Read Runyoro - rutooro 1 Bakam 14 Bible Online

1 Bakam 14 - Runyoro - rutooro bible

1 Bakam 14

¹Omu kasumi ako, Abiya mutabani wa Rehobbowamu akarwara.

²Rehobbowamu yagamba mukazi we ati: “Gira oyehindule, oleke kumanyirirwa nkooku oli niiwe muka Rehobbowamu, ogende Siiro; Ahija omurangi ayagambire ngu ndiba mukama wa Isirairi, nuho ali.

³Otwale emigaati ikumi, otwaleho na keeki nke, n'ensoha ey'obwoki bw'enjoki, ogende omuhikeho; naija kukugambira omwana waitu ogu nkooku aliba.”

⁴Muka Yerobbowamu nukwo yakozire; akaimuka yagenda Siiro, yataaha omunju y'Ahija. Omu kasumi ako, Ahiya akaba atakyahweza, amaiso gakaba gaizirwemu oruho habw'obukuru.

⁵MUKAMA akagambira Ahija ati: “Muka Yerobbowamu naija kukwekaguzaaho ha mwana we; habwokuba murwaire. Obu araija, omugambire oti n'oti.” Muka Yerobbowamu obu yaizire, yayefoora nk'omukazi ondi.

⁶Baitu Ahija obu yamuhuliire enswaswa ze ali haihi kuhika ha rwigi, yamugambira ati: “Koowe muka Yerobbowamu; habwaki oyeburanganiza? Ntumirwe kukugambira amakuru amabi.

⁷Ogende ogambire Yerobbowamu oti: ‘MUKAMA Ruhanga owa Isirairi naagamba ati: “Nkakunyumiza nakwiha omu bantu, nakufoora mwebembezi w'abantu bange Abaisirairi,

⁸naiha obukama ha nju ya Daudi nabuha iwe; baitu nabwo, otasisane omwiru wange Daudi, ayakwataga ebiragiro byange; ayankuraatiraga n'omutima gwe gwona; naakora eki kyonka eki ngonza,

⁹baitu iwe, okakora ebibi okukira boona abaakwebembiire, okeekorra baaruhanga abandi, n'ebisisani ebyagiibwe, okambiihiza, wannaga enyuma;

¹⁰habweki, enju yawe ninyija kugireetera akabi, nyite baijukuru bawe aboojo boona, abato n'abakuru. Ninyija kuleetera akabi enju ya Yerobbowamu, mmwihireho kimu abasaija boona, abanyagwa n'abatali banyagwa omu Isirairi, enju ye ngihwerekerereze kimu, nkooku omuntu ayokya obusa, bukasiirirra kimu.

¹¹Omuntu owa Yerobbowamu wena ow'aligwa omu rubuga; ogu aliriibwa embwa; kandi weena ow'aligwa aheeru, alisomwa enyonyi ez'omumwanya; habwokuba eki, MUKAMA nuwe yakigambire.”’

¹²Habweki, imuka ogaruke omuka yawe, obu oraaba noorubata omu rubuga oti, omwana wawe naafa.

¹³Abaisirairi boona nibaija kumuliririrra, kandi bamuziike; habwokuba uwe wenka ha bantu ab'ekika kya Yerobbowamu, nuwe aliziikwa, habwokuba omunju ya Yerobbowamu nuwe azookerwemu ekirukusiimwa MUKAMA, Ruhanga owa Isirairi.

¹⁴Kandi ekindi, MUKAMA, alyeekomera omukama ow'okulema Isirairi, ogu nuwe alihwerekereza enju ya Yerobbowamu omu businge obu.

¹⁵Habweki, MUKAMA naija kuteera Abaisirairi batukumire nk'orubingo oku rutukumizibwa amaizi, abaihe omunsi ye enungi ei yahaire baisenkuru, abararangye obuseeri bwa Eufuraate, habwokuba, bakamubiihiza baayekorra ekisisani eky'omucwezi Aserimu,

¹⁶Naija kubahwamu, habw'ebibi Yerobbowamu ebi yakozire n'ebi yakoleze Abaisirairi abandi.”

¹⁷Nubwo muka Yerobbowamu yaimukire, yakwata omuhanda yagaruka Tiruza, obu akaba naakyahika ha kisa ky'omulyango ogw'enju ye, omwana naafa.

¹⁸Abaisirairi boona baamulirirra kandi baamuziika, MUKAMA nkooku yagambire naaraba omu mwiru we Ahija omurangi.

¹⁹Ebintu ebindi byona omukama Yerobbowamu ebi yakozire, amalemu aga yarwaine, kandi nkooku yalemere, ebi bikahandiikwa omu kitabu eky'obusinge obw'abakama aba Isirairi.

²⁰Akasumi Yerobbowamu aka yalemere, ekahika emyaka makumi abiri n'ebiri; yafa nka baisenkuru oku baafiire yaziikwa, omutabani Nadabu yateera engoma omu kiikaro kye.

²¹Rehobbowamu mutabani wa Solomooni akalema omunsi Yuda nambere yatandikiire kulema, akaba ahikize emyaka amakumi ana na gumu ey'obukuru, akalemera emyaka ikumi na musanju omu rubuga Yerusaalemu, orubuga MUKAMA oru akaba ayekomiire omu nganda za Isirairi zoona, nurwo aramizibwemuga. Ibara lya nyina, nuwe Naama, Omwamooni.

²²Ab'oruganda rwa Yuda bakakora MUKAMA eki atarukwenda, baamubiihiza habw'ebibi ebi bakozire, ebyakizire byona baisenkurubo ebi bakaba baakozire.

²³Habwokuba nabo, bakeeyombekera ebiikaro eby'okuramizaamu embandwa, baabyara enyomyo n'ekisisani ky'Aserimu, ha buli kasozi koona akanyakuraihire, na hansi y'omuti gwona omubisi;

²⁴Lero ihangamura omu biikaro ebi eby'abakafiiri eby'okuramizaamu, hakaba haliyo abasaija n'abakazi, abo omulimo gwabo, gwabaga ogw'ikuuhya. Baakoraga ebintu ebinugwa byona ebyakorwaga amahanga MUKAMA aga yabingire omunsi, Abaisirairi batakagihikiremu.

²⁵Omu mwaka ogwa kataano, ogw'engoma ya Rehobbowamu, Gisaki omukama wa Misiri akaseesira Yerusaalemu;

²⁶yanyaga ebintu eby'omuhendo ebikaba biri omunju ya MUKAMA, n'ebikaba biri omunju y'omukama; yatwara buli kintu, yatwara n'engabu zoona eza zaabbu ezikaba zikozirwe Solomooni

²⁷omukama Rehobbowamu, nukwo kukora engabu ez'omulinga yaigarra omu kiikaro kyazo, yazikwasa bakuru b'abalinzi, abaalindaga omulyango gw'enju y'omukama.

²⁸Buli kasumi, omukama obu yabaga naataaha omunju ya MUKAMA, abalinzi baazihimbaga, baigarra omu kisiika eki zaayahurwamuga.

²⁹Ebintu ebindi Rehobbowamu ebi yakozire, bikahandiikwa omu kitabu eky'obusinge obw'abakama aba Yuda.

³⁰Akasumi ako koona, Rehobbowamu na Yerobbowamu, baikaraga nibarwanisangana.

³¹Rehobbowamu akafa nka baisenkuru oku baafiire yaziikwa omu rubuga rwa Daudi. Ibara lya nyina nuwe akaba ali Naama, Omwamooni mutabani we Abiyamu, yateera engoma omu kiikaro kye.