Read Runyoro - rutooro 1 Bakam 8 Bible Online

1 Bakam 8 - Runyoro - rutooro bible

1 Bakam 8

¹Hanyuma, omukama Solomooni akatumaho abakuru aba Isirairi n'abakuru boona ab'enganda, abeebembezi ab'amaju ag'abantu ba Isirairi, bagenda owe Yerusaalemu baihe Esanduuko ey'Endagaano ya MUKAMA, eyekaba eri omu rubuga rwa ise Daudi orurukwetwa Sioni, bagireete Yerusaalemu.

²Abaisirairi boona, bakesorooleza mb'omukama Solomooni, ha kasumi ak'obugenyi omu kwezi Esanimu, nukwo okwezi okwa musanju.

³Abakuru aba Isirairi boona bakaija, banyakatagara baahimba Esanduuko y'Endagaano.

⁴Baaleeta eheema ey'okutangatanganiramu, n'ebikwato byona ebirukwera ebikaba birumu; banyakatagara n'Abaleevi baabireeta.

⁵Omukama Solomooni, n'ekitebe kyona eky'Abaisirairi boona abakaba beesorooliize omumaiso ge, bakaba hamu na uwe omumaiso g'Esanduuko y'Endagaano, baatamba entaama n'ente ebitasobora kubarwa.

⁶Nubwo banyakatagara, baaleesire Esanduuko ey'Endagaano ya MUKAMA, baagita omu kiikaro kyayo, omu kiikaro eky'enju ekirukwera eky'omunda, ekiikaro ekirukukirra kimu kwera, hansi y'amapapa ga bakerubbi.

⁷Habwokuba abakerubbi bakanjurra amapapa gaabo eruguru y'ekiikaro eky'Esanduuko ey'Endagaano, habweki bakasweka Esanduuko n'enyomyo zaayo.

⁸Enyomyo ezi, ikaba iraihire muno, emitwe yazo, yarorwaaga buli muntu ayabaga ayemeriire omu kiikaro ekirukwera muno, omu maiso g'ekiikaro ekirukwera eky'omunda; baitu ow'aheeru, akaba atarukusobora kwirora; na hati hoona, ikyaroho.

⁹Omu Sanduuko ey'Endagaano hakaba hatarumu kintu kindi, okwihaho ebyasi bibiri eby'amabaale, Musa ebi yabyaire ha rusozi Horebbu. MUKAMA ebi yakoliireho endagaano n'abantu ba Isirairi, obu baarugire omunsi Misiri.

¹⁰Baanyakatagara obu baarugire omu kiikaro ekirukwera, enju ya MUKAMA yaijwamu ekiho ekikaba nikimeremeeta habw'ekyererezi eky'amaiso ga MUKAMA,

¹¹batasobole kwemerra kukora omulimo gwabo ogw'obuhereza habw'ekicu eki; habwokuba ekitiinisa kya MUKAMA kikaijuliza kimu enju.

¹²Solomooni nukwo kugamba ati: “MUKAMA, izooba akalita ha iguru, baitu akagamba ngu: Araikaraga omu mwirima kasira.

¹³Nkakwombekera enju ey'ekitiinisa, ekikaali eki oraikaramuga, obusinge n'obusinge.”

¹⁴Aho omukama yarora orubaju n'orubaju yasabira Abaisirairi omugisa, ekitebe kyona kikyayemeriire,

¹⁵yagamba ati: “MUKAMA Ruhanga owa Isirairi, anyakuhikiriize eki yagambiire isenyowe Daudi, akugizibwe, akagamba ati:

¹⁶‘Okuruga ha kiro eki naihiireho abantu bange Abaisirairi omunsi Misiri, omu nganda zoona eza Isirairi, ntakomemu rubuga orw'okwombekamu enju ei ndaaramizibwamuga; baitu nkakoma Daudi nuwe aleme abantu bange Abaisirairi.’

¹⁷Solomooni yagaruka yagamba ati: Isenyowe Daudi akagonza kwombekera MUKAMA Ruhanga owa Isirairi enju ey'okumuramizaamu.

¹⁸Baitu MUKAMA akamugamba ati: ‘Okakora kurungi, kuteekereza kunyombekera enju;

¹⁹baitu iwe toligyombeka, mutabani wawe ou olizaara, nuwe alinyombekera enju.’

²⁰Hati MUKAMA ahikiriize eki yanihiize; habwokuba nkagwetwa omu kiikaro kya isenyowe Daudi, hati nindema Isirairi, MUKAMA nkooku yanihiize, nyombekiire MUKAMA Ruhanga owa Isirairi enju.

²¹Omunju egi, nuho ntaire ekiikaro eky'okutamu Esanduuko ey'Endagaano enyakurumu endagaano ei yakozire na baisenkurwitwe, obu yabaihire omunsi Misiri.”

²²Aho Solomooni yayemerra omumaiso g'itambiro lya MUKAMA, ekitebe ky'Abaisirairi boona kimuhangire amaiso, yagorra emikono agyolekiize haiguru;

²³yagamba ati: “Ai MUKAMA Ruhanga owa Isirairi, busaho Ruhanga n'omu arukukusisana, omwiguru erinyakuli haiguru, rundi omunsi enyakuli hansi, anyakuhikiriza eki araganiza, kandi anyakwoleka abairu bawe abakora eki ogonza n'omutima gwabo gwona n'engonzi ezitagarukirra

²⁴iwe ayahikiriize eki wanihiize omwiru wawe Daudi isenyowe, wakigamba n'akanwa kawe. Eki wanihiize, okihikiriize kiro kinu.

²⁵Habweki, Ai MUKAMA Ruhanga owa Isirairi, ohikiriize ekindi eki waraganiize Daudi omwiru wawe noogamba oti: ‘Abaana bawe obu baligumira omu muhanda gwabo bakakora eki ngonza nka iwe isebo, toliburwa muntu owalikarra ha kitebe ky'obukama kulema Isirairi.’

²⁶Hati nu, Ai Ruhanga owa Isirairi, kyona eki wanihiize omwiru wawe Daudi isenyowe, okihikirize

²⁷Baitu MUKAMA, mara iwe osobora kwikara omunsi munu? Dora, iguru eri, na liri eriri hara muno, noolisaagamu; kandi enju enu ei nyombekere, niyo oraahikamu!

²⁸Baitu nabwo, ohurre nyowe arukukwesengereza, kandi ompe ebi ndukukusaba kiro kya hati. Ai MUKAMA Ruhanga wange, kiro kya hati, ohurre omwiru wawe nkooku arukukulirirra kandi nkooku arukukusaba;

²⁹nukwo olindege enju enu nyamusana n'ekiro, ekiikaro kinu eki wakomere kuramizibwamuga, nukwo ohurrege nyowe omwiru wawe ebi ndaakusabaga, mpangire amaiso ekiikaro eki.

³⁰Nyowe omwiru wawe, n'abairu bawe Abaisirairi, obu turaakutaagiraga tuhangire amaiso ekiikaro eki, ohurrege okutaaga kwaitu; ego ohurre oli omwiguru omu kiikaro kyawe; kandi obu oraahurraga, oganyirege.

³¹“Obu haraabahoga omuntu anyakusobezeeho mutaahi we, omuntu ogu bakamuleeta ha itambiro lyawe omunju enu arahizibwe, okugumya nkooku ataina kibi eki akozire,

³²oyeme omwiguru, Ai MUKAMA oramule abairu bawe abo, omubi, omufubire nkooku asemeriire, atakozire ekibi, omwiheho omusango.

³³“Abantu bawe Abaisirairi obu baraakusobyahoga bakabingwa abanyanzigwa baabo, obu baraakukubukiraga, bakaatura ibara lyawe, bakakusaba, bakakwesengereza omunju egi;

³⁴oyeme omwiguru obahurrege, obaganyire ekibi eki bakozire, obagarre omunsi ei wahaire baisenkurubo.

³⁵“Obu baraakusobyahoga, iguru obu liraakingwaga, enjura ekalema kugwa, obu baraasabaga bahangire ekiikaro eki amaiso, bakaatura ibara lyawe, bakazira ekibi kyabo, obu oraabaga noobasaaliza,

³⁶omu kasumi ako, ohurrege oli omwiguru, abairu bawe obaganyire ekibi kyabo, obu oraabaga noobooleka omuhanda ogu orukwenda batome; onage enjura omunsi yawe, ei wahaire abantu bawe bube butaka bwabo.

³⁷“Ensi obu erigwibwamu kiihe, obu eriijwamu kagingo, obu erigwibwamu endwara kasiisa byokulya, rundi oruhumbo, obu erigwibwamu enzige rundi kadoima; abanyanzigwa baabo obu balibagotera omu mbuga ezimu ha mbuga zaabo; buli muhito gwona, na buli ndwara eraabahoga;

³⁸omuntu weena araakusabaga, araakutaagiraga, rundi abantu bawe boona Abaisirairi obu baraakusabaga, rundi obu baraakutaagiraga, buli omu naayoleka obusaalizi obw'omutima gwe, kandi agoroire emikono ye agyolekiize enju egi;

³⁹omu kasumi ako, ohurre nooyema omwiguru, obwikaro bwawe, oganyirege, obakonyere, buli omu omuhe nkooku orukumanya omutima gwe, nkooku omanyire engeso ze, (habwokuba, iwe, niiwe wenka, omanyire emitima ey'abaana b'abaantu boona);

⁴⁰nukwo bakutiine akasumi koona aka balimara omunsi ei wahaire baisenkurubo.

⁴¹“Kandi obu haraijaga omunyaihanga atali ow'abantu bawe Abaisirairi, arukuruga omunsi eya hara, akaija kukuramya,

⁴²(habwokuba abantu balihurra ha kitiinisa kyawe na ha busobozi bwawe obwingi, na ha maani gawe) obu araijaga akasaba ahangire amaiso enju egi,

⁴³ohurrege nooyema omwiguru obwikaro bwawe, omukorrege byona ebimuleesire nambere oli; abantu boona ab'omunsi nukwo bakumanye kandi bakutiine, nk'abantu bawe Abaisirairi oku bakumanyire kandi nkooku bakutiina, kandi nukwo bamanye enju egi ei nayombekere, nikyo ekiikaro eki oraaramizibwamuga.

⁴⁴“Abantu bawe obu baraagendaga kurwanisa abanyanzigwa baabo, omu muhanda gwona ogu olibarabyaamu, bakasaba MUKAMA bahangire amaiso orubuga oru wakomere, n'enju egi ei nakwombekiire,

⁴⁵omu kasumi ako, ohurrege nooyema omwiguru, obahe eki barukukusaba nibakwesengereza, obahe okusingura.

⁴⁶“Obu baraakusobezaaga habwokuba busaho n'omu atasobya, okababiihirirwa okabalekera abanyanzigwa baabo babanyage, babatwale omunsi yabo, eya hara rundi eya haihi;

⁴⁷obu baraayeteeraga bali omunsi egi ei banyagiirwemu, bakazira, bakakwesengereza nibagamba bati: ‘Tukasobya, twakora kubi kandi twakora ebitahikire’;

⁴⁸obu balizirra kimu n'omutima gwabo gwona, bali omunsi egi ey'abanyanzigwa baabo abaabanyagire, bakakusaba amaiso bagahangire ensi yabo ei wahaire baisenkurubo, bagahangire orubuga oru wakomere n'enju ei nakwombekiire;

⁴⁹omu kasumi ako, ohurrege nooyema omwiguru obwikaro bwawe, obahe eki barukukusaba nibakwsengereza, obarwanirre,

⁵⁰oganyirege abantu bawe abaakusobiize, obaganyire ensobi zoona ezi baakusobiize; obagirre embabazi omumaiso g'abo abaabanyagire, nabo nukwo babagirre embabazi,

⁵¹(habwokuba, abantu abo, bantu bawe kandi bugwetwa bwawe aba waihire Misiri omu kikoomi eky'ebyoma).

⁵²Amaiso gawe, ogate ha mwiru wawe arukukwesengereza, kandi abantu bawe Abaisirairi, akasumi koona aka baraakuterramuga omuranga, obategerege okutu.

⁵³Habwokuba niiwe wabasoroire omu mahanga goona ag'ensi, babe bugwetwa bwawe, nkooku wagambisize Musa omwiru wawe, obu waihire baisenkuruitwe Misiri.”

⁵⁴Solomooni obu yamazire kusaba n'okwesengereza MUKAMA, yaruga omumaiso g'itambiro lya MUKAMA, nambere akaba atiize amaju, agoroire emikono, agyolekiize iguru;

⁵⁵yayemerra, yasabira ekitebe ky'Abaisirairi boona omugisa, naabaza n'iraka erya haiguru ati:

⁵⁶“MUKAMA, anyakuhaire abantu be Abaisirairi obusinge, ahaisanizibwe. Byona ebi yaraganiize naabaliza omuli Musa omwiru we, busaho na kimu ekibuzireho.

⁵⁷MUKAMA Ruhanga waitu abe na itwe nkooku yabaire na baisenkurwitwe, ataliturugaho kandi atalitunagaija.

⁵⁸Atuhe okumumalizaaho emitima yaitu, tukolege byona ebi agonza, tukwatege ebiragiro bye n'ebigambo bye ebi yaragiire baisenkuruitwe.

⁵⁹MUKAMA Ruhanga waitu, aijukege akasumi koona, ebi mmusabire, arwanirrege omwiru we, n'abantu be Abaisirairi, kandi buli kiro obahege ebi barukwetaaga;

⁶⁰amahanga goona ag'ensi nukwo gamanye MUKAMA nkooku ali nuwe Ruhanga; busaho Ruhanga ondi.

⁶¹Inywe abantu be, butoosa mubege beesigwa hali MUKAMA Ruhanga waitu, muhikirizeege ebiragiro bye kandi mukwatege ebigambo bye, nkooku murukukora hati.”

⁶²Hanyuma omukama n'Abaisirairi boona, baatambira MUKAMA ekyonzira.

⁶³Solomooni, ebihongwa eby'okusaba obusinge ebi yahongiire MUKAMA, zikaba enimi emitwaro ebiri n'enkumi ibiri, entaama akasiiriira kamu n'obukumi bubiri, omukama n'Abaisirairi boona, nukwo baayereze enju ya MUKAMA bati.

⁶⁴Ha kiro eki kyonka, omukama akeeza ekicweka ekya hagati eky'ezigati ey'ekaba eri omumaiso g'enju ya MUKAMA; habwokuba oku, nuho yahongeraga ekihongwa eky'okwokya n'eky'ebyokulya, n'ebicweka eby'ebisajwa eby'ebihongwa eby'okusaba obusinge, habwokuba, itambiro ery'omulinga erikaba liri omumaiso ga MUKAMA, likaba liri ritoito, litarukusobora kuhikwaho ekihongwa eky'okwokya, eky'ebyokulya, ebicweka eby'ebisajwa, eby'ekihongwa eky'okusaba obusinge.

⁶⁵Aho, Solomooni, hamu n'Abaisirairi boona, baacumba obugenyi obwamazire ebiro musanju, hakabaho ekitebe ekikooto eky'abantu, okuruga ha ntaaho ya Hamasi, okugarukira ha kasaaru ka Misiri.

⁶⁶Ha kiro ekya munaana Solomooni yaraga abantu; baamusabira omugisa, baagaruka owaabubo, baijwire omuhimbo n'okusemererwa habw'ebirungi byona MUKAMA ebi yakoliire Daudi omwiru we, n'abantu be Abaisirairi.