Read Runyoro - rutooro 1 Bakam 12 Bible Online

1 Bakam 12 - Runyoro - rutooro bible

1 Bakam 12

¹Rehobbowamu akagenda Sekemu, habwokuba Abaisirairi nuho bakaba beesorooliize bamufoole mukama.

²Yerobbowamu mutabani wa Nebati obu yahuliire eki, (habwokuba omu kasumi ako akaba akyali Misiri, nambere akaba asiingiirwe nukwo ayesereke Solomooni), Misiri yarugayo.

³Baatuma abantu bamweete; Yerobbowamu n'ekitebe kyona eky'abantu ba Isirairi kyaija, baagambira Rehobbowamu bati:

⁴“Sso akatukwata kubi, yatutaho ebigumire bingi. Hati, iwe obu oratukwata kurungi, okatwihaho ebirukutulemeera, nitwija kuba batungwa bawe abeesigwa.”

⁵Rehobbowamu yabagarukamu ati: “Mugende mumaleyo ebiro bisatu, nukwo mugaruke hanu.” Abantu nabo baagenda.

⁶Nubwo omukama Rehobbowamu yayehanwize n'abasaija abakaba bali bahabuzi ba ise Solomooni atakafiire, yabakaguza ati: “Abantu abo mbagarukemu ki?”

⁷Baamugarukamu bati: “Kiro kinu, obu oraayefoora mwiru ha bantu abo, okabaheereza, okababaliza kurungi, okabagarukamu n'embabazi, obu nubwo baliba bairu bawe obusinge bwona.”

⁸Baitu uwe, abasaija abakuru ebi baamugambiire, akabigaya, yakwata ebi yagambiirwe abasigazi aba akaba akuzire na bo, abakaba nibamuhabura.

⁹Yabakaguza ati: “Nimumpa magezi ki, abantu abo abanyakungambire bati: ‘otworobeze ebigumire Sso ebi yatutwekere, mbagarukemu nta’?”

¹⁰Abasigazi aba akaba akuzire na bo, baamugarukamu bati: “Abantu abo obagarukemu oti: ‘Sso akatukwata kubi, baitu iwe otukwate kurungi; ekindi’, obagarukemu oti: ‘Akaara kange akaheereera, nikakira ebibero bya isenyowe.

¹¹Isenyowe akabakwata kubi, leero nyowe ninyija kubakwata kubi kukiraho. Isenyowe akabafubira naabateera enkoba, baitu nyowe ndaabafubira nimbarumisa enge.’ ”

¹²Ha kiro ekya kasatu, Yerobbowamu n'abantu boona, baagenda omba Rehobbowamu, nkooku omukama yagambire ati: “Mugaruke ha kiro kya kasatu.”

¹³Omukama abantu abo yabakayukira, yagaya amagezi abasaija abakuru aga baamuhaire.

¹⁴Yababaliza abasigazi ebi baamuhabwire, naagamba ati: “Isenyowe akabakwata kubi, nyowe ninyija kubakwata kubi kukiraho. Isenyowe akabafubira naabateeza enkoba, nyowe ndaabafubira nimbarumisa enge.”

¹⁵Omukama abantu abo atabahurre; eki kikaruga hali MUKAMA, nukwo ahikirize eki yatumire Ahija Omusiiro, akigambire Yerobbowamu mutabani wa Nebati.

¹⁶Abaisirairi boona obu baaboine omukama nkooku atarukwenda kubahuliriza, baamukaguza bati: “Mugabo ki ogu twina na Daudi? Titwina bugwetwa ha mwana wa Yesse. Abaisirairi mugaruke omu heema zanyu! Iwe Daudi, ote amaiso ha ka yawe.” Aho Abaisirairi baagenda omu heema zaabo.

¹⁷Rehobbowamu nuwe yalemere abantu abakaba bali omu mbuga za Yuda.

¹⁸Nubwo omukama Rehobbowamu yatumire Adoramu ow'akaba ali mukuru w'emirimo, Abaisirairi baamuteera amabaale, baamwita, omukama Rehobbowamu yatemba bwango ekigali kye, asingirwe Yerusaalemu.

¹⁹Abaisirairi nukwo baayemiire bati enju ya Daudi, okuhika na hati.

²⁰Kandi Abaisirairi boona obu baahuliire ngu Rehobbowamu agarukire, baatuma nibamweta aije omu Rukurato orukuru orw'ihanga, baamufoora mukama ow'okulema Isirairi. Hakaba hataroho n'omu ayakuraatiraga enju ya Daudi, okwihaho oruganda rwa Yuda rwonka.

²¹Rehobbowamu obu yahikire Yerusaalemu, yasorooza ab'enju ya Yuda yoona, n'ab'eya Benyamini, abaserikale abarwani abakomerwe akasiiriira kamu n'emitwaro munaana, barwanise enju ya Isirairi, bagarurre Rehobbowamu mutabani wa Solomooni obukama.

²²Baitu Ruhanga akagambira Semaaya omuntu we ati

²³“Ogambire Rehobbowamu mutabani wa Solomooni omukama wa Yuda, n'ab'enju ya Yuda yoona n'ab'eya Benyamini, n'abandi abasigaireho,

²⁴oti: ‘MUKAMA naabagambira ati: Mutalikisura mukagenda kurwanisa bagenzi banyu Abaisirairi. Buli omu omugarre omuka ye, habwokuba, kinu ninyowe nakikozire.’” Baahurra MUKAMA eki yagambire, baataaha nkooku yabaragiire.

²⁵Yerobbowamu nubwo yayombekere Sekemu omunsi ey'ensozi ey'Efuraimu, oku nuho yaikaire okumara akasumi. Obu yafurukire oku, yagenda Penweri.

²⁶Yerobbowamu akateekereza ati: “Obukama nibwija kugaruka omu nju ya Daudi;

²⁷abantu banu obu baligenda Yerusaalemu kutamba ebyonzira omu nju ya MUKAMA, emitima yabo erigaruka hali Mukama wabo, hali Rehobbowamu mukama wa Yuda. Nyowe balinnyita, nukwo bamugarre.”

²⁸Aho omukama yayehanuuza, yakora enyana eza zaabbu ibiri, nukwo kugambira abantu ati: “Yerusaalemu, mwikara nimugendayo, inywe Abaisirairi murole baaruhanga banyu abaabaihire omunsi Misiri mbabo.”

²⁹Emu yagita Beeseeri, endi yagita Daani.

³⁰Ekintu eki kyaba kibi, habwokuba, abantu baagendaga baramya enyana endi emu eya Beeseeri, n'endi ey'ekaba eri Daani.

³¹Kandi ha mitwe y'ensozi akombekayo ebiikaro eby'okuramizaamu, omu bantu boona yakomamu banyakatagara abakaba batali Baleevi.

³²Yerobbowamu yakora obugenyi ha kiro ekya ikumi na bitaano eby'okwezi kwa munaana, oburukusisana nka buli obu yakoliire omu nsi Yuda, yahonga ebyonzira ha itambiro, na Beeseeri nukwo yakozire, yatambira enyana ibiri ezi akaba akozire.

³³Ha kiro ekya ikumi na bitaano eby'okwezi okwa munaana nukwo okwezi oku yayeteeriireho wenka, nubwo yagenzire ha itambiro eri akaba ayombekere Beeseeri, yakorra abantu ba Isirairi obugenyi, yatemba ha itambiro, acumikirre obubbaani.