Read Runyoro - rutooro 1 Bakam 2 Bible Online

1 Bakam 2 - Runyoro - rutooro bible

1 Bakam 2

¹Daudi obu akaba ali haihi kufa, akeeta omwana we Solomooni yamuteererra ati:

²“Ndi haihi kufa, obe muntu w'omutima, kandi oyeyoleke nkooku oli musaija,

³okwatege ebiragiro bya MUKAMA Ruhanga wawe; okolege ebi agonza, okwatege ebiragiro bye n'ebigambo bye, nkooku byahandiikirwe omu biragiro bya Musa, nukwo hoona h'oraagendaga otungege omugisa omu byona ebi oraakoraga;

⁴MUKAMA nukwo ahikirize eki yangambire ati: ‘Abaana bawe obu balitaho omutima okukora ebi ngonza, bakaanyesiga n'omutima gwabo n'omwoyo gwabo gwona, toliburwa muntu ow'okulema Isirairi.’

⁵“Ekindi, na iwe omanyire Yowabbu mutabani wa Zerwiya eki yankozire, nkooku yakozire engabwa ibiri ez'amahe ga Isirairi, Abbuneeri mutabani wa Neri, n'Amasa mutabani wa Yese, aba yaisire, yahoora enzigu omu kasumi ak'obusinge, habw'esagama eyaseesirwe omu bulemu, akaita abantu abataina kabi, hati ninyowe ndukujunaanwa eki yakozire, kandi nimbonabona.

⁶Habweki, kora amagezi gaawe eki garukukwoleka, baitu, otamuleka akafa, nk'abantu boona oku bafa.

⁷Okwate kurungi abaana ba Baruzilai Omugiryadi, obaikirize babe omuli abo abanyakulya ha meeza yawe; habwokuba obu nairukire mugenzi wawe Abusalomu, bakantangirra n'amakune.

⁸Kandi noikara na Simeyi mutabani wa Gera, owa Bahulimu, ow'oruganda rwa Benyamiini, ayankonderiize muno, ha kiro kiri eki nagendiireho Mahanaimu; baitu obu yaizire kuntangaana ha kisaaru Yorudaani, nkamurahira ninjurra MUKAMA nti: ‘Tindikwita.’

⁹Baitu otamwihaho omusango, habwokuba oli musaija w'amagezi; oraamanya eki osemeriire kumukora, ocwe amagezi goona, baitu afe.”

¹⁰Aho Daudi yafa nka baisenkuru oku baafiire, yaziikwa omu rubuga rwe.

¹¹Akasumi Daudi aka yalemiire Isirairi, kakahika emyaka amakumi ana; Hebroni akalemayo emyaka musanju; Yerusaalemu akalemayo asatu n'esatu.

¹²Solomooni nukwo yaikaliire ati ha kitebe eky'obukama bwa ise Daudi; kandi obukama bwe bwaguma muno.

¹³Hanyuma Adoniya mutabani wa Hasisi nubwo yagenzire hali Besiseba nyina Solomooni. Besiseba yakaguza Adoniya ati: “Oleesirwe birungi?” Adoniya yagarukamu ati: “Ndesirwe birungi.”

¹⁴Hanyuma yagamba ati: “Nyina eki ndukwenda kukugambira.” Nandiki Hagisi ati: “Kigambe.”

¹⁵Adoniya yagamba ati: “Omanyire obukama nkooku bukaba buli bwange, Isirairi yoona ninyowe ekaba etegeriize neenihira kugirema; baitu obukama bukahinduka bwaliibwa mugenzi wange habwokuba MUKAMA nuwe yabumugondiize.

¹⁶Hati, ninkusaba ekintu kimu kyonka; otanyangirra.” Besiseba yagarukamu ati: “Kigambe”

¹⁷“Nkwesengeriize, onsabire omukama Solomooni tarukwija kukwangirra ampe Abisaagi Omusunamu, mmuswere.”

¹⁸Besiseba yagamba ati: “Ego, eki ndaakikugambirra omukama.”

¹⁹Besiseba yagenda hali omukama Solomooni kumubaliza Adoniya ebi yamusabire kumugambira omukama. Omukama yaimuka kujwahukirra Besiseba, yainama kumutamu ekitiinisa; yasinga ha kitebe kye, yaragira, baleetere nyina omukama entebe; yamwikarra ha mukono gw'obulyo.

²⁰Nubwo yagambire ati: “Nyina ekintu kitoito muno eki ndukukusaba onkorre; otanyangirra.” Omukama yamugarukamu ati: “Mau, gamba eki orukusaba; tindukwija kukwangirra.”

²¹Nyina yagamba ati: “Abisaagi ogu Omusunamu, omuhe Adoniya owanyoko amuswere.”

²²Omukama Solomooni yagarukamu nyina ati: “Kiki ekirukukusabisiza Adoniya Abisaagi omusunamu? Musabire n'obukama; habwokuba nuwe mukuru wange, kandi Abyasari nyakatagara na Yowabbu mutabani wa Zerwiya nibamusagika”

²³Nubwo omukama Solomooni yarahiire MUKAMA naagamba ati: “MUKAMA naakanyite, obu ntaite Adoniya habw'okunsaba ekintu kinu!

²⁴Ndahiire MUKAMA omwomeezi, ayangumize yanta ha kitebe eky'obukama obwa isenyowe Daudi, kandi ayampaire eka nkooku yanihiize, kiro kinu Adoniya aitwe.”

²⁵Aho omukama yatuma Benaaya mutabani wa Yehoyaada, yacumita Adoniya yamwita.

²⁶Omukama yagambira Abyasara nyakatagara ati: “Ogende Anasosi omu itaka lyawe; habwokuba osemeriire kufa. Baitu tindukwija kukwita omu kasumi kanu habwokuba obu okaba okyali na isenyowe Daudi, okeetweka Esanduuko ey'Endagaano ya MUKAMA, kandi okabonabona nkooku yabonaboine.”

²⁷Aho Solomooni yabinga Abyasara aleke kwongera kuba nyakatagara wa MUKAMA, nukwo yahikiriza ati MUKAMA eki yagambire hali Eli nyakatagara omu kiikaro Siiro.

²⁸Yowabbu obu yahuliire amakuru ago habwokuba akaba asagikire Adoniya, baitu atasagike Abusalomu, yakwata ogurukutwara ha heema ya MUKAMA, yakwata amahembe g'itambiro.

²⁹Omukama Solomooni obu yahuliire Yowabbu nkooku airukire yagenda ha heema ya MUKAMA, kandi nkooku ali haihi n'itambiro, yatuma Benaaya mutabani wa Yehoyaada, yamugambira ati: “Genda omwite.”

³⁰Benaaya yahika ha heema ya MUKAMA, yagambira Yowabbu ati: “Omukama aragiire ngu: Turuka.” Yowabbu yagarukamu ati: “Nangwa, kangwe hanu.” Nubwo Benaaya yagarukireyo yagambira omukama ati: “Ebi nibyo Yowabbu arukugamba, nukwo angarukiremu ati:”

³¹Omukama yagarukamu Benaaya ati: “Kora nkooku agambire genda omwite omuziike; nukwo onyiheho oti, kandi nukwo oiheho oti enju ya isenyowe omusango ogw'okuseesa esagama, Yowabbu ei yaseesire hataroho bulyo.

³²MUKAMA alifubira Yowabbu habw'abantu abo aba yaisire, habwokuba akaseesira kandi yaisa ekitara abantu babiri abarukumukira obuhikiriire n'oburungi, nubo: Abbuneeri mutabani wa Neri, engabwa y'ihe erya Isirairi, n'Amasa mutabani wa Yeseri, engabwa y'ihe ery'oruganda rwa Yuda, atamanyisize isenyowe Daudi.

³³Esagama yabo eraikaraga neerurumira Yowabbu n'abaijukuru be obusinge bwona; baitu Daudi, abaijukuru be, n'enju ye, MUKAMA araabahaga obusinge ebiro byona.”

³⁴Hanyuma Benaaya mutabani wa Yehoyaada, yagenda yamwita, baamuziika omunju ye omwirungu.

³⁵Omukama, Benaaya mutabani wa Yehoyaada, nuwe yafoora ngabwa y'ihe omu kiikaro kya Yowabbu, kandi Zadoki nyakatagara yamugarra omu kiikaro ky'Abyasara

³⁶nubwo omukama yatumire bamwetere Simeyi, obu yaizire, yamugambira ati: “Ogende oyeyombekere enju Yerusaalemu, nuho oikale, otaliruga oku okagenda omu kiikaro ekindi.

³⁷Habwokuba ha kiro eki oliturukiraho okambuka akasaaru Kidironi, omanyire kimu nkooku olifa; ogu guliba musango gwawe?”

³⁸Simeyi yakaguza omukama ati: “Eki ogambire ninkisiima; iwe MUKAMA nkooku ogambire, na nyowe omwiru wawe nukwo ndaakora.” Simeyi nukwo kwikara Yerusaalemu omwanya mukooto.

³⁹Baitu obu haahoireho emyaka esatu, ababiri ha bairu ba Simeyi bakairuka baagenda omba Akisi mutabani wa Maaka, omukama wa Gaasi obu baagambiire Simeyi ngu: “Abairu bawe bali Gaasi”,

⁴⁰yaimuka yatandiika endogoyi, yagenda Gaasi omba Akisi kuserra abairu be; yabaihayo.

⁴¹Obu baagambiire Solomooni Simeyi nkooku yarugire Yerusaalemu yagenda Gaasi kandi ngu agarukire,

⁴²yayeta Simeyi yamukaguza ati: “Ntakurahize nakukomeeetereza nti: omanyire kimu ha kiro eki oliturukiraho okagenda omu kiikaro ekindi olifa? Wangarukamu oti: ‘Eki ogambire kirungi ndikora nkooku ogambire.’

⁴³Hati kiki ekyakuliisize endahiro ei warahiire MUKAMA, tiwahikiriza kiragiro eki nakuteereriire?”

⁴⁴Omukama yayongera yakaguza Simeyi ati: “Omanyire kurungi ebibi byona ebi wakozire isenyowe Daudi; habweki, MUKAMA naija kubikusasura.

⁴⁵Omukama Solomooni alihebwa omugisa, kandi MUKAMA aligumya obukama bwa Daudi obusinge bwona.”

⁴⁶Nubwo omukama yaragiire Benaaya mutabani wa Yehoyaada; yagenda yaita Simeyi, obukama nukwo kufookera kimu bwa Solomooni.