Read Runyoro - rutooro 1 Bakam 6 Bible Online

1 Bakam 6 - Runyoro - rutooro bible

1 Bakam 6

¹Omu mwaka ogw'ebikumi bbina n'ekinaana, Abaisirairi bamazire kuruga omunsi ya Misiri, omu mwaka ogwa kana, Solomooni naalema Isirairi, omu kwezi okwa Zivu, nukwo okwezi okwa kabiri, nubwo yatandikire kwombeka enju ya MUKAMA.

²Enju Solomooni ei yayombekiire MUKAMA, oburaiha bwayo, bukahika emikono nkaaga, obugazi makumi abiri, kandi obwemi emikono makumi asatu.

³Ekisasi eky'omumaiso g'enju kikahikya emikono amakumi abiri, nikinganaingana n'obugazi bw'enju, kandi omumaiso kihamire emikono ikumi.

⁴Ebisiika bikaba birumu emyanya efunzire aheeru okukira omu nda.

⁵Kandi yayombeka enju endi haihi n'egi, okwehinguliriza ebisiika byayo, omumaiso n'omu kiikaro ekirukwera eky'omunda; yayombeka ebisiika ebya ha rubaju okugyehinguliriza yoona.

⁶Ekisiika ekya kainabiri eky'okumalirrayo, obugazi bwakyo, kikaba nikihikya emikono etaano, kandi ekyahagati obugazi bwakyo emikono mukaaga, ekya kasatu, obugazi emikono musanju; habwokuba aheeru y'enju, yasigaga emyanya eyahikirwahoga emiraba, nukwo ereme kutaaha omu bisiika by'enju.

⁷Enju obu yamazire kwombekwa, ekazookwamu amabaale agaateekaniriziibwe omu kiihiro; habweki enju egi obu ekaba neeyombekwa hatabeho nyondo, rundi endemu, rundi ekyoma ekindi kyona ekikozesebwa omulimo, ekyahuliirwe.

⁸Omulyango ogw'ekisiika ekya kainabiri ekya hansi, gukaba guli ha bukiizi obw'obulyo obw'enju; omuntu yarabaga ha matembero, nukwo agende omu kainabiri eya hagati, aruge omu yahagati, agende omu ya kasatu.

⁹Enju nukwo yagyombekere ati, yagimara, eruguru yayo, yatayo emirabba n'embaaho ez'emikogoto.

¹⁰Ha nju egi yayungiraho endi, oburaiha bwayo emikono etaano, yayungirwa hali eri, n'emirabba ey'emiti emikogoto.

¹¹MUKAMA akagambira Solomooni ati:

¹²“Ka mbazeeho ha nju enu ei orukwombeka, obu olikwata ebiragiro byange okahurra ebigambo byange, okabigenderaho, nubwo ndihikiriza hali iwe, eki nagambiire Sso Daudi nti:

¹³Ndaikaraga omu baana ba Isirairi, kandi abantu bange tindibarugaho.”

¹⁴Aho Solomooni yayombeka enju yagimara.

¹⁵Ebisiika eby'omunda akabisweka embaaho ez'emikogoto, okurugiira kimu hansi okuhika eruguru, omunda yabisweka n'embaaho; hansi yatindaho embaaho ez'emisambya.

¹⁶Ekisiika eky'omunda ekinyakwetwa ekiikaro ekirukwera muno, kikombekwa enyuma y'enju.

¹⁷Enju, nukwo kugamba omumaiso ag'ekiikaro ekirukwera eky'omunda, oburaiha bwayo bukaba nibuhikya emikono makumi ana.

¹⁸Emikogoto ey'omunda y'enju egi, ekaba esarwirwe nk'endeku n'ebyakyo ebisasaanwire; yoona ekaba eri mikogoto, hakaba hatarumu ibaale na limu.

¹⁹Ekiikaro ekirukwera ekyomunda, akakita omu kiikaro ekya harubaju mali, nuho haikalege Esanduuko ey'Endagaano ya MUKAMA.

²⁰Obura bwakyo, bukaba nibuhikya emikono makumi abiri, obugazi emikono abiri, oburaiha emikono abiri; akakisiiga ezaabbu enungi mali. Kandi akombeka itambiro ery'emiti emikogoto.

²¹Omunda y'enju, akasiigamu ezaabbu enungi, omumaiso g'ekiikaro ekirukwera, akataho enjegere ez'ezaabbu, nakyo yakisiiga ezaabbu.

²²Enju yoona akagisiiga ezaabbu okugimarra kimu. Itambiro ery'omu kiikaro ekirukwera, nalyo akalisiiga ezaabbu.

²³Omu kiikaro ekirukwera ekya hagati, akatamu bakerubbi babiri abaakozirwe omu muti omuzaituuni, buli omu naahikya obura obw'emikono ikumi.

²⁴Buli omu akaba aina ipapa erirukuhikya obura obw'emikono ikumi okuruga ha nsonga ey'ipapa ery'omu, okugarukira ha nsonga ey'ipapa ery'ondi.

²⁵Omukerubbi ondi, nawe yahikyaga emikono ikumi; boona bakaba nibaingana kandi nibasisana.

²⁶Omu akaba naahikya emikono ikumi, ondi na uwe niyo akaba naahikya.

²⁷Abakerubbi abo akabata omunju ha rubaju; amapapa gaabo gakaba gaanjurwirwe, ipapa erya Kerubbi omu, lyahika ha kisiika ekimu, ipapa ery'ondi lyahika ha kisiika ekindi; amapapa gaabo agandi gaatangatangaana hagati y'enju.

²⁸Abakerubbi abo akabasiiga n'ezaabbu.

²⁹Ebisiika eby'omunda n'eby'aheeru, akabisarura, yasaruraho ebisisani bya bakerubbi, n'emikindo, n'ebyakyo ebisasanwire.

³⁰Hansi y'enju yoona, omu bisiika eby'omunda n'ebyaheeru, akasiigamu ezaabbu.

³¹Omulyango ogurukutwara omu kiikaro ekirukwera eky'omunda, akagutamu enyigi ez'emiti emizaituuni; ekisasi n'emikumirro byahika kimu kya kataano eky'ekisiika eki.

³²Enyigi ezi, yazisaruraho abakerubbi, emikindo, n'ebyakyo ebisasanwire; yazisweka ezaabbu.

³³Omulyango ogw'omumaiso, akagukorra emikumirro ey'emiti emizaituuni, erukwinganaingana ha mbaju ina zoona;

³⁴n'enyigi ibiri ez'emiti emisambya; embaaho ibiri ez'orwigi orumu ikaba nizikinga, n'embaaho ibiri ez'orwigi orundi, nazo zikaba nizikinga.

³⁵Enyigi ezi, akaisaruraho bakerubbi, emikindo n'ebyakyo ebisasanwire; yazisiiga zaabbu erukwingana ebintu ebisarwirwe.

³⁶Akakora ezigati ey'omunda, yagyombekesa enkarra isatu ez'amabaale agabaizirwe, n'orukarra rumu orw'emiti emikogoto.

³⁷Omu mwaka ogwa kana omu kwezi okwa Zivu, nubwo baatandikire kwimukya kukora omusingi ogw'enju ya MUKAMA.

³⁸Kandi omu mwaka ogwa ikumi na gumu, omu kwezi okwa Buli, enju nubwo yahweriire kimu yoona, nkooku ekaba etegekerwe. Akagyombekera emyaka musanju.