Read Runyoro - rutooro 1 Bakam 3 Bible Online

1 Bakam 3 - Runyoro - rutooro bible

1 Bakam 3

¹Solomooni akaganjana Faraaho omukama wa Misiri, ekyarugiremu yaswera muhara we, yamutwara omu rubuga rwa Daudi, yaikarayo okuhika obu yamazire okweyombekera enju ye nyabwe, n'enju ya MUKAMA, n'okuzitirra orubuga Yerusaalemu.

²Abantu baatambiraga omu biikaro ebikuru, habwokuba MUKAMA akaba atakombekiirwe enju.

³Solomooni yagonzaaga MUKAMA, naahondera ebiragiro bya ise Daudi; kyonka yatambaga kandi yacumiikirraga obubbani omu biikaro ebikuru.

⁴Omukama akagenda Gibbyoni kutambirayo, habwokuba eki nikyo kikaba kiri kiikaro kikuru eky'ekitiinisa; ha itambiro eri, Solomooni yahongerahoga ebihongwa eby'okwokya rukumi.

⁵MUKAMA akabonekera Solomooni omu kiikaro Gibbyoni omu kirooto omu bwire bw'ekiro, yamugambira ati: “Nsaba eki orukwenda nkikuhe.”

⁶Solomooni yagarukamu ati: “Okooleka omwiru wawe Daudi isenyowe engonzi enyingi ezitagambwa, habwokuba yakoraga ebi ogonza, akaba ali mwesigwa mali, muhikiriire, w'omutima ogurukwera; nikyo wamugondiize muno oti, wamuha n'omwana omwojo ow'araikarra ha kitebe kye eky'obukama kiro kinu.

⁷Ai MUKAMA Ruhanga wange, nyowe omwiru wawe, niiwe wanfoire mukama omu kiikaro kya isenyowe Daudi, kandi kunu ndi mwana muto; timmanyire kulema.

⁸Nyowe omwiru wawe, ndi hagati y'abantu bawe aba wakomere, ihanga erikooto muno eritasobora kubarwa.

⁹Habweki, nyowe omwiru wawe, ompe amagezi ag'okulema abantu bawe, nsobole kwahurana ekirungi n'ekibi; obu otampe amagezi, abantu bawe abaingi banu, ndaasobora nta kubalema?”

¹⁰Solomooni kusaba ekintu nk'eki, kikasemereza MUKAMA.

¹¹Ruhanga yamugambira ati: “Habwokuba onsabire amagezi nukwo oleme omu bwinganiza, tiwasaba kuhangaara, obuguuda rundi okwita abanyanzigwa bawe, baitu wasaba amagezi ag'okurora ekihikire,

¹²hati kankuhe eki osabire, ninyija kukuha amagezi maingi n'okwetegereza okutakatungwahoga muntu ondi ira lyona, kandi okutaligaruka kutungwa omuntu ondi.

¹³Ninyija kukuha n'eki otasabire: nubwo obuguuda n'ekitiinisa, tihalibaho mukama ondi alikwerenga obwomeezi bwawe bwona.

¹⁴Kandi obu Oraakoraga ebi ngonza, okakwata Ebiragiro n'ebigambo byange nka Sso Daudi oku yakozire, ndikuhangaaza.”

¹⁵Solomooni yasisiimuka, yamanya MUKAMA nkooku nuwe yabalize na uwe omu kirooto. Nubwo yagenzire Yerusaalemu, yayemerra omumaiso g'Esanduuko ey'Endagaano ya MUKAMA, yahonga ebihongwa eby'okwokya n'eby'okusaba obusinge, yakorra abaheereza be boona obugenyi.

¹⁶Kiro kimu, hakaija abakazi baamalaaya babiri, baayemerra omumaiso g'omukama Solomooni.

¹⁷Omu hali bo yagamba ati: “Agutamba, omukazi onu hamu na nyowe, turaara omunju emu: nyowe nkazaara omwana, tukyali hamu.

¹⁸Ha kiro ekya kasatu mmazire kuzaara, omukazi ogu na uwe nubwo yazaara; twaikara tuli itwenka; omunju omu, tukaba tutainamu muntu ondi, itwe itwenka niitwe twaikaramuga.

¹⁹Kiro kimu, omukazi ogu, yabyamira omwana we atagenderiire, omwana yafa.

²⁰Yaimuka ekiro omu itumbi, yanyihaho omwana wange ow'akaba ambyamire haihi, nyowe ngwijagiire, yamweta omu kifuba, owe omufu nuwe yata omu kifuba kyange!

²¹Nyenkya obu naimukire kwonkya omwana wange, kwija kurora, omwana afiire; baitu obu namwetegeriize muno obwire bumazire kukya, nasanga atali mwana wange ou nazaire.”

²²Baitu omukazi ogu yayomereza ati: “Nangwa, omwana omwomeezi nuwe owange, omufu nuwe owaawe.” Ebi nibyo baagambiire omukama.

²³Omukama nubwo yagambire ati: “Omukazi onu naagamba ati: ‘Omwana onu anyakwomiire, nuwe owange, kandi owaawe nuwe afiire’; ondi naagamba ati: ‘Nangwa, owaawe nuwe omufu, owange nuwe omwomeezi.’ ”

²⁴Omukama nukwo kugamba ati: “Mundeetere ekitara.” Baakimuleetera.

²⁵Yagamba ati: “Omwana omwomeezi, mumucwemu ebicweka bibiri ekicweka ekimu mukihe omukazi omu, ekicweka ekindi mukihe ondi.”

²⁶Omukazi nyina omwana omwomeezi, habw'okugonza muno omwana we, yagamba omukama ati: “Waitu Agutamba, nkwesengeriize omwana otamwita, baitu mumuhe ali mwomeezi.” Baitu omukazi ondi atali nyinamwana yagamba ati: “Otamuha nyowe kandi otamuha oli, baitu mucwemu habiri.”

²⁷Nubwo omukama yagarukiremu yagamba ati: “Omwana omwomeezi mumuhe omukazi ow'okubanza, mutakisura mukamwita, nuwe nyina omwana ogu malimali.”

²⁸Abaisirairi boona obu baahuliire omukama nkooku acwire, baamutamu ekitiinisa, habwokuba bakamanya Ruhanga nkooku yamuhaire amagezi ag'okucwaga emisango omu bwinganiza.