Read Runyoro - rutooro 1 Bakam 13 Bible Online

1 Bakam 13 - Runyoro - rutooro bible

1 Bakam 13

¹MUKAMA akaragira omuntu wa Ruhanga aruge omunsi ya Yuda agende Beeseeri. Yerobbowamu obu akaba ayemeriire haihi n'itambiro acumiikiirre obubbaani.

²Omusaija yayamirra itambiro, omukama nkooku yamuragiire, yagamba ati: “Itambiro we, itambiro we, ohurre MUKAMA ebi arukugamba. ‘Omwana omwojo arukwetwa Yosiya, alizaarwa omunju ya Daudi; alikutambiraho banyakatagara ab'ebiikaro ebikuru, abanyakutucumiikiirirraho obubbani, kandi alikwokezaaho amagufa g'abantu.’”

³Ha kiro eki kyonyini, yataho akarorwaho naagamba ati: “Kanu nuko akarorwaho MUKAMA aka yataireho: ‘Itambiro liriseeswa, iju erinyakuliroho liriseeseka.’”

⁴Omukama Yerobbowamu obu yahuliire ebigambo omuntu wa Ruhanga ebi yagambire naayamirra itambiro erya Beeseeri, yagorra emikono ye ali ha itambiro naagamba ati: “Omuntu ogu mumukwate.” Omukono Yerobbowamu ogu yayolekere omuntu wa Ruhanga ogu, gwayoma atasobole kugufunya.

⁵Itambiro lyaseeswa, iju lyaseesekara, nk'akarorwaho kali, omusaija wa Ruhanga aka yagambire, aka yagambiirwe MUKAMA.

⁶Omukama yagambira omuntu wa Ruhanga ati: “Nkwesengeriize, onsabire hali MUKAMA Ruhanga wawe, ankize omukono gwange gunu.” Omuntu wa Ruhanga yayesengereza MUKAMA, omukono gw'omukama gwakira, gwasisana nkooku gukaba guli kara.

⁷Omukama yasaba omuntu wa Ruhanga ati: “Ija tugende hamu, otunge akantu ak'okunagira rugondo, ninyija kukuheera.”

⁸Omuntu wa Ruhanga yagarukamu omukama ati: “Noobu okumpa byona ebi oinabyo omu kicweka ky'itungo lyawe, tindukwija kugenda na iwe, omu kiikaro kinu, tindyemu kyokulya kandi tinywemu maizi;

⁹habwokuba nuwe yandagiire naagamba ati: ‘Otalirya ebyokulya, otalinywa amaizi, kandi otaligarurwa omuhanda ogu watwaire.’”

¹⁰Na uwe nukwo kukwata omuhanda gundi, atagarurwe omuhanda guli, ogwamutwaire Beeseeri.

¹¹Omu kasumi ako Beseeri, hakaba haliyo omurangi omugurusi. Ha kiro eki, batabani be bakaija baamugambira byona omuntu wa Ruhanga ebi akaba akozire Beeseeri, n'ebigambo ebi yagambiire omukama, nabyo baabimugambira.

¹²Isebo yabakaguza ati: “Omuntu ogu yatoma muhanda ki? Baamwoleka omuhanda, omuntu wa Ruhanga ayarugire Yuda ogu yatomere.

¹³Yagambira abaana be ati: Muntandiikire endogoyi.” Baagimutandiikira, yagitemba.

¹⁴Yahondera omuntu wa Ruhanga, yamusanga aikaliire hansi y'omuti omuhomozi; yamukaguza ati: “Niiwe muntu wa Ruhanga ayarugire Yuda? Oli yamugarukamu ati: Ego ninyowe.”

¹⁵Hanyuma yamugambira ati: “Ija tutaahe omuka, olye ebyokulya.”

