Read Runyoro - rutooro 1 Bakam 19 Bible Online

1 Bakam 19 - Runyoro - rutooro bible

1 Bakam 19

¹Eriya byona ebi yakozire, Ahabbu akabigambira Yesebeli, kandi akamugambira abarangi boona nkooku yabaisize empirima.

²Nubwo Yezebeeri yatumireho Eriya naagamba ati: “Ijo omu kasumi nka kanu, obu ntalikukora nkooku wakozire abarangi, abacwezi bannyite.”

³Eriya nukwo kutiina, yairuka atabule obwomeezi bwe, yahika Beeriseba eya Yuda, nuho yasiga omwiru we.

⁴Baitu uwe, yagenda orugendo orw'ekiro kimu, yataaha omu irungu, yaikarra hansi y'omuti omusasa; yayesabira kufa naagamba ati: “MUKAMA wange, ebintu bimpinguraine, ntwara; habwokuba tindi murungi okukira baisenkurunyowe.”

⁵Yabyama yagwijagira hansi y'omuti omusasa; haija malaika yamukwataho naagamba ati: “Imuka olye.”

⁶Eriya yamagamaga, kwija kurora ha musago, yasangaho keeki enyakucumbirwe ha mabaale agatuumire, n'ensoha y'amaizi, yalya, yanywa, yagaruka yabyama.

⁷Malaika wa MUKAMA yagaruka obwa kabiri, yamukwataho naagamba ati: “Imuka olye, obu otaalye, orugendo torukwija kurusobora.”

⁸Eriya yaimuka, yalya, yanywa, yarubata emisana makumi ana n'ebiro amakumi ana, yahika Horebu orusozi rwa Ruhanga, akyaina amaani ag'ebyokulya biri.

⁹Oku yasangayo obwingira, nubwo yarairemu; MUKAMA yamukaguza ati: “Eriya, nookora ki hanu?” Eriya yagarukamu ati:

¹⁰“MUKAMA Ruhanga ow'obusobozi bwona, obutoosa nkuheereza iwe wenka. Baitu nyina engonzi nyingi, ezirukunkwasa ihali, okurora abaana ba Isirairi nkooku bakurugireho, baaseesa amatambiro gawe, abarangi bawe baabaisa empirima, nyowe nyenka nti, ninyowe nsigaireho; kandi na nyowe nibanserra kunyita.”

¹¹MUKAMA yagamba ati: “Turuka ogende oyemerre ha mutwe gw'orusozi omumaiso gange.” Omu kasumi ako, MUKAMA yahingura, omuyaga omwingi kandi ogw'amaani gwacwa ensozi, gwahendahenda emyandara, baitu omu muyaga ogu, MUKAMA akaba atarumu; omuyaga obu gwarugireho, haija omusisa, baitu omu omusisa ogu nagwo MUKAMA akaba atagurumu;

¹²omusisa obu gwarugireho, haija omurro, baitu MUKAMA akaba atali omu murro ogu; omurro obu gwarugireho, haija akaraka akake akarukuheheera.

¹³Eriya obu yahuliire akaraka ako, yayeta omunagiro gwe ha maiso, yagenda yayemerra ha munwa gw'obwingira. Akahurra iraka nirikaguza liti: “Eriya, nookora ki hanu?”

¹⁴Eriya yagarukamu ati: “MUKAMA Ruhanga ow'obusobozi bwona, obutoosa nkuheereza iwe wenka, baitu abantu aba Isirairi bacwire endagaano yawe, baseesire amatambiro gawe, abarangi bawe babaisize empirima; nyowe nyenka nti, ninyowe nsigaireho; kandi na nyowe nibaserra kunyita.”

¹⁵MUKAMA yamugambira ati: “Genda, okwate omuhanda ogaruke omwirungu erya Damasiko; obu oraahikayo, oseeseho Hazeeri amagita, abe mukama wa Siriya;

¹⁶Kandi Yehu mutabani wa Nimusi, omuseeseho amagita abe mukama wa Isirairi; Erisa mutabani wa Safati owa Abeerimehora, omuseeseho amagita, abe murangi omu kiikaro kyawe,

¹⁷ogu ow'aratabuka empirima ya Hazeeri, Yehu araamwita; kandi ogu araatabuka eya Yehu, Erisa araamwita.

¹⁸Baitu omu Isirairi, ninyija kulekamu abantu kasanju, abo bonka abatararamize Baali, kandi abataramugwire omunda.”

¹⁹Eriya yaruga oku, yahikaho Erisa mutabani wa Safati, ow'akaba naalimisa emisorongo y'ente ikumi n'ebiri, uwe nuwe akaba ali n'ogwa ikumi n'ebiri. Eriya yamurabaho, yamunagira omwegereko gwe. Erisa nubwo yasigire ente yahondera Eriya yamugambira ati:

²⁰“Leka ngende ndage Isenyowe na nyinanyowe, nukwo nkuhondere.” Eriya yamugarukamu ati: “Irooko ogende, tindukukutanga.”

²¹Tiyamukuraatira, yakwata ente ezi yalimisaaga, yaziita, enyama yazo yagicumbisa ekikoligo kyazo, yagiha abantu baalya. Hanyuma yaimuka yahondera Eriya, yatandika kumuheereza.