Read Runyoro - rutooro 1 Bakam 16 Bible Online

1 Bakam 16 - Runyoro - rutooro bible

1 Bakam 16

¹MUKAMA akagambira Yehu omurangi mutabani wa Hanani, yamuragira agambire Baasa ebigambo binu ati:

²“Okaba oli muntu ataina kitiinisa, nkakwimukya nakwiha omu cuucu, nakufoora mwebembezi w'abantu bange Abaisirairi, okakora nka Yerobbowamu ebi yakozire, wanaga abantu bange Abaisirairi omu kibi, wankwasa ekiniga habw'ebibi ebi baakozire,

³hati nu, ninyija kukuhwerekereza n'eka yawe, nkooku nahwerekeriize Yerobbowamu.

⁴Abantu ab'eka yawe boona abaraagwa omu rubuga baliriibwa embwa, abaraagwa omu bwerre balisomwa amanyonyi.”

⁵Ebintu ebindi Baasa ebi yakozire, amaani ge, bikahandiikwa omu kitabu eky'obusinge obw'abakama aba Isirairi.

⁶Baasa akafa nka baisenkuru oku baafiire, yaziikwa Tiruza; omutabani Era, yateera engoma omu kiikaro kye.

⁷MUKAMA akongera yatuma Yehu mutabani wa Hanani ahane Baasa n'enju ye, habw'ebibi byona Baasa ebi yakozire omumaiso ga MUKAMA yamukwasa ekiniga habw'ebi ebi yakoleze emikono ye, ebirukusisana ebyakozirwe enju ya Yerobbowamu, na habw'okugihwerekereza.

⁸Omu mwaka ogw'amakumi abiri na mukaaga ogw'engoma y'Asa omukama wa Yuda, Era mutabani wa Baasa nugwo yatandikiiremu okulema Isirairi omunsi Tiruza, akalemera emyaka ebiri.

⁹Baitu omwiru we Zimuli, ayaroleerraga ekicweka eky'ebigaali bye, akeekoba n'abantu okumurwanisa. Kiro kimu omu mwaka ogw'amakumi abiri na musanju ogw'engoma y'Asa omukama wa Yuda, Era obu akaba ali Tiruza omunju y'Aruza ayaroleerraga abantu ab'enju eya Tiruza, anywiire atamiire,

¹⁰Zimuli yataaha omunju, yamucumita yamwita, yalema omu kiikaro kye.

¹¹Ahonaaho obu yatandikire kulema, yahwerekereza enju ya Baasa yoona; ha basaija ab'oruganda rwe rundi ha banywani be atamulekere musaija n'omu.

¹²Zimuli nukwo yamazireho ati enju ya Baasa, MUKAMA nkooku yagambire naatuma Yehu omurangi,

¹³naamutura ebibi byona ebi yakozire, n'ebyaakozirwe mutabani w'Era, n'ebi baakoleze Abaisirairi, baabiihiza MUKAMA Ruhanga owa Isirairi habw'okuramya ebisisani.

¹⁴Ebintu ebindi Era ebi yakozire, bikahandiikwa omu kitabu eky'obusinge obw'abakama aba Isirairi.

¹⁵Omu mwaka ogw'abiri na musanju ogw'engoma ey'Asa omukama wa Yuda, Zimuli akalema ebiro musanju omunsi Tiruza omu kasumi ako,

¹⁶amahe gakaba gatiire orukande haihi na Gibesoni ey'Abafirisiti, amahe ago, gaahurra ngu “Zimuli akeekoba n'abantu abandi, kandi aisire omukama”! Habweki, Abaisirairi boona ha kiro eki, baakwata Omuli engabwa y'ihe, ow'akaba ali omu rukande baamufoora mukama ow'okulema Isirairi.

¹⁷Omuli n'Abaisirairi boona, nukwo kuruga Gibesoni baagota Tiruza.

¹⁸Zimuli obu yaboine orubuga nkooku ruhambirwe

¹⁹habw'ebibi ebi yakozire yasobeza MUKAMA, naakora nka Yerobbowamu ebi yakozire na habw'ebibi ebyakozirwe mutabani we, na habw'okunaga Isirairi omu kibi, yataaha omu kigo eky'ekikaali ky'omukama, yayeyokezaamu, yagwamu.

²⁰Ebintu ebindi Zimuli ebi yakozire, nkooku yayekobere n'abantu abandi, bikahandiikwa omu kitabu eky'obusinge bw'abakama aba Isirairi.

²¹Nubwo Abaisirairi baabaganiziibwemu ebicweka bibiri; ekicweka ekimu kyasagika Tibuni mutabani wa Ginasi, bamufoole mukama, ekicweka ekindi kyasagika Omuli.

²²Baitu abantu abaasagikire Omuli, baakira abaahondiire Tibuni mutabani wa Ginasi; habweki, Tibuni yafa, Omuli yalya obukama.

²³Omu mwaka ogw'omakumi abiri na gumu ogw'engoma ey'Asa omukama wa Yuda, nugwo Omuli yatandikiiremu kulema Isirairi, akalema emyaka ikumi n'ebiri; emyaka mukaaga ey'okubanza, akagirema Tiruza.

²⁴Akagura orusozi orwa Samaliya hali Semere, yaruheera talenta ibiri ez'efeeza, orubuga oru yarugumya, yaruruka ibara Samaliya, naihirra ha ibara lya mukama warwo Semere.

²⁵Omuli akakora ebyabiihizaaga MUKAMA, akakora ebibi bingi muno okukira boona abaamwebembiire.

²⁶Habwokuba akakora byona nka Yerobbowamu mutabani wa Nebati ebi yakozire, ebibi ebi yakoleze Abaisirairi, baabiihiza MUKAMA Ruhanga wa Isirairi, habwokuramya ebisisani.

²⁷Ebintu ebindi Omuli ebi yakozire, n'amaani aga yayolekere, bikahandiikwa omu kitabu eky'obusinge bw'abakama aba Isirairi.

²⁸Omuli, akafa nka baisenkuru oku baafiire, yaziikwa omu rubuga Samaliya; Ahabbu omutabani, yateera engoma omu kiikaro kye.

²⁹Omu mwaka ogw'amakumi asatu na munaana ogw'engoma y'Asa omukama wa Yuda, Ahabbu mutabani w'Omuli, nugwo yatandikiiremu okulema Isirairi, akalema Isirairi omunsi Samaliya okumara emyaka amakumi abiri n'ebiri.

³⁰Ahabbu mutabani w'Omuli, na uwe akakora ebyabiihizaaga MUKAMA, okukira boona abaamwebembiire.

³¹Nkooku kyamwanguhiire okukora nka Yerobbowamu mutabani wa Nebati ebi yakozire, akaswera Yezebberi muhara w'Esibaali, omukama w'Abasidoni, yagenda kuheereza Baali n'okumuramya.

³²Omunju ya Baali ei yayombekere Samaliya, akomwombekeramu itambiro.

³³Akakora ekisisani eky'Asera. Akakora bingi ebyabiihiize MUKAMA Ruhanga owa Isirairi okukira abakama aba Isirairi boona abaamwebembiire.

³⁴Omu businge obw'engoma ye, Hire owa Beseri nubwo yayombekere Yeriko; obu yalimire omusingi, omwana we, Abiramu omuzigaijo yafa, obu yabyaire ebiti by'amalembo, omwana we Seguba macura na uwe yafa, MUKAMA nkooku yakigambire, naaraba omuli Yoswa mutabani wa Nuni.