¹⁶Omusaija wa Ruhanga yagarukamu ati: “Tinsobora kugarukayo na iwe rundi kutaaha omunju hamu na iwe; kandi yagamba ati: Omu kiikaro kinu tindukwija kulyamu byokulya, rundi kunywamu amaizi hamu na iwe;

¹⁷habwokuba MUKAMA akandagira yagamba ati: ‘Oku, otaliryayo ebyokulya kandi otalinywayo amaizi, kandi otaligarurwa omuhanda ogwakutwaire.’”

¹⁸Omusaija wa Ruhanga yagarukamu ati: “Na nyowe ndi murangi nka iwe, malaika wa MUKAMA, nuwe yandagiire naagamba ati: ‘Mugarre omutaahye omunju yawe, alye ebyokulya kandi anywe amaizi.’” Baitu akamubiiha ebisuba.

¹⁹Omurangi omugurusi nukwo kugenda na uwe, yalya ebyokulya omunju ye, yanywa n'amaizi.

²⁰Obu bakaba bakyali ha meeza, MUKAMA yagambira omurangi ayamugarwiire;

²¹omurangi yayeta omuntu wa Ruhanga ayarugire Yuda, yamugambira ati: “Binu nibyo MUKAMA arukugamba: Habwokuba okalema kuhurra ekigambo kya MUKAMA, wayanga kukwata ebiragiro MUKAMA Ruhanga wawe ebi yataireho,

²²wagaruka, walya ebyokulya wanywa n'amaizi omu kiikaro eki yakutangire ati: ‘Otalirya ebyokulya kandi otalinywa amaizi omu kiikaro kinu noija kufa,’ baitu omutumbi gwawe tiguliziikwa omu kituuro ekya baaswenkuru.”

²³Obu yamazire kulya ebyokulya n'okunywa, yatandiikira omurangi ou yagarwire embaraasi.

²⁴Omurangi obu akaba naagenda, yatangaana entale omu muhanda yamwita, omutumbi gwe gwaikara omu muhanda, embaraasi yagwemerra haihi.

²⁵Abantu baarabahoga, nibarora omutumbi gwe nkooku gugwire omu muhanda, n'entale egwemeriire haihi. Baagenda, eki, baakisubirra omu rubuga omurangi omugurusi oru yaikaramuga.

²⁶Omurangi ayamwihire omu muhanda yamugarra obu yakihuliire, yagamba ati: “Omuntu wa Ruhanga nuwe yagayire ekigambo kya MUKAMA, MUKAMA nukwo kumunagira entale enyakumutaagwire yamwita nkooku MUKAMA yamugambiire”,

²⁷yagambira batabani be ati: “Muntandiikire embaraasi, abaana” baagitandiika

²⁸yagenda, yasanga omutumbi gw'omuntu wa Ruhanga gugwire omu muhanda, embaraasi n'entale bigwemeriire haihi. Entale, omutumbi ogu etagulye, n'endogoyi etagisuneho.

²⁹Omurangi yahimba omutumbi gw'omuntu wa Ruhanga, yaguta ha ndogoyi, yagugarra omu rubuga, kugugaragaarra n'okuguziika.

³⁰Omutumbi ogu, yaguziika omu kituuro kye nyabwe; abantu baamulirirra nibagamba bati: “Ai bambi, mugenzi wange!”

³¹Obu yamazire kumuziika, yagambira abatabani ati: “Obu ndifa, munziike omu kituuro omuntu wa Ruhanga eki aziikirwemu.

³²Habwokuba ebigambo MUKAMA ebi yamuragiire kubaza ha itambiro erinyakuli Beeseeri, na ha maju goona ag'omu biikaro eby'okuramizaamu aganyakuli omu mbuga za Samaliya, nibiija kuhikirrakwo.”

³³Eki noobu kyabaireho, omukama Yerobbowamu, atacwe ngeso ze embi, baitu akongera okukoma banyakatagara ab'okukora omu biikaro eby'okuramizaamu; boona abaagonzaaga akabakoma yabeeza babe banyakatagara ab'ebiikaro ebi.

³⁴Ekintu eki ha nju ya Yerobbowamu kikaba kibi muno, nikyo kyagirugiiremu kuhwerekerra ekahwa omunsi.