Read Runyoro - rutooro 1 Bakam 15 Bible Online

1 Bakam 15 - Runyoro - rutooro bible

1 Bakam 15

¹Omu mwaka ogwa munaana ogw'engoma eya Yerobbowamu mutabani wa Nebati, nubwo Abiya yatandikire kulema Yuda omu Yerusaalemu,

²akalemera emyaka esatu. Ibara lya nyina muhara w'Abisalomu yayetwaga Maaka,

³Akakora ebibi bimu mali nka ise ayamwebembiire ebi yakakozire. “Embwa tereka misitamire ya nyinayo”, kandi akaba atali w'amazima mali hali MUKAMA Ruhanga we, nka isenkuru Daudi oku akaba ali.

⁴Baitu MUKAMA habwa Daudi omwiru we, akaha Abiyamu omwana ow'okulema Yerusaalemu n'okugiikaza businge, uwe atakyaroho;

⁵MUKAMA ekyamukoleze eki habwokuba Daudi yakoraga byona ebimusemereza, akaba atakacwaga kiragiro kye na kimu, okwihaho ekigambo kya Uliya omuhiiti.

⁶Rehobbowamu obwomeezi bwe bwona, yaikaraga naarwana na Yerobbowamu.

⁷Ebintu ebindi byona Abiyamu ebi yakozire, bikahandiikwa omu kitabu eky'obusinge bw'abakama ba Yuda. Kandi Abiyamu na Yerobbowamu, nabo bakarwana.

⁸Abiyamu akafa nka baisenkuru oku baafiire; yaziikwa omu rubuga rwa Daudi, Asa omutabani yatera engoma omu kiikaro kye.

⁹Omu mwaka ogw'amakumi abiri ogw'engoma ya Yerobbowamu omukama wa Isirairi, Asa nubwo yatandikire okulema Yuda,

¹⁰akalema Yerusaalemu okumara emyaka ana na gumu. Ibara lya nyina muhara w'Abisalomu yayetwaga Maaka!

¹¹Asa yakoraga kyona ekirukusiimwa MUKAMA, nka isenkuru Daudi oku yakozire.

¹²Akafuuhya engeso ey'ebisuyaga omunsi, yaihaho ebisisani ise ebi akaba akozire.

¹³Yaiha nyina ha bwanyina omukama habwokuba akakorra Asera ekisisani ekinugwa; ekisisani kye, Asa yakitema, yakyokeza ha kasaaru Kidirooni.

¹⁴Asa noobu aliba ataraseesire ebiikaro eby'abakaafiiri eby'okuramizaamu, akaikara ali mwesigwa hali MUKAMA obwomeezi bwe bwona.

¹⁵Akaleeta omunju ya MUKAMA ebisembo ise ebi yahongere okuhikiriza ebi yaragaine, n'ebye nyabwe: efeeza, ezaabbu, n'ebikwato ebindi.

¹⁶Omukama Asa owa Yuda, n'omukama Baasa owa Isirairi bakaikara nibarwanisangana obwomeezi bwabo bwona.

¹⁷Baasa omukama wa Isirairi, akaseesira Yuda yayombeka Rama, nukwo atange abantu boona kuruga rundi kugenda omba Asa omukama wa Yuda.

¹⁸Omukama Asa, nubwo yakwasire efeeza n'ezaabbu yoona eyekaba esigaire omu maahurro g'enju ya MUKAMA, n'omu maahurro ag'enju y'omukama, yagikwasa abaheereza be; yabatuma hali Benihadadi mutabani wa Tabulimooni, Tabulimooni mutabani wa Heziyoni omukama wa Siriya, ayaikaraga Damasiko, naagamba ati;

¹⁹“Tukole endagaano, erukusisana baisiitwe ei baakozire; nkutwekiire ekisembo eky'efeeza n'ezaabbu; genda ocwe endagaano ei wakozire na Baasa omukama wa Isirairi, nukwo aihe amahe ge omu nsi yange.”

²⁰Benihadadi akahurra omukama Asa ebi yamugambiire, nukwo kutuma engabwa ez'amahe ge, bagende barwanise embuga za Isirairi, baasingura Iyooni, Daani, Abeeribesimaaka, Kinerosi yoona, n'ensi yoona eya Nafutaali.

²¹Baasa obu yahuliire eki, yalekera aho kwombeka Rama, yaikara Tiruza.

²²Nubwo omukama Asa yarangiriire Yuda yoona naaragira abantu boona, kutalekaho n'omu, baiha amabaale n'embaaho, omukama Baasa ebi akaba naayombekesa; ebi, nibyo yayombekeseze Geeba eya Benyamiini na Mizipa.

²³Ebintu ebindi byona eby'Asa, amaani ge, byona ebi yakozire, embuga ezi yayombekere, bikahandiikwa omu kitabu eky'obusinge obw'abakama ba Yuda. Baitu omu biro eby'obukuru bwe, akakwatwa endwara eyamuturukire omu bigere.

²⁴Yafa nka baisenkuru oku baafiire, yaziikwa hamu nabo omu rubuga rwa Daudi isenkuru; Yehosafaati omutabani, yateera engoma omu kiikaro kye.

²⁵Omu mwaka ogwa kabiri ogw'engoma y'omukama Asa owa Yuda, Nadabu mutabani wa Yerobbowamu, nugwo yatandikiiremu kulema Isirairi; akalema Isirairi okumara emyaka ebiri.

²⁶Akakora MUKAMA ebi akaba atarukwenda, akakwata engeso za ise, yakora ekibi kandi yakikoza Isirairi yoona.

²⁷Baasa mutabani w'Ahija ow'enju eya Isakaari, akeekoba n'abandi kurwanisa Nadabu; akamwitira Gibesoni ey'Abafirisiti; habwokuba, Nadabu n'Abaisirairi boona, bakaba bagosire Gibesoni.

²⁸Omu mwaka ogwa kasatu ogw'engoma ey'omukama Asa owa Yuda, nugwo yamwitiiremu, yalema omu kiikaro kye.

²⁹Akarumisa kuteera engoma ati, yaita enju ya Yerobbowamu yoona; omunju ya Yerobbowamu, atasigemu muntu n'omu omwomeezi, akabahwerekereza boona nkooku MUKAMA yagambiire omukanwa k'omwiru we Ahija Omusiiro.

³⁰Akaturwa ebibi Yerobbowamu ebi yakozire, n'ebi yakoleze Abaisirairi boona, n'ekiniga eki yakwasize MUKAMA Ruhanga owa Isirairi.

³¹Ebintu ebindi ebya Nadabu, na byona ebi yakozire, bikahandiikwa omu kitabu eky'obusinge obw'abakama aba Isirairi.

³²Omukama Asa owa Yuda n'omukama Baasa owa Isirairi baikaraga nibarwana obwomeezi bwabo bwona.

³³Omu mwaka ogwa kasatu ogw'engoma y'Asa omukama wa Yuda, Baasa mutabani w'Ahija, nugwo yatandikiiremu okulema Isirairi omu nsi Tiruza; akalemera emyaka amakumi abiri n'ena.

³⁴Akakora MUKAMA ebi atarukwenda, yakwata engeso nk'eza Yerobbowamu, yakora n'ekibi eki yakoleze Abaisirairi.