomooni, habwokuba omutima gwe akaba agwihireho MUKAMA Ruhanga wa Isirairi ow'akaba amubonekiire kabiri,

¹⁰MUKAMA Ruhanga wa Isirairi noobu aliba yabonekiire Solomooni kabiri, yamuteererra kutaramya baaruhanga abanyamahanga, atamuhurre.

¹¹MUKAMA nukwo kumugambira ati: “Kinu nkooku wakigenderiire wacwa endagaano yange ei naragaine na iwe tiwakwata biragiro byange, mananukwo, obukama ninyija kubukwihaho, mbuhe omwiru wawe.

¹²Baitu kandi habwa Sso Daudi, eki tindikikora omu businge bwawe, baitu ndibwihaho mutabani wawe.

¹³Obukama bwona tindibwihiraho kimu; baitu oruganda orumu, ndiruha mutabani wawe, habwa Daudi omwiru wange, na habwa Yerusaalemu ei nayekomiire.”

¹⁴MUKAMA yaimukya Hadadi omwedomu, arwanise Solomooni, Hadadi ogu akaba ali w'ekitabu ky'omukama.

¹⁵Habwokuba Daudi obu akaba ali omunsi Edomu, kandi Yowabbu engabwa y'ihe obu yagendaga kuziika abaisirwe, abasaija boona ab'omunsi Edomu, yabaitaga.

¹⁶(Habwokuba Yowabbu n'Abaisirairi boona bakamarayo ameezi mukaaga okuhika obu yakahwerekeriize abasaija boona aba Edomu).

¹⁷Okwihaho Hadadi, hamu n'Aba Edomu abamu abairu ba ise nubo baasingirwe Misiri, omu kasumi ako, Hadadi akaba akyali mwana muto atakahikize omwaka gumu.

¹⁸Baimukya baaruga Midiyani baagenda Parani, Parani baihayo abasaija, baabatwara mb'omukama Faraaho omukama wa Misiri ayabahaire enju, ebyokulya, n'ensi.

¹⁹Hadadi yaganjana n'omukama, omukama nukwo kumusweza muramu we kizaarwa na mukazi we wonyini, nuwe owanyina Tapeneesi omugo.

²⁰Owanyina Tapeneesi yazigaija omwana omwojo, ibara lye Genubasi, Tapeneesi ou yacuukuliire omba Faraaho, Tapeneesi akakurra omba Faraaho, hamu n'abaana be.

²¹Baitu Hadadi obu yahuliire ali omunsi Misiri, ngu Daudi akafa, Yowabbu engabwa y'ihe na we ngu akafa, yagambira Faraaho ati: “Onyikirize nduge hanu, ngaruke omunsi y'owaitu.”

²²Baitu Faraaho yamukaguza ati: “Nkakwima ki, hati eki orukusigikiraho kwenda kugaruka omunsi y'owanyu?” Hadadi yagarukamu omukama ati: “Iwe ba kunyikiriza ngende.”

²³Kandi Ruhanga yagaruka yamwimukiza omunyanzigwa ow'okumurwanisa, ibara lye nuwe Rezoni, mutabani wa Eliyada, ow'akaba airukireho mukama we Hedadezeri, omukama wa Zooba

²⁴yamusoroolezaaho abantu yafooka mwebembezi w'ekitebe ky'abahuura, abantu abaaserraga eby'okunyaga, eki kikabaho, Daudi amazire kusingura Hedadezeri n'okwita banywani be Abasiriya; baagenda Damasiko, nuho baikara, baamufoora mukama wa Damasiko.

²⁵Ha businge bwa Solomooni bwona, Resoni akarwanisa Abaisirairi.

²⁶Yerobbowamu mutabani wa Nebati omu Efuraimu owa Zerada omwiru wa Solomooni, ayazaarwaga omukazi ibara lye Zerwa, omufaakati, na we akarwanisa omukama.

²⁷Bunu nubwo obulyo obu yasigikiireho okurwanisa omukama. Solomooni akombeka Miilo, yaigara ekihuru eky'orubuga rwa Daudi ise.

²⁸Omusaija Yerobbowamu ogu, akaba ali munyamagezi muno, Solomooni obu yaboine omusigazi ogu nkooku akaba ali mwekambi, yamuha okurolerra emirimo yoona ey'omunju ya Yosefu.

²⁹Omu kasumi Yerobbowamu aka yarugiiremu Yerusaalemu, omurangi Ahija omusilatoni akamusanga ha ruguudo. Obu Ahija akaba ajwaire orugoye oruhyaka abantu ababiri abo, bakaba bali bonka omu bwerre.

³⁰Ahija yakwata orugoye rwe oruhyaaka oru akaba ajwaire, yarutaaguramu obukoba ikumi na bubiri.

³¹Yagambira Yerobbowamu ati “Iwe otwaleho obukoba 10, habwokuba MUKAMA Ruhanga owa Isirairi, agambire ati: Solomooni ndi haihi kumwiha ha bukama, iwe nkuhe enganda ikumi,

³²(baitu araasigazaaho oruganda rumu habw'omwiru Daudi, na habwa Yerusaalemu orubuga oru nayegomboize omu nganda zoona eza Isirairi).

³³Habwokuba akannaga-akanfuruka, yaramya Asitarosi ruhanga w'Abasidoni, Kemosi ruhanga ow'Abamowabbu, na Mirikomu ruhanga ow'Abamooni, atakole ebi ngonza, atakwate ebiragiro byange n'ebigambo byange nka ise Daudi oku yakoraga.

³⁴Baitu nabwo, obukama bwona, tindukwija kubumwihiraho kimu; habw'omwiru wange Daudi ou nayekomiire, ayakwataga ebiragiro byange n'ebigambo byange, ndimufoora mulemi obwomeezi bwe bwona;

³⁵obukama obu ndibumwihaho mbuhe inywe enganda ikumi.

³⁶Baitu omwana we, ndimuha oruganda rumu, nukwo obutoosa mbege n'omwijukuru ow'omwiru wange Daudi arukulema Yerusaalemu, orubuga oru nayegomboize, rube kiikaro eki ndaaramizibwamuga.

³⁷Ninyija kukutwara, oleme boona ab'orukwenda, olirema Isirairi yoona.

³⁸Obu olihikiriza byona ebi ndikuragira, okakwata ekirale kyange, okakora ebi ngonza, okakwata ebiragiro n'ebigambo byange, omwiru wange Daudi nkooku yakoraga, ndaikaraga na iwe, ndikufoora mukama owa Isirairi, kandi nditaho omutima nkooku nakoliire Daudi baijukuru bawe baleme, iwe otakyaroho, omazire kurugaho.

³⁹Habw'ekibi kya Solomooni, ndifubira baijukuru ba Daudi, baitu tindibabonesa obusinge bwona.”

⁴⁰Solomooni akagonza kwita Yerobbowamu; baitu Yerobbowamu yasiingirwa Misiri omba Sisaki omukama wa Misiri, oku nuho yaikaire okuhika Solomooni obu yafiire.

⁴¹Ebindi byona Solomooni ebi yakozire, obwomeezi bwe bwona, n'amagezi ge, byona bikahandiikwa omu kitabu ekinyakwetwa ky'Ebyafaayo bya Solomooni.

⁴²Akasumi aka yalemiire Isirairi omu rubuga Yerusaalemu, ekaba emyaka amakumi ana.

⁴³Akafa nka baisenkuru oku baafiire, yaziikwa omu rubuga rwa Daudi ise, omutabani Rehobbowamu yateera engoma omu kiikaro kye.