Read Runyoro - rutooro 1 Bakam 5 Bible Online

1 Bakam 5 - Runyoro - rutooro bible

1 Bakam 5

¹Hiramu omukama wa Taya obu yahuliire Solomooni nkooku aseesirweho amagita g'obukama agaruke omu kiikaro kya ise Daudi, akamutumira abaheereza be; habwokuba Hiramu akaba ali nganjani ya Daudi.

²Solomooni akatumaho Hiramu naagamba ati:

³“Omanyire, isenyowe Daudi habw'amalemu agatarasarahoga aga yarwanaga n'ensi ez'abanyanzigwa ezikaba zimwehinguliriize, atasobole kwombekera MUKAMA Ruhanga we enju ey'okumuramizaamu, okuhika obu yakamuhaire okusingura abanyanzigwa be.

⁴Baitu nyowe hati, MUKAMA Ruhanga wange ampaire obusinge ha mbaju zoona; tinyina munyanzigwa, tinyina kabi nakati.

⁵Habweki, nyina ekiteekerezo eky'okwombekera MUKAMA Ruhanga wange enju, nkooku yagambiire isenyowe ati: mutabani wawe ou ndita ha kitebe ky'obukama omu kiikaro kyawe, nuwe alinyombekera enju.”

⁶Habweki, ragira abantu bantemere emikogoto egi eya Lebanoni, abaheereza bange beeteeranize n'abawe, ndaakusasura omuhendo gwona ogu orancwa habw'abaheereza bawe; habwokuba, noomanya, omuli itwe, nkooku hatarumu muntu n'omu anyakumanyire kutema emiti nk'Abasidoni.

⁷Hiramu obu yahuliire Solomooni ebi agambire, yasemererwa muno, nukwo kugamba ati: “MUKAMA ayahaire Daudi omwana ow'amagezi aleme ihanga lye, erikooto liti, akugizibwe kiro kya hati.”

⁸Hiramu yatumaho Solomooni naagamba ati: “Ebigambo byona ebi ondagiire mbihuliire; nyeteekaniize okukora kyona eki orukwenda, nkutungire emikogoto n'emisambya.

⁹Abaheereza bange nibaija kugiiha Lebanoni bagireete ha nyanja; ninyija kugiboha ebiba nukwo erabe omu nyanja, ehike omu kiikaro eki oligonza, oku nuho eryasizibwamu, nukwo ogitwale; obu olitungira abantu bange ebyokulya, olinsemeza.”

¹⁰Aho Hiramu yaha Solomooni embaaho zoona ez'emiti emikogoto, n'ey'emisambya ezi yayenzire,

¹¹kandi Solomooni yaha Hiramu ebyokulya eby'abantu be, ebigega by'engano emitwaro ebiri, n'emitwaro ebiri endi ey'amagita aganyakuhonzirwe. Ebintu ebi, Solomooni yabihaga Hiramu buli mwaka.

¹²MUKAMA akaha Solomooni amagezi nkooku yamuraganiize; haabaho obusinge hagati ya Hiramu na Solomooni, abo boombi baakora endagaano.

¹³Solomooni akakoma abantu abamu omu Isirairi yoona, ab'okukora emirimo, abaakomerwe bakahika emitwaro esatu.

¹⁴Yabatuma Lebanoni bacwirwemu ebitebe buli kwezi omutwaro gumu; baamaraga okwezi kumu Lebanoni, ameezi abiri bagamale omu ka; Adoniya nuwe yarolerraga abantu abo.

¹⁵Solomooni kandi akaba aina abeetweki b'emitumba emitwaro musanju, n'abaasi b'amabaale emitwaro munaana, abaikaraga omunsi y'ensozi,

¹⁶otabaliiremu abanyoro be abakuru emitwaro esatu n'ebikumi bisatu, abarolerraga omulimo, abarolerraga n'abantu abaagukoraga.

¹⁷Omukama obu yaragiire, baiha amabaale amakooto ag'okukora omusingi gw'enju ogw'amabaale agabaizirwe.

¹⁸Abombeki ba Solomooni n'aba Hiramu, n'abasaija aba Gibali baatema amabaale, baateekaniza embaaho n'amabaale ag'okwombekesa enju.