Read Runyoro - rutooro 1 Bakam 4 Bible Online

1 Bakam 4 - Runyoro - rutooro bible

1 Bakam 4

¹Omukama Solomooni, nuwe yabaire Mukama ayalemere Isirairi yoona,

²ganu nugo mabara g'abanyoro be abakuru: Azariya mutabani wa Zadoki nuwe akaba ali nyakatagara;

³Elihorefu n'Ahija, batabani ba Siisa bakaba bali bahandiiki; Yehosafaati mutabani w'Ahirudi nuwe akaba ali muhandiiki w'amakuru;

⁴Benaaya mutabani wa Yehoyaada, akaba ali ngabwa y'ihe; Zadoki n'Abyasari bakaba bali banyakatagara;

⁵Azariya mutabani wa Nasani nuwe yarolerraga abanyoro; Zabudi mutabani wa Nasani, akabi ali nyakatagara kandi muhabuzi w'omukama;

⁶Ahisaari nuwe yarolerraga ekikaali, kandi Adoniramu mutabani w'Abuda, nuwe yarolerraga emirimo.

⁷Solomooni akakoma abanyoro ikumi na babiri ab'okulema Isirairi yoona, abo nubo baaleeteraga omukama ebyokulya, hamu n'eka ye yoona; buli musaija omu mwaka gwona, yamaraga okwezi kumu naaleeta ebyokulya.

⁸Ganu nugo amabara gaabo: Benihuuli ayaikaraga omunsi ey'ensozi ey'Efraimu;

⁹Benidekere owa Makazi, Saalubiimu, Beesisemesi n'Eloni-besihanani;

¹⁰Benihesedi ow'Aruboosi (nuwe akaba ali mukama wa Sooko n'ensi yoona eya Heferi);

¹¹Ben-abinadabu ayaikaraga omunsi Nafalidooli yoona (nuwe yaswire Tafasi muhara wa Solomooni);

¹²Baana mutabani w'Ahirudi owa Tanaki, Megido, na Besiseyani enyakuheeriire Zaresani ifo ya Yezereeri, n'okuruga Besiseyani okuhika Abeerimehora, okuhika ha rubaju orundi orwa Yokimeyamu;

¹³Benigeberi owa Ramosi Giryadi (nuwe yalemaga ebyaro ebya Yairi mutabani wa Manaase ebinyakuli Giryadi, kandi akaba naalema ekicweka ky'ensi eky'Arugoobi ekinyakuli Basani, embuga enkooto nkaaga ezinyakuzitiriirwe ebisiika, n'emitahimbwa ey'omulinga);

¹⁴Ahinadabu mutabani wa Ido owa Mahanahimu;

¹⁵Ahimaazi owa Nafutaali (nuwe yaswire Basemasi muhara wa Solomooni);

¹⁶Baana mutabani wa Husai ayaikaraga omunsi y'Aseri na Beyaloosi;

¹⁷Yehosafaati mutabani wa Parwa ayaikaraga omunsi ya Isakaari;

¹⁸Simeyi mutabani w'Eli ayaikaraga omunsi ya Benyamiini;

¹⁹Giberi mutabani wa Uli, ayaikaraga omunsi Giryadi, ensi ya Sihoni omukama w'Abamooli, n'ey'Ogi owa Basani. Omunsi ya Yuda hakaba harumu omunyoro omu wenka.

²⁰Abantu ab'oruganda rwa Yuda n'Abaisirairi, bakaba bali baingi nk'omusenyi ogwa ha musa gw'enyanja; baalyaga baanywaga, kandi baayegonzaaga.

²¹Solomooni akalema amakama goona, okuruga Efuraate okuhika hansi ey'Abafirisiti n'okuhikira kimu ha mutaano gw'ensi Misiri; abakama abo, baamuhaga omusoro kandi baamuheerezaaga obwomeezi bwe bwona.

²²Ebyokulya Solomooni ebi yayetaagaga eby'ekiro kimu, byahikyaga ebigega makumi asatu eby'ensaano enyakuniinuukire, ebigega nkaaga eby'ensaano endi,

²³ente ikumi ezigomokere, ente amakumi abiri ezi baihaga omu maliisizo, entaama kikumi, oyongereho empara, enjaza, ensama, n'enkoko ezinyesire muno.

²⁴Habwokuba nuwe yalemaga ekicweka kyona ekya bugwaizooba, okurugirra Tifusa okuhika Gaza, nuwe yalemaga abakama boona aba bugwaizooba bw'Efuraate; akaba aina obusinge n'ensi zoona ezikaba zimwehinguliriize.

²⁵Ha businge bwona obwa Solomooni, abantu ab'oruganda rwa Yuda hamu na Isirairi, okuruga Daani akuhika Beriseba, bakagwagwana, buli ruganda rukaba rwina emizaabbibbu yarwo n'emitini yarwo.

²⁶Solomooni akaba aina ebihongole emitwaro ena, omu embaraasi ezaasikaga ebigaali bye nuho zaikaraga, kandi akaba aina abatembi b'embaraasi akakumi kamu, n'enkumi ibiri.

²⁷Abanyoro abo nubo baahaga omukama Solomooni ebyokulya, na boona abaalyaga ha meeza ye, buli omu kwezi kwe; tibaikirizaaga kintu na kimu kuburaho.

²⁸Kandi baaleetaga omu kikaali Sairi n'obunyansi obwomere obwaliibwaga embaraasi, n'ebisoro ebyaakoraga emirimo, ebi baabireetaga nambere byabaga nibyetaagwa, buli muntu nkooku yabaga aragiirwe.

²⁹Ruhanga akaha Solomooni amagezi n'obwetegereza ebihinguraine, kandi yamuha okumanya okutaina rulengo,

³⁰amagezi ge gakakira amagezi ag'abantu boona aba Burugaizooba, n'ag'abantu boona aba Misiri.

³¹Akaba ali w'amagezi akukira abantu boona, w'amagezi okukira Esani Omunyazeraani, Hemani, Katukooli, na Darada batabani ba Mahooli; akarangaanwa omu mahanga goona agakaba gamuheriire.

³²Akacwa enfumo enkumi isatu, yahandiika ebizina rukumi na bitaano.

³³Akabazaaho emiti, okutandikira ha mikogoto eya Lebanoni, okugarukira ha mwihura ogunyakuranda ha kisiika; atagarukire aho, akabazaaho ha bisoro, ha binyonyi, ha bintu ebinyakwekurra, na ha ncu.

³⁴Abantu baarugaga omu mahanga goona kandi baatumwaga abakama ab'ensi yoona, baija kuhurra amagezi ga Solomooni.