Read Runyoro - rutooro 1 Bakam 9 Bible Online

1 Bakam 9 - Runyoro - rutooro bible

1 Bakam 9

¹Solomooni obu yamazire kwombeka enju ya MUKAMA n'ey'omukama, n'amaju agandi aga yagondeze kwombeka,

²MUKAMA yamubonekera obwakabiri nkooku yamubonekiire omu rubuga Gibbyoni.

³Yamugambira ati: “Mpuliire okusaba n'okwesengereza kwawe; enju enu ei wayombekere, ebe kiikaro eki ndaaramizibwamuga ebiro byona, ngyeereze. Akasumi koona, amaiso gange n'omutima gwange, ndaabiikazaaga ha kiikaro eki.

⁴Kandi obu olikora ebi ngonza nka Sso Daudi oku yakozire, oina omutima omurungi kandi oguterekeriire, okahikiriza byona ebi nakuragiire, okakwata ebiragiro byange n'ebigambo byange,

⁵ndihikiriza okunihiza okunakozire na sso Daudi obunamugambire ngu Isirairi eralemwaga abaijukuru be ebiro byona.

⁶Baitu iwe rundi abaijukuru bawe obu balireka kumpondera, obu olireka kuhondera amateeka n'ebiragiro byange ebinakuhaire, okaramya abaruhanga bandi,

⁷obu abantu bange Isirairi ndibaiha omunsi eyinabahaire eyinyereze nk'ekiikaro ekindaramizibwamuga ndigirugamu. Hoona hoona abantu balisekereza Isirairi kandi bagirole nk'ekintu ekitagasa.

⁸Enju enu erifooka ntuumo y'ekifurukwa kandi buli omu aragirabahoga aracwekwaaga enkizi ahunirre. Balyekaguza bati: ‘MUKAMA akagenderraki ensi n'enju enu kubikora ati?’

⁹Abantu baligarukamu ngu, ‘Habwokuba bakaruga hali MUKAMA Ruhanga wabo ayaihire baisenkurubo munsi Misiri. Bakeemaliza habaaruhanga abandi; baabaramya, nikyo MUKAMA abanagire akabi kanu.’ ”

¹⁰Emyaka amakumi abiri, Solomooni ei yayombekiiremu amaju abiri: enju ya MUKAMA n'ey'omukama obu yahoireho,

¹¹Hiramu omukama wa Taya akaba ahaire Solomooni embaaho ez'emiti emikogoto n'emisambya, na zaabbu yoona ei yagondeze, Solomooni na uwe nukwo kuha Hiramu embuga amakumi abiri ez'omu nsi ya Galilaaya.

¹²Baitu Hiramu obu yarugire Taya yagenda kurora embuga Solomooni ezi akaba amuhaire, ataisiime.

¹³Aho yayekaguza ati: “Mwana wa mau, zinu, ompaire embuga za mulingo ki?” Embuga ezi, nikyo zaayetiirwe ensi eya Kabula, n'okuhika hati, nukwo kugamba: “Katali mugaso”.

¹⁴Hiramu akaba atwekiire Solomooni kiloguraamu bikumi bbina eza zaabbu.

¹⁵Eki, nikyo kyayoheriize omukama Solomooni okuragira abantu n'obusobozi, bombeke enju ya MUKAMA, n'eye nyabwe, Miilo, n'ekisiika ekya Yerusaalemu, Hazooli, Megido, na Gezeri,

¹⁶(omukama Faraaho, akaba aseesire orubuga Gezeri, arwokeze n'omurro, aisire Abanyakanaani abaikaraga omu rubuga oru; kandi arusagaliire muhara we, muka Solomooni.

¹⁷Aho Solomooni, yayombeka buhyaaka orubuga Gezeri)

¹⁸na Besi-horoni eya ifo, Balaagi, na Tamara omwirungu, omu nsi eya Yuda,

¹⁹n'embuga zoona ez'okwahurwamu Solomooni ezi akaba aina, n'embuga ez'okutamu ebigaali bye, embuga ezaaraarwamuga abatembi be ab'embaraasi, kyona Solomooni eki yakagondeze kwombeka omu rubuga Yerusaalemu, Lebanoni, n'omunsi yoona ei yalemaga.

²⁰Abantu boona abaasaagireho ha: Bamooli, Abahiiti, Abapereezