Read Runyoro - rutooro 1 Bakam 21 Bible Online

1 Bakam 21 - Runyoro - rutooro bible

1 Bakam 21

¹Nabbosi Omuyezereeri, akaba aina orugonjo orw'emizaabbibbu omunsi Yezereeri, haihi n'ekikaali ky'Ahabbu omukama wa Samaliya.

²Kiro kimu, Ahabbu akasaba Nabbosi ati: “Ompe orugonjo rwawe orw'emizaabbibbu, ndubyalemu emikubi, habwokuba ruli haihi n'ekikaali kyange; ndaakuhamu orugonjo orw'emizaabibbu orurukurukira oburungi; rundi obu oraaba noogonza ndaakuhamu sente ezirusemeriire.”

³Baitu Nabbosi yagarukamu Ahabbu ati: “Nikikafuuhe, nyowe kukuha obugwetwa baisenkurunyowe obu bangwetiire.”

⁴Ahabbu yataaha omunju ye, abiihiirwe kandi aina obujune habw'ekigambo Nabbosi Omuyezereeri eki yamugambiire ati: “Tinsobora kukuha baisenkuru nyowe eki bangwetiire.” Yabyama ha kitabu kye yarolerra ekisiika, yayanga n'okulya ebyokulya.

⁵Yezebberi mukazi we, yamuhikaho yamukaguza ati: “Kiki ekikusaaliize muno kiti, okanga n'okulya ebyokulya?”

⁶Ahabbu yagarukamu mukazi we ati: “Habwokuba mbalizeege na Nabbosi Omuyezereeri, namugamba nti: ‘Nguza orugonjo rwawe orw'emizaabbibu; rundi obu oraaba noogonza, nkuhemu rundi’; yangarukamu ati: ‘Orugonjo rwange tinsobora kurukuha.’”

⁷Muka Yezebberi yamukaguza ati: “Omu busumi bunu, niiwe orukulema Isirairi? Imuka olye ebyokulya osemererwe; orugonjo rwa Nabbosi omuyezereeri ninyija kurukuha.”

⁸Aho muka Ahabbu yahandiika ebbaruha omu ibara lya iba Ahabbu, yaitaho emanyiikirizo ye, yaitwekera abakuru n'abantu abaikaraga na Nabbosi omu rubuga rwe.

⁹Omu bbaruha ezi, yahandiikamu ebigambo binu: “Murangirre ekiro eky'okusiiba, muleete Nabbosi omumaiso g'abantu;

¹⁰mumwirize haihi abasaija ababi babiri, bamunyegerre nibagamba bati: ‘Okakondereza Ruhanga n'omukama.’ Hanyuma mumwihe omu rubuga, mumuteere amabaale, mumwite.”

¹¹Abasaija ab'omurubuga rwa Nabbosi, abakuru n'abanyoro, baakora Yezebberi eki yabaragiire.

¹²Baarangirra ekiro eky'okusiiba nkooku muka Ahabbu yahandiikire omu bbaruha ezi yabatwekiire, baaleeta Nabbosi omu maiso g'abantu.

¹³Haija abasaija ababi babiri, baamwikarra omumaiso; baamunyegerra omumaiso g'abantu boona nibagamba bati: “Nabbosi akagamba kubi Ruhanga n'omukama.” Aho baamwiha omu rubuga, baamuteera amabaale, baamwita.

¹⁴Hanyuma baatumaho Yezebberi nibagamba bati: “Nabbosi, bamutiire amabaale; afiire.”

¹⁵Yezebberi akarumisa kuhurra ngu Nabbosi baamutiire amabaale kandi afiire, yagambira Ahabbu iba ati: “Imuka oyetungire orugonjo orw'emizaabbibbu orwa Nabbosi omuyezereeri; oru yayangire kukuguza; habwokuba takyali mwomeezi akafa.”

¹⁶Ahabbu nawe akarumisa kuhurra ngu Nabbosi afiire, yaimuka yagenda omu rugonjo orw'emizabibbu orwa Nabbosi ogu Omuyezereeri arwetungire.

¹⁷Nubwo MUKAMA yagambiire Eriya Omutisibi ati:

¹⁸“Imuka ogende oitirane Ahabbu omukama wa Isirairi anyakuli Samaliya; noija kumusanga omu rugonjo rwa Nabbosi orw'emizaabibbu, nambere agenzire kurutunga.

¹⁹Omugambire oti: ‘MUKAMA naakaguza ati: Oisire kandi otungire?’ Kandi omugambe oti: ‘MUKAMA naagamba ati: Omu kiikaro embwa eki zikombiiremu esagama ya Nabbosi, nuho ziraakombera n'eyawe.’”

²⁰Ahabbu yakaguza Eriya ati: “Iwe omuzigu wange, wanzoora?” Eriya yagarukamu ati: “Nkuzoire, habwokuba okehayo wenka okukora MUKAMA eki atagonza.

²¹Hati nu, ninyija kukuleetera akabi; ninyija kukuhwerekereza, nyiheho Ahabbu omwojo weena omunyagwa rundi atali munyagwa omu Isirairi;

²²enju yawe, ninyija kugikora nkooku nakozire enju eya Yerobbowamu mutabani wa Nebati, n'eya Baasa mutabani w'Ahija, habw'ekiniga eki onkwasize, na habw'okunaga Isirairi omu kibi.

²³Yezebberi MUKAMA akamugambaho binu: ‘Embwa zirimuliira omu mitaano ya Yezereeri.’

²⁴Omuntu weena ow'Ahabbu ow'aligwa omu rubuga runu, aliribwa embwa; kandi owe weena owaaligwa aheeru, aliriibwa amahungu ag'omu mwanya.”

²⁵Hatabeho muntu n'omu ayayehaire wenka okukora MUKAMA eki atagonza, nk'Ahabbu, Yezebberi mukazi we ou yahambiriize.

²⁶Akakora ebibi ebirukuswaza muno, naaramya ebisisani nk'Abamooli MUKAMA aba yabingire omunsi yabo, Abaisirairi batakagihikiremu oku baakozire.

²⁷Ahabbu obu yahuliire ebigambo ebi, yatemura ebyokujwara bye, yajwara eguniya, yasiiba, yabyamira eguniya ezi, yaikara naagendagenda aina obujune.

²⁸MUKAMA akakaguza Eriya Omutisibi ati:

²⁹“Oboine Ahabbu nkooku anyebundaliize? Habwokuba anyebundaaliize, tindireeta kabi omu busumi bwe; baitu mutabani we omu businge bwe, nuwe ndireetera akabi.”