Read Runyoro - rutooro 1 Bakam 7 Bible Online

1 Bakam 7 - Runyoro - rutooro bible

1 Bakam 7

¹Solomooni kandi akombeka enju ye nyabwe, akagimarra emyaka ikumi n'esatu.

²Enju egi, akagyombekesa emiti ey'ekibira ekya Zanoni; obura bwayo bukaba nibuhika emikono kikumi, obugazi emikono makumi ataano, oburaiho emikono amakumi asatu, ekombekwaho enkarra isatu ez'enyomyo ez'emiti emikogoto, zaagerekwaho emirabba, nayo ey'emiti emikogoto.

³Ekasakaazibwa emikogoto eyekaba eri eruguru y'ebisiika, ebikaba biri ha nyomyo ana na itaano, buli rukarra rurumu enyomyo ikumi na itaano.

⁴Ha bisiika byona ebya ha rubaju, hakaba haliyo enkarra z'amadirisa isatu.

⁵Emiryango yoona n'amadirisa bikaba nibingana ha mbaju zoona, kandi amadirisa ago, agakaba gali omu nkarra isatu ezi, gakaba garolerraine.

⁶Kandi yayombeka ekisiika eky'enyomyo, obura bwakyo bukaba nibuhika emikono amakumi ataano; obugazi bwakyo, emikono amakumi asatu; omumaiso g'enyomyo, hakaba haroho ekisasi, n'orugoye.

⁷Akakora n'ekisiika eky'okwikarwamu ekitebe ky'obukama, eki akaba naija kucweramu emisango, kikombekwa n'emikogoto, okuruga hansi, okuhika ha mirabba.

⁸Enju ye nyabwe ei akaba naija kwikaramu omu kikaali ekindi, enyuma y'ekisiika eki, nayo nukwo ekaba ekozirwe eti. Kandi enju erukusisana nk'ekisiika eki, akagyombekera mukazi we muhara wa Faraaho.

⁹Amaju ago goona, gakombekwa amabaale ag'omuhendo, agaabaizirwe nkooku gaalengerwe, agaasazirwe n'omusumeeni omu maiso n'enyuma okuruga ha musingi okuhika ha rusu, n'okuruga omu zigati ey'enju ya MUKAMA, okuhika ha zigati enkooto,

¹⁰omusingi gukakorwa amabaale ag'omuhendo, amakooto, agarukuhikya emikono munaana, rundi ikumi.

¹¹Eruguru y'ago, akataho agandi, nago ag'omuhendo, gabaizirwe nkooku gaalengerwe n'embaaho ez'emikogoto.

¹²Ezigati enkooto, ekaba eyehinguliriziibwe enkarra ez'amabaale agabaizirwe isatu, n'orukarra rumu orw'emirabba ey'emikogoto; n'ezigati ey'omunda ey'omunju ya MUKAMA, ebi akaba ainabyo, n'omumaiso gaayo, bikaba biriyo.

¹³Omukama Solomooni akatumaho Hiramu owa Taya.

¹⁴Hiramu ogu, akaba ali mwana w'omufaakati ow'oruganda rwa Nafutaali, ise na uwe akaba ali wa Taya, yaheesaga omulinga; akaba ali munyamagezi muno kandi nyetegereza, ntoratoozi, naasobora kukora kurungi buli kintu kyona eky'omulinga. Obu yahikire hali omukama Solomooni, akamukorra omulimo gwe gwona.

¹⁵Akaheesa enyomyo ibiri ez'omulinga. Emu hali zo obura bwayo, emikono ikumi na munaana, omuzimbo gwayo, orukoba orw'emikono ikumi n'ebiri; omunda yayo, hakaba hatarumu kantu, omuzimbo gwayo gukaba nigwingana ebyara bbina; enyomyo eya kabiri, nayo nukwo yainganaga eti.

¹⁶Kandi akakwata omulinga yagwagyamu emitwe ebiri ey'okuta haruguru y'enyomyo; obura obw'omutwe ogumu, emikono etaano, obw'ogundi, nayo emikono etaano.

¹⁷Hanyuma yakora obutimba bubiri obw'erangi ezitali zimu, hamu n'ekondo ezikozirwe omu mikuufu ez'okuta ha mitwe enyakuli eruguru y'enyomyo; akatimba akamu k'okuta ha mutwe ogumu, akandi k'okuta ha mutwe ogundi.

¹⁸Kandi yakora ebisisani eby'enkomamahanga omu nkarra ibiri okwehinguliriza eruguru y'akatimba, kasweke omutwe ogukaba guli ha mutwe ogw'enyomyo; omutwe ogundi nagwo, nukwo yagukora.

¹⁹Emitwe eyekaba eri ha ruguru y'enyomyo ez'omumaiso, ekakorwa nk'ekyakyo eky'iranga, ekaba neehika emikono ena.

²⁰Emitwe egi, ekatebwa ha nyomyo ezi ibiri, na ha kikungulima ekikaba kiheriire akatimba; hakaba haroho ebisisani ebikumi bibiri eby'enkomamahanga omu nkarra ibiri ezehinguliriize; n'omutwe ogundi nukwo guti.

²¹Enyomyo akaibyara omumaiso g'enju; enyomyo emu yagibyara ha bukiizi obwobulyo, yagiruka ibara Yakiini; yabyara endi ha mukono ogw'obumoso, yagyeta Bowazi.

²²Eruguru y'enyomyo ezi, hakaba haroho ebisisani eby'ekyakyo eky iranga, omulimo gw'enyomyo nukwo gwahoire guti.

²³Hanyuma nubwo yakwasire omulinga yagwagya, yagukoramu etanka erukusisana enyamuziga, emikono ikumi okuruga ha mugoma ogumu okuhika ha mugoma ogundi, obura bwayo emikono etaano, omuzimbo gwayo, neeyehingulirizibwa orukoba orw'emikono amakumi asatu.

²⁴Hansi y'omugoma, hakaba haroho ebisisani eby'endeku ebirukuhikya emikono amakumi asatu; okwehinguliriza etanka yoona. Ebisisani ebi, bikaba biri omu nkarra ibiri, byagiibwe hamu n'etanka, ha kiro eki yayagibweho.

²⁵Etanka egi yayemerraga ha bisisani by'enimi ikumi na ibiri, isatu iroleriire ha bukiizi obw'emoso, isatu iroleriire Bugwaizooba, isatu ha bukiizi obw'obulyo, isatu ezindi iroleriire Burugaizooba; ebibunu byazo birorangaine.

²⁶Omuzimbo gwayo, rukaba ruli rutambo rumu; omugoma gwayo gukakorwa nk'omugoma gw'ekikopo, nk'ekyakyo ky'Iranga; yagiibwamuga entugiro enkumi ibiri.

²⁷Kandi akakora entebe ikumi ez'omulinga; buli emu obura bwayo emikono ena; obugazi emikono ena, kandi obwemi emikono esatu.

²⁸Entebe ezi zikakorwa ziti: Zikaba ziina ebiremu, kandi ebiremu ebi, byasomekwaga omu mbaaho,

²⁹Kandi ha biremu ebi ebikaba bisomekerwe omu mbaaho, hakaba haroho ebisisani by'entale, eby'ente, n'ebya bakerubbi. Ha mbaaho ezi, ezikaba ziri hansi n'eruguru ey'ebisisani by'entale, n'eby'ente, hakaba haroho ekondo ezikozirwe kurungi.

³⁰Kandi buli ntebe, ekaba ina enyamuziga ina ez'omulinga, n'ebyoma ebirukwebirigirwaho enyamuziga ezi, nabyo by'omulinga; kandi ha mbaju ina, hakaba haliyo ekintu eky'okuteekwamu ebbeseni. Ebintu ebi, bikaheesirwa hamu n'ekondo, ha rubaju orwa buli nyamuziga.

³¹Omunwa gwayo gukaba guli omunda y'ekondo, eyekaba neehikya oburaiha obw'omukono gumu gwekulingiriire, nk'okuguru kw'emeeza, guraihire omukono gumu n'ekicweka. Ha munwa gwayo aho, hakaba hasarwirweho, kandi ebiremu byayo, nibinganaingana ha mbaju ina, guteekulingiriire.

³²Enyamuziga ina ezi zikaba ziri hansi y'ebiremu; ebyoma ebi zaayezigisirahoga, bikaba biheesirainwe ha kintu kimu n'entebe; obwemi obwa buli nyamuziga, omukono gumu n'ekicweka.

³³Enyamuziga ezi ikakorwa nk'enyamuziga ez'ekigaali; ebyoma byazo eby'okwebirigiraho, emigoma yazo, empagi zaazo, n'enkundi zaazo, byona bikaba biri by'omulinga.

³⁴Ha mbaju ina eza buli ntebe, hakaba haliyo ebintu eby'okuhagika; ebintu ebi bikakorwa ha kintu kimu n'entebe.

³⁵Kandi haruguru eya buli ntebe, hakaba haroho ekintu ekyekulingiriire, obura bwakyo, ekicweka ky'omukono; kandi ha ntebe eruguru, enyomyo zaayo n'ebiremu byayo, bikakorwa ha kintu kimu n'eky'entebe.

³⁶Omumaiso g'enyomyo zaayo n'ag'ebiremu byazo, akasarurayo: ebisisani bya bakerubbi, eby'entale, n'eby'emikindo, naarorra ha mwanya ogwa buli kimu, yayehingulirizaaho ebyakyo.

³⁷Nukwo yakozire ati entebe ikumi; zoona ikakorwa omu mulingo gumu, z'orulengo rumu, z'ensisana emu.

³⁸Kandi akakora ebbeseni ez'omulinga; buli bbeseni, yahikyaga emikono ena, hakaba haroho ebbeseni ey'okuteekwa omu buli emu ha ntebe ziri ikumi.

³⁹Ha bukiizi obw'obulyo na ha bw'emoso, akatayo entebe itaano itaano; etanka yagita ha bukiizi obw'obulyo obwa Burugaizooba obw'enju.

⁴⁰Hiramu na uwe, akabumba ebinaga, yaheesa ebitiyo n'ebbeseni. Aho, yamara omulimo gwona ogu yakoliire omukama Solomooni ha nju ya MUKAMA: Binu nibyo yakozire:

⁴¹Enyomyo ibiri ebbakuli ibiri ez'emitwe eyekaba eri ha nyomyo eruguru, obutimba bubiri obw'okusweka ebbakuli ibiri ez'emitwe eyekaba eri eruguru y'enyomyo;

⁴²ebisisani by'enkomamahanga eby'okuhunda obutimba, eby'okusweka ebbakuli ibiri ez'emitwe eyekaba eri ha nyomyo;

⁴³enyomyo ikumi, n'ebbeseni ikumi ezaaikaraga ha ntebe;

⁴⁴etanka emu, n'ebisisani by'enimi ikumi na ibiri ezikaba ziri hansi y'etanka.

⁴⁵Ebinaga, ebitiyo, n'ebbeseni, ebikwato byona eby'omunju ya MUKAMA, Hiramu ebi yakoliire omukama Solomooni, bikaba biri by'omulinga omurungi.

⁴⁶Ebi, omukama akabyagiza omu kyeya kya Yorudaani, ha itaka ery'ibumba, hagati ya Sukosi na Zeresani.

⁴⁷Solomooni ebintu byona atabirenge, habwokuba bikaba biri bingi muno; omulinga gutamanywe nambere gukaba nigwingana.

⁴⁸Solomooni nukwo yakozire ati, ebikwato byona eby'omunju ya MUKAMA: Itambiro ery'ezaabbu, emeza ey'ezaabbu eyateebwahoga omugaati ogwahongerwaga MUKAMA.

⁴⁹Ebikondo eby'etaara eby'ezaabbu enungi, bitaano ha bukiizi obw'obulyo, bitaano bindi ha bukiizi obw'emoso, omumaiso g'ekiikaro ekirukwera eky'omunda; ebyakyo, etaara, n'empana ez'ezaabbu;

⁵⁰ebikopo, makasi; ebbeseni, ediisi ez'obubbani, n'ebiswa eby'ezaabbu enungi; n'encuba eza zaabbu ez'enyigi ez'ekicweka eky'omunda eky'enju ya MUKAMA.

⁵¹Omulimo gwona omukama Solomooni ogu yakozire ha nju ya MUKAMA, nukwo yagumazire ati. Yataahyamu ebintu ise Daudi ebi akaba ahongiire MUKAMA: efeeza, ezaabbu, ebikwato, yabyahura omu maahurro ag'enju ya MUKAMA.