Read Runyoro - rutooro 1 Bakam 17 Bible Online

1 Bakam 17 - Runyoro - rutooro bible

1 Bakam 17

¹Omu biro ebi, Eriya Omutisibi owa Tisibi ey'omu Giriyadi, akagambira Ahabbu ati: “Nkurahiire MUKAMA Ruhanga owa Isirairi ou mpeereza, omu myaka enu, tihaligwa rume rundi enjura, okuhika obu ndikaragira.”

²MUKAMA akagambira Eriya ati:

³“Ruga hanu ogende Burugaizooba, oyesereke haihi n'akasaaru Kerisi, akanyakuli Burugaizooba bwa Yorudaani.

⁴Onywege amaizi ag'akasaaru ako, ndagiire ebingoora, bikuheereyoga ebyokulya.”

⁵Eriya yagenda, yakora MUKAMA nkooku yamuragiire; akagenda yaikara haihi n'akasaaru Kerisi, akanyakuli Burugaizooba bwa Yorudaani.

⁶Omu bwire bwa nyenkya n'obwa rwebagyo ebingoora byamuleeteraga ebyokulya n'enyama;

⁷obu haahingwireho akasumi akasaaru kaayoma, habwokuba ensi ekaba etarukugwibwamu njura.

⁸Nubwo MUKAMA yamugambiire ati:

⁹“Imuka ogende Zerefaasi ey'Abasidoni, nuho oikale. Haliyo omufaakati arukwikara omunsi egi, mmuragire akuliiseege.”

¹⁰Aho Eriya yaimuka, yakwata ogwa Zerefaasi; obu yahikire ha irembo ly'orubuga, akasanga omufaakati naaseenya; yamweta yamugambira ati: “Nkwesengeriize, ompeyo otwizi nyweho.”

¹¹Omufaakati obu akaba naagenda kuleeta amaizi, Eriya yamweta obwa kabiri yamugambira ati: “Nkwesengeriize, ondetereyo n'akagaati.”

¹²Omufaakati yamugarukamu ati: “Nkurahiire MUKAMA Ruhanga wawe omwomeezi, tinkacumbire kantu, nyina orucumite rw'ensaano orunyakuli omu bbakuli, n'amagita ag'oliva make aganyakuli omu ncundiro; hati, nyizire kukomakoma obuku, ngende ngicumbe, tugirye n'omwana wange; eki nikyo kiraaba kyokulya kyaitu eky'okumalirra, okuruga obu, twikale aho, enjara etwite.”

¹³Eriya yamugarukamu ati: “Leka kutiina, genda okole nkooku ogambire; baitu obanze oncumbire akakeeki okandeetere, hanyuma nukwo oyecumbire n'omwana wawe.”

¹⁴Habwokuba MUKAMA Ruhanga owa Isirairi, binu nibyo agambire ati: “Ebyokulya ebinyakuli omu nsoha tibirihwamu, n'amagita ag'omu ncundiro tigalihwamu, okuhika ha kiro nyowe MUKAMA eki ndinagiraho enjura omunsi.”

¹⁵Omufaakati yagenda, yakora nkooku Eriya yamugambiire; omufaakati ogu, n'ab'omunju ye boona, n'Eriya, baamara ebiro bingi nibalya ebyokulya.

¹⁶Ensaano eyekaba eri omu nsoha etahwemu, n'amagita agakaba gali omu ncundiro gatahwemu, nkooku MUKAMA yagambiire Eriya.

¹⁷Obu haahingwireho akasumi, omwana w'omufaakati yarwara; endwara ye ekaba y'amaani muno, yamucekeza kimu.

¹⁸Omufaakati nukwo kukaguza Eriya ati: “Muntu wa Ruhanga iwe, okantura ki? Ekyakuleesire hanu, nukwo kwijukya Ruhanga ebibi byange, nukwo onyitire omwana?” Eriya yamugambira ati:

¹⁹“Omwana wawe mumpe.” Yamumwiha omu kifuba yamutwara omu kisiika eky'omu kainaabiri eki yaraaramuga, yamubyamya ha kitabu kye.

²⁰Yayesengereza MUKAMA naagamba ati: “Ai MUKAMA Ruhanga wange, omufaakati onu ou ndukwikara na uwe, wamuleetera obujune obw'okwita omwana we?”

²¹Nubwo yajuumaire ha mwana, emirundi esatu ayanjurwire emikono, yayesengereza MUKAMA ati: “Ai MUKAMA Ruhanga wange, nkwesengeriize omwana onu, omugarurre obwomeezi bwe.”

²²MUKAMA akahurra Eriya, omwana yagarukwamu obwomeezi bwe, yakira.

²³Eriya yakwata omwana, yamwiha omu kisiika kye eky'omu kainaabiri, yamutaahya omunju, yamukwasa nyina; yamugambira ati: “Omwana wawe ngugwo, mwomeezi.”

²⁴Omukazi yagamba Eriya ati: “Hati, namanya nkooku oli muntu wa Ruhanga, kandi ekigambo kya Ruhanga eki orukugamba nkooku kiri ky'amazima.”