Read Runyoro - rutooro 1 Bakam 18 Bible Online

1 Bakam 18 - Runyoro - rutooro bible

1 Bakam 18

¹Obu haahingwireho omwanya mukooto, omu mwaka ogwa kasatu, MUKAMA akagambira Eriya ati: “Irooko ogende oyeyoleke omukama Ahabbu, ninyija kunaga enjura omunsi.”

²Eriya yagenda kweyoleka Ahabbu. Omu kasumi ako, omunsi Samaliya, hakaba hagwiremu kiihe etagambwa.

³Ahabbu akeeta Obadiya ayaroleerraga ekikaali. Obadiya yatamuga muno MUKAMA ekitiinisa;

⁴Yezebberi obu akaba naita abarangi ba MUKAMA, Obadiya akakwata abarangi kikumi, yabasereka omu maingira, omu bwingira obumu yaserekamu amakumi ataano, n'omu bundi ataano, yabaliisaaga ebyokulya, abaha n'amaizi.

⁵Ahabbu akagambira Obadiya ati: “Orabangane omunsi enu, ohike ha maziba ag'amaizi na ha bihanga byona; titwikara kuzoora obunyansi obw'okuliisa embaraasi n'enyumbu, tuleke kufweerwa ebimu ha bisoro ebi.”

⁶Ensi baagibaganizaamu, buli omu arabe omu kicweka kye; Ahabbu yagenda wenka ha rubaju orumu, Obadiya na uwe yagenda wenka ha rubaju orundi.

⁷Obadiya obu akaba naagenda, batangatangana n'Eriya; Obadiya yamumanyirra, yajuumara hansi, yakaguza ati: “Niiwe Mukama wange Eriya?”

⁸Eriya yagarukamu Obadiya ati: “Ninyowe. Irooko ogende ogambire mukama wawe omukama oti: ‘Eriya ngunu ali hanu.’”

⁹Obadiya yakaguza Eriya ati: Nyowe omwiru wawe kundekera Ahabbu anyite, nkasobya ki?

¹⁰Nkurahiire Ruhanga omwomeezi nti: Tiharoho ihanga na limu rundi obukama nambere omukama atatumire ab'okukuserra; abantu obu baraagamba ngu: Kunu taliyo, obukama obu, yaakuburahiize, rundi ihanga eri, yaakulirahiize, nukwo ananuke nkooku batakuzoire.

¹¹Hati niiwe orukugamba ngu: Genda ogambire mukama wawe ngu “Eriya dara uwe ali hanu?”

¹²Obu ndaaba nakurugaho nti, Mwoyo wa Ruhanga naija kukutwara nambere ntamanyire, obu ndaagenda nkagambira Ahabbu akalemwa kukuzoora, nyowe omwiru wawe, noobu ndaaba natamuga MUKAMA ekitiinisa okuruga omu buto bwange, naija kunnyita.

¹³Otahurre, Yezebberi obu akaba naita abarangi ba MUKAMA, nkooku naserekere abarangi kikumi omu maingira, omu bwingira obumu, naserekamu amakumi ataano, n'omu bundi ataano, kandi nkooku nabaliisize ebyokulya nabaha n'amaizi?

¹⁴Hati, niiwe orukungamba ngu: “Genda ogambire mukama wawe ngu Eriya ngunu hanu? Naija kunnyita.”

¹⁵Eriya yagamba ati: “Nkurahiire MUKAMA ow'amahe omwomeezi ou mpeereza, kiro kinu ninyija kumweyoleka.”

¹⁶Aho Obadiya yagenda kwitirana Ahabbu, yamugambira; Ahabbu yagenda kwitirana Eriya.

¹⁷Ahabbu obu yaboine Eriya, yamukaguza ati: “Niiwe arukuleetera Isirairi akabi?”

¹⁸Eriya yagarukamu ati: “Isirairi tinkamuleeteraga kabi; ego okakaleeta, iwe n'enju ya sso niinywe mwaletiire Isirairi akabi, habwokuba mukanaga Ebiragiro bya MUKAMA, mwahondera Baali.

¹⁹Habweki, tuma abantu bansorooleze Abaisirairi boona, bampikeho ha rusozi Karumeeri, hamu n'abarangi ba Baali ebikumi bbina n'ataano, n'abandi ebikumi bbina n'ataano ab'Asera abanyakulya ha meeza ya Yezebberi.”

²⁰Nubwo Ahabbu yayesire Abaisirairi boona, yasorooza abarangi ha rusozi Karumeeri.

²¹Eriya yairra haihi abantu boona, yabakaguza ati: “Mulimara kasumi ki kucwamu? MUKAMA obu araaba ali nuwe Ruhanga, mumukuraatire; Baali obu araaba ali nuwe Ruhanga, nuwe muhondere.” Abantu batamugarukemu kigambo.

²²Eriya yagambira abantu ati: “Nyowe, kandi nyowe nyenka, ninyowe nsigaire ndi murangi wa MUKAMA; abarangi ba Baali, bali bikumi bbina mu ataano.

²³Mutuhe enimi ibiri; beekomereho enimi emu, bagitemateme, bagihingike ha nku, baitu baleke kuzicumika omurro.

²⁴Mwete ibara ery'omucwezi wanyu, na nyowe nyete ibara lya MUKAMA; Ruhanga ow'araagarukamu naanaga omurro, ogu nuwe Ruhanga.” Abantu boona baagarukamu bati: “Obalize ekihikire.”

²⁵Nubwo Eriya yagambiire abarangi ba Baali ati: “Mwekomere enimi emu, mubanze mugibaage, habwokuba muli baingi; mwete omucwezi wanyu, baitu mutahemba omurro.”

²⁶Baakwata enimi ei baabahaire, baagibaaga, baatandika kweta ibara ly'omucwezi wabo Baali okuruga nyenkya okuhika omu ihangwe, nibagamba bati: “Ai bambi Baali, boojo otugarukemu!” Batahurre iraka, hatabeho n'omu ayagarukiremu. Baayehinguliriza itambiro eri bakaba bakozire.

²⁷Omu ihangwe, Eriya yatandika kubasekereza naagamba ati: “Mutoke muno, habwokuba ruhanga, rundi aina eki arukuteekereza, rundi aturukire aheeru, rundi aina mbere agenzire, rundi agwijagiire, naayetaaga kumusisiimura.”

²⁸Baatoka muno okukiraho, baayesara n'ebitara n'amacumu, engeso yabo nkooku ekaba eri, okuhika esagama obu yataraakire.

²⁹Ihangwe obu lyahingwire, baayeyongera okutoka okuhika akasumi ak'okuhonga ekyonzira obu kaahikire, baitu hatahulirwe iraka; busaho n'omu ayagarukiremu.

³⁰Nubwo Eriya yagambiire abantu boona ati: “Munyirre haihi; abantu baamwirra haihi.” Yatandika kwemereza itambiro lya MUKAMA erikaba liseesirwe;

³¹yakwata amabaale ikumi n'abiri agarukuhikya omuhendo ogw'enganda ikumi na ibiri ez'abaana ba Yakobbo, MUKAMA ou yagambiire ati: “Ibara lyawe, oraayetwaga Isirairi”;

³²amabaale ago, yagombekesa itambiro ery'okuramizaahoga MUKAMA. Yarwehinguliriza orwina oruhamire orusobora kuhikwamu endengo ibiri ez'ensigo.

³³Yahingikaho enku yatematema enimi, yagita ha nku. Yaragira ati: “Mukwate ensoha ina, muziijuze amaizi, mugaseeserre ekihongwa eky'okwokya, na ha nku.”

³⁴Yayongera yaragira ati: “Eki mukikole obwa kabiri;” kandi yayongera ati: “Mukikole obwakasatu;” Baakikora obwakasatu.

³⁵Amaizi gaayehinguliriza itambiro, gaijuza orwina.

³⁶Akasumi ak'okuhonga ekihongwa obu kaahikire, Eriya omurangi yairra haihi yagamba ati: “Ai MUKAMA Ruhanga ow'Abburahamu, Isaaka, na Isirairi; kiro kinu, manyisa boona nkooku oba Ruhanga owa Isirairi kandi nyowe nkooku ndi mwiru wawe, binu mbikozire habw'obusobozi bwawe Ai MUKAMA.

³⁷Nyanuukura, abantu banu nukwo bamanye iwe MUKAMA nkooku oli Ruhanga, kandi bamanye nkooku obeegaruliire.”

³⁸Aho MUKAMA yanaga hansi omurro, gwasiiriiza ekihongwa ekyokwokya hamu n'enku, amabaale, ecuucu, gwayomya n'amaizi agakaba gali omu rwina.

³⁹Abantu boona obu baaboine eki, baajuumara baagamba bati: “MUKAMA nuwe Ruhanga MUKAMA wenka nuwe Ruhanga.”

⁴⁰Eriya yabagambira ati: “Mukwate abarangi ba Baali; hatabaho n'omu araairuka.” Boona baabakwata; Eriya yabasirimura ha kasaaru Kisoni, yabaitirayo.

⁴¹Nubwo yagambiire Ahabbu ati: “Genda olye kandi onywe, habwokuba nimpurra enjura neeseeseka.”

⁴²Ahabbu yagenda kulya n'okunywa. Ahabbu obu akaba akyagenzire kulya, Eriya yatemba ha mutwe gw'orusozi Karumeeri; yateeza amaju, omutwe yagweta omu maguru.

⁴³Yaragira omwiru we ati: “Genda orole nambere hali enyanja.” Omwiru yagenda yarorayo, yagamba ati: “Timboineyo kantu.”

⁴⁴Yamugambira ati: “Gendayo emirundi musanju.” Ha murundi ogwa musanju, nubwo yagambire ati: “Nabonayo akacu katoito akarukwingana omukono gw'omuntu, nikaimuka omu nyanja.” Eriya yamuragira ati: “Genda ogambire Ahabbu oti: ‘Teekaniza ekigaali kyawe ogende, enjura etaija kukutanga.’”

⁴⁵Hakahinguraho akacu kake, iguru lyabundabunda ebicu byairagura sii, haimuka omuyaga, haagwa enjura nyingi. Ahabbu yatemba ekigaali kye, yagenda omba Yezereeri.

⁴⁶MUKAMA akaha Eriya obusobozi, yayeteega, yairuka, yasiga Ahabbu, yahika ha irembo lya Yezereeri.