Read Runyoro - rutooro 1 Bakam 22 Bible Online

1 Bakam 22 - Runyoro - rutooro bible

1 Bakam 22

¹Omu myaka esatu eyakurasireho, hakabaho obusinge omu Isirairi n'omu Siriya,

²baitu omu mwaka ogwa kasatu, Yehosofaati omukama wa Yuda, akagenda mb'omukama wa Isirairi.

³Omukama wa Isirairi yakaguza abaheereza be ati: “Muma-Romosi-Giryadi nkooku eri nsi yaitu, itwe tuculiire kwonka, twalema kugiihaho omukama wa Siriya?”

⁴Yakaguza Yehosofaati ati: “Turaagenda hamu kurwana omunsi Ramosi-Giryadi?” Yehosofati yagarukamu omukama wa Isirairi ati: “Nyeteekaniize nkooku iwe oyeteekaniize, abantu bange bali nk'abawe, embaraasi zange ziri nk'ezaawe.”

⁵Yehosofaati yagambira omukama wa Isirairi ati: “Obanze oyekaguze hali MUKAMA.”

⁶Nubwo omukama wa Isirairi yasoroize abarangi boona, abarukuhika abantu nka bikumi bbina yabakaguza ati: “Ngende ndwanise ensi Ramosi-Giryadi rundi ndeke?” Baamugarukamu bati: “Irooko ogende; habwokuba MUKAMA naija kugikuta omu ngaro.”

⁷Baitu Yehosofaati yakaguza ati: “Baitu tiharoho murangi wa MUKAMA ondi, ou tusobora kukaguza?”

⁸Omukama wa Isirairi yagarukamu Yehosofaati ati: “Hakyaroho omuntu omu ou tusobora kwekagulizaamu MUKAMA, omuntu ogu, nuwe Mikaaya mutabani wa Imura; baitu nyowe timmwenda habwokuba takandagurahoga ebirungi andaguraho ebibi.”

⁹Nubwo omukama wa Isirairi yayesire omunyoro yamugambira ati: “Yanguhya bwango Mikaaya mutabani wa Imura.”

¹⁰Omu kasumi ako, omukama wa Isirairi na Yehosofaati omukama wa Yuda bakaba baikaliire ha bitebe byabo eby'obukama, bajwaire ekanzu zaabo, bali ha rubuga orw'okuhuulirwaho, ha mulyango ogw'irembo lya Samaliya; abarangi boona baatandika kuranga omumaiso gaabo.

¹¹Zedekiya mutabani wa Kenaana akeekorra amahembe ag'ekyoma yagamba ati: “Omukama naagamba ati: ‘Amahembe ganu, nugo orukwija kurwanisa Abasiriya okuhika obu olikabasingurra kimu.’”

¹²N'abarangi boona nukwo baarangire bati: “Genda orwanise Ramosi-Giryadi ogisingule; MUKAMA naija kugikuta omu ngaro.”

¹³Omukwenda ayagenzire kweta Mikaaya akamugambira ati: “Ebigambo eby'abarangi ebirukugamba ekintu kimu, nibibaza kurungi hali omukama; na iwe obaze nk'omu hali bo, kandi obaze kurungi.”

¹⁴Baitu Mikaaya yagamba ati: “Ndahiire MUKAMA omwomeezi, MUKAMA eki arangambira, nikyo ndaabaza.”

¹⁵Obu yahikireho omukama, omukama yamukaguza ati: “Mikaaya, tugende kurwanisa Ramosi-Giryadi nandiki twerekere?” Mikaaya yagarukamu ati: “Irooko ogende osingule; MUKAMA naija kugikuta omu ngaro.”

¹⁶Baitu omukama yamugambira ati: “Ndaakurahira kaingaha, nti: Tombaliza bisuba baitu ombaliza amazima omu ibara lya MUKAMA?”

¹⁷Mikaaya yagamba ati: “Nkarora Abaisirairi boona bararangire omu nsozi nk'entaama ezitaina muliisa; MUKAMA yagamba ati: ‘Abo tibaina Mukama; buli omu agaruke owe n'obusinge.’”

¹⁸Omukama wa Isirairi yagambira Yehosofaati ati: “Ntakugambire nti: ogu tarukwija kundaangaho ekintu ekirungi, ondangaho ekibi?”

¹⁹Mikaaya yagarukamu ati: “Habweki nu, hurra MUKAMA eki arukugamba: Nkarora MUKAMA asingire ha kitebe eky'obukama bwe, ihe ryona ery'omwiguru limwemeriire ha mukono gw'obulyo n'ogw'obumoso;

²⁰MUKAMA yagamba ati: ‘Nooha araasoonasoona Ahabbu, nukwo agende agwe Ramosi-Giryadi?’ Omuntu omu yagamba ekintu kinu, ondi yagamba ekindi.

²¹Nubwo haizire omwoyo gwayemerra omumaiso ga MUKAMA nigugamba guti: ‘Nyowe ndaamusoonasoona.’

²²MUKAMA yamukaguza ati: ‘Oraamusoonasoona ota?’ Yamugarukamu ati: ‘Ninyija kugenda, nyefoole mwoyo omubiihi gw'ebisuba, mbalize omu kanwa k'abarangi b'Ahabbu.’ MUKAMA yagamba ati: ‘Niiwe oraamusoonasoona kandi noija kusobora; genda okikole.’

²³Habweki, MUKAMA ataire omwoyo omubiihi gw'ebisuba omu kanwa k'abarangi bawe banu boona; kandi akurangireho akabi.”

²⁴Nubwo Zedekiya mutabani wa Kenaani yairiire haihi yateera Mikaaya oruhi, yamukaguza ati: “Mwoyo wa MUKAMA akandugamu ata kwija kubaza na iwe?”

²⁵Mikaaya yagarukamu ati: “Olimanya ha kiro kiri eki oligenderaho kwesereka omu kisiika eky'omunda”

²⁶Omukama wa Isirairi yagamba ati: “Okwate Mikaaya omugarurre Amoni omulemi w'orubuga na Yoswa mutabani w'omukama;

²⁷obagambire oti: Omukama naagamba ati: ‘Omuntu onu mute omu nkomo omuhe akolulya kake n'amaizi, okuhika obu ndigaruka n'obusinge.’”

²⁸Mikaaya yagamba ati: “Obu oligaruka n'obusinge, buli MUKAMA tabaliize omuli nyowe.” Kandi yagamba ati: “Ohurre amahanga gawe goona!”

²⁹Omukama wa Isirairi na Yehosofaati omukama wa Yuda yagenda kuseesira orubuga Ramosi orw'omu Giryadi.

³⁰Omukama wa Isirairi yagambira Yehosofaati ati: “Ninyija kweburanganiza nukwo ngende ha bulemu, baitu iwe, jwara ebyokujwara byawe eby'obukama.” Omukama wa Isirairi yayeburanganiza yayefoora, nukwo yagenda ha bulemu.

³¹Omu kasumi ako, omukama wa Siriya, akaba aragiire engabwa ab'ebigaali bye makumi asatu na babiri ati: “Mutaseesira omuntu n'omu, baitu museesire omukama wa Isirairi wenka.”

³²Engabwa abakaba batembere ebigaali obu baboine Yehosofaati, baateekereza bati: “Mazimakwo, onu nuwe omukama wa Isirairi.” Nukwo kukubuutuka kumurwanisa. Yehosofaati yateera enduuru.

³³Engabwa ezikaba zitembere ebigaali obu zaayetegeriize nkooku atali mukama wa Isirairi, baakubuutuka, baaleka kumwirukya.

³⁴Baitu omusaija omu yaragira kurasa, yarasa omukama wa Isirairi, ekijwaro kye eky'ebigaragamba n'ekya ha kifuba nambere biteeranira; habweki yagambira draiva w'ekigaali kye ati: “Kubuutuka onyihe omu bulemu bunu, habwokuba mputaire.”

³⁵Ha kiro eki, obulemu bwakwata hansi na haiguru, omukama baamuteeka omu kigaali kye, yaikara aroleriire Abasiriya okuhika orwebagyo aho, yakaba; esagama eyamurugire omu kihuta yaijuza ekicweka eky'enyuma eky'ekigaali.

³⁶Izooba obu likaba liri haihi kutobera, ihe ryona lyarangirirwa ngu: “Buli muntu agaruke omu rubuga rw'owaabu, buli muntu agaruke omunsi y'owaabu!”

³⁷Omukama nukwo yafiire ati, baamuleeta Samaliya; nuho baamuziika.

³⁸Ekigaali baakyogeza haihi n'ekiyanja kya Samaliya, embwa zaakombakomba esagama ye, baamalaaya baagyoga, MUKAMA nkooku yagambire.

³⁹Ebintu ebindi Ahabbu ebi yakozire, enju ey'amasanga ei yayombekere, n'embuga zoona ezi yayombekere, byona bikahandiikwa omu kitabu eky'obusinge obw'abakama ba Isirairi.

⁴⁰Ahabbu yafa nka baisenkuru oku baafiire; mutabani we Ahaziya yateera engoma omu kiikaro kye.

⁴¹Yehosofaati mutabani w'Asa, akatandika kulema Yuda omu mwaka ogwa kana ogw'engoma y'Ahabbu omukama wa Isirairi.

⁴²Ha yatandikiire kulema, akaba ahikize emyaka ey'obukuru amakumi asatu n'etaano, akalema emyaka abiri n'etaano omu rubuga Yerusaalemu. Ibara lya nyina, nuwe Azuuba muhara wa Siluhi.

⁴³Akakwata omuhanda gwonyini, Asa ise ogu yarabiremu, atagurugemu, akakora MUKAMA ebi asiima; baitu ebiikaro eby'abakaafiiri bitaseeswe, kandi abantu bakongera okubitambiramu n'okwotererramu abubbaani.

⁴⁴Yohosofaati na uwe, akakora endagaano ey'okuleeta obusinge hamu n'omukama wa Isirairi.

⁴⁵Ebintu ebindi Yehosofaati ebi yakozire amaani ge aga yayolekere, nkooku yarwaine, ebi byona bikahandiikwa omu kitabu eky'obusinge obw'abakama ba Yuda.

⁴⁶Abasaija n'abakazi abakuuhya abaaheerezaaga ha matambiro g'abakafiiri, abakaba bakyasigaireho okuruga ha businge bwa Asa ise, akabamaraho.

⁴⁷Omunsi Edomu, hakaba hatarumu mukama, omusigwa ayakomerwe omukama owa Yuda nuwe yagiremaga.

⁴⁸Omukama Yehosofaati akakora meeri eza Tarusiisi ez'okugenda Ofiri kwihayo zaabbu; baitu itagendeyo, ikacwekera Eziyoni-geberi.

⁴⁹Nubwo Ahaziya mutabani w'Ahabbu, yagambiire Yehosofaati ati: “Abaheereza bange, leka bagende n'abawe omu meeri,” baitu Yehosofaati, eki atakisiime.

⁵⁰Yehosofaati yafa nka baisenkuru oku baafiire, yaziikwa nambere baaziikirwe omu rubuga rwa Daudi ise, omutabani Yehoraamu yateera engoma omu kiikaro kye.

⁵¹Ahaziya mutabani w'Ahabbu, akatandika kulema Isirairi omunsi Samaliya, omu mwaka ogwa ikumi na musanju ogu, engoma ya Yehosofaati omukama wa Yuda, Isirairi akagiremera emyaka ebiri.

⁵²Akakora ebibiihiza MUKAMA, akakuraatira ise, yakuraatira nyina, na Yerobbowamu mutabani wa Nebati, ayanagire Isirairi omu kibi.

⁵³Akaheereza Baali kandi yamuramya, yabiihiza MUKAMA Ruhanga owa Isirairi nka ise oku yakozire.