Read Runyoro - rutooro 1 Bakam 20 Bible Online

1 Bakam 20 - Runyoro - rutooro bible

1 Bakam 20

¹Benihadadi omukama wa Siriya, akazinisa ihe rye; akaba aina abakama abandi amakumi asatu na babiri, abakaba baina embaraasi n'ebigaali; yagenda yagota Samaliya yagirwanisa

²yatuma abakwenda omu rubuga, hali Ahabbu omukama wa Isirairi naagamba ati: “Benihadadi naagamba ati:

³‘Efeeza yawe na Zaabbu yawe, yoona yange, bakazi bawe abarukukira muno kusemera, hamu n'abaana bawe, nabo bange.’”

⁴Omukama wa Isirairi yagarukamu ati: “Mukama wange omukama, kibe nkooku ogambire, ndi wawe, na byona ebi nyinabyo.”

⁵Abakwenda baagarukayo omba Ahabbu baagamba bati: “Benihadadi naagamba ati: ‘Nkakutumaho ningamba nti: “Ompe efeeza yawe, ezaabbu yawe, abakazi n'abaana bawe;”

⁶Lero ijo ndikutumaho abaheereza bange, batindule enju yawe n'amaju ag'abaheereza bawe, bakwate ebintu byona ebi barukugonza babitwale.’”

⁷Nubwo omukama wa Isirairi yayesire abakuru b'ensi boona yagamba ati: “Barungi murole, mwetegereze omusaija onu nkooku arukuserra akasarre; akantumaho nansaba abakazi n'abaana bange, efeeza n'ezaabbu yange, ntabimwime.”

⁸Abakuru b'abantu n'abantu boona baamugambira bati: “Otamufaaho kandi otaikiriza.”

⁹Nubwo yagambiire abakwenda ba Benihadadi ati: “Mugende mugambire Mukama wange omukama muti: ‘Byona ebi wasabire nyowe omwiru wawe okubanza, ninyija kubihikiriza; baitu kinu eki onsabire obw'akabiri, tinsobora kukikora.’” Abaheereza baagenda baamugarurra Ahabbu eki yagambire.

¹⁰Benihadadi yamutumaho naagamba ati: “Ninyija kuleeta abasaija abarukumara kuhwerekereza orubuga rwawe runu, kandi abaraatwara ebicweka by'amabaale, obu ntakole eki, abacwezi nibakanyite!”

¹¹Omukama wa Isirairi yagarukamu ati: “Omugambire oti: ‘Ogi arukujwara kugenda ha bulemu, aleke kwenyumiza nk'ogu arukujuura amazire obulemu.’”

¹²Benihadadi obu yahuliire ebigambo ebi, naanywa n'abakama abandi omunsiisira, yagambira abasaija be ati: “Mwemerre omu biikaro byanyu.” Baayemerra omu biikaro byabo, baseesire orubuga.

¹³Nubwo haizire omurangi yairra haihi Ahabbu omukama wa Isirairi yamugambira ati: “MUKAMA naakukaguza ngu: Akanyanya k'abantu abo boona, okaboine? Kiro kinu, ninyija kubakuha obasingule; nukwo omanye nkooku ninyowe ndi MUKAMA.”

¹⁴Ahabbu yakaguza ati: “Habw'obusobozi bw'oha?” Omurangi yagarukamu ati: “MUKAMA nukwo agambire ati: Habw'obusobozi obw'abaserikale abasigazi abato ab'abalemi b'amasaza.” Hanyuma yakaguza ati: “N'oha araatandika obulemu?” Omukama yamugarukamu ati: “Niiwe oraabutandika.”

¹⁵Nubwo yayesire abaheereza b'alemi b'amasaza, boona hamu bakahika ebikumi bibiri mu asatu na babiri; obu yamazire kubara abo, yabara abantu boona aba Isirairi, boona hamu baahika kasanju.

¹⁶Benihadadi n'abakama abandi amakumi asatu na babiri, obu bakaba bali omu heema zaabo nibanywa, Abaisirairi baaseesa omu ihangwe,

¹⁷Abaheereza ab'abalemi ab'amasaza, nubo baabandize kuseesa. Benihadadi yatumayo abasikautu, baija baamugambira ngu: “Haizire abasaija nibaruga Samaliya.”

¹⁸Yagamba ati: “Obu baraaba baizire kusaba obusinge, mutabaita, mubakwate bali boomeezi; obu baraaba baizire kurwana, nabwo mubakwate bali boomeezi.”

¹⁹Abaheereza ab'abalemi b'amasaza, nubo baabandize kuruga omu rubuga, nukwo haakurataho ihe.

²⁰Buli muntu akaita omuntu ou yarwanisaaga; Abasiriya bairuka, Abaisirairi baabairukya, baitu Benihadadi omukama wa Siriya, yairuka atembere embaraasi, aina abantu abatembere embaraasi.

²¹Omukama wa Isirairi na uwe yaramaga, yahamba embaraasi n'ebigaali, yaita Abasiriya yabateera akatuumo.

²²Hanyuma omurangi yairra haihi omukama wa Isirairi yamugambira ati: “Banza ogarukeyo oyongere kukanyisa ihe ryawe, kandi oteekereze muno eki osemeriire kukora; habwokuba omu kasumi ak'omwaka ogw'obutoigo, omukama owa Siriya naija kukuramagira.”

²³Abaheereza b'omukama wa Siriya baamugambira bati: “Baaruhanga baabo, baaruhanga b'ensozi, nikyo baatukiriire amaani; hati, tubarwanisize omu kyeeya, lero mazimakwo, nitwija kubasingura.

²⁴Kinu nikyo mukole: mwihurre abakama, buli omu mumwihe omu kiikaro kye, omu biikaro byabo, mugarremu engabwa;

²⁵muzinise ihe erirukwingana eryafiire, ogarre embaraasi omu kiikaro ky'embaraasi ogarremu embaraasi, omu kiikaro ky'ekigali, ogarremu ekigaali; nukwo tubarwanisize omu kyeya, hataroho kugurukyagurukya, nitwija kubasingura.” Omukama Benihadadi yahurra eki baamugambiire, yakikora.

²⁶Omu kasumi ak'omwaka ogw'obutoigo, Benihadadi yazinisa ihe ery'Abasiriya, yagenda Afeki kurwanisa Abaisirairi.

²⁷Abaisirairi bakeesorooza, baaheebwa ebintu ebirukwetaagwa, baagenda kubarwanisa; baateera orukande omumaiso gaabo nibasisana nk'amagana g'embuzi amatoito abiri, baitu Abasiriya bakamooma ensi yoona.

²⁸Omurangi akagenda ow'omukama Ahabbu yamugmbira ati: “MUKAMA nagamba ati: ‘Habwokuba Abanyasiriya nibagira ngu ndi ruhanga w'ensozi tindi w'ebyeya, ninyija kukuha obusinguzi hali ihe lyabo erikooto muno, kandi iwe n'abantu bawe nuho muraamanyira ngu ninyowe MUKAMA.’ ”

²⁹Abanyasiriya naba Isirairi bakaikara omunkambi zaabo barolerangaine kumara ebiro musanju. Hakiro kya musanju nubwo baatandikire kurwana kandi aba Isirairi baita Abanyasiriya emitwaro ikumi.

³⁰Abaatabukire bakahaambalira omu rubuga Afeki, nambere ebisiika byagweriire abantu emitwaro ebiri n'akasanju omuli bo. Benihadadi nawe yahaambalira omu rubuga, yasuhuukira kanyuma k'ekisiika ky'enju.

³¹Abanyoro bakagenda hali uwe baarangira bati: “Tuhulire ngu abakama baba Isirairi banyambabazi. Twikirize tugende ow'omukama wa Isirairi twekindikire eguniya omumakendu n'emiguha omubikya, obundi nasobora kukiza obwomeezi bwaitu.”

³²Nubwo bayekindikira eguniya omumakendu kandi bayezingiriza emiguha omu bikya baagenda owa Ahabbu bamugambira bati: “Omuhereza wawe Benihadadi akwesengeriize muno omuganyire ojune obwomeezi bwe.” Nubwo Ahabbu yagarukamu ati: “Akyaroho mwomeezi? Kakirungi! Nasisana mwenewaitu!”

³³Abanyoro ba Benihadadi bakaikara bategere amatu balindirra akaire akasemeriire, lero Ahabbu obuyagambire ngu “Mwenewaitu nabo ahonaho baagamba ego kwo mwenewanyu.” Ahabbu yaragira ati: “Mumundeetere.” Benihadadi obuyahikire Ahabbu nukwo kumweta atembe ekigaali baikare nawe.

³⁴Benihadadi yamugambira ati: “Ninyija kukugarurra embuga isenyowe eziyaihireho sso nukwo oyombekemu orubuga rwawe orw'okusuburramu omu Damasiko nka isenyowe okuyakozire mu Samaliya.” Nubwo Ahabbu yagarukamu ati: “Obu kiraaba kiri kiti, ninyija kukulekera.” Yakora nawe endagaano, yamuleka yagenda.

³⁵Omuntu onu ow'omukitebe ky'abarangi, habw'okuragirwa MUKAMA akagambira mutaahi we amudukule. Baitu oli yayanga

³⁶nubwo uwe kumugarukamu ati: “Habwokutahondera MUKAMA ekyaragiire, entale neija kukwita n'okyaruga oti hanu” Kandi mananu akaba nakyarugaho entale neija n'emwita.

³⁷Omurangi nuwe omu onu yasanga omusaija ondi yamugamba ati: “Ndukura” nukwo nawe kumudukura, yamuhutaaza.

³⁸Omurangi nukwo kwesiba ekitambaara ha mutwe aleke kumanyirirwa; yagenda yayemerra ha muhanda yalindirra omukama wa Isirairi ahingule.

³⁹Omukama obu akaba naahingura, omurangi yatokera haiguru nayamirra ati: “Kabumba, nkaba ndi omu bulemu nindwana nukwo omuserikale kundeetera omunyanzigwa akaba akwaasirwe, yangamba ati: ‘Omuntu onu mundindire kurungi, obu arakwirukaho byawe; nosobora n'okufeerwa obwomeezi kitali eki noija kuleha ebicweeka by'efeeza nkumi isatu.’

⁴⁰Baitu nkatwalirizibwa ebintu bindi omunyankomo yacwa.” Omukama yagarukamu ati: “Omusango ogwecweriire wenka noija kusasura n'ekifubiro.”

⁴¹Ahonaho omurangi yaiha ekitambaara ha mutwe nukwo omukama kumumanyirra nk'omu hali abarangi.

⁴²Nubwo omurangi yagambira omukama ati: “Kinu kigambo kya MUKAMA: ‘Habwokuba okaikiriza omusaija ou nakugambire oite kukusiga, noija kusasura n'obwomezi bwawe, n'ihe lyawe niriija kuhwerekerezibwa habwokulekera omunyanzigwa wawe kucwa.’ ”

⁴³Omukama yagaruka omuka Samaliya atuntwire kandi agweriirwe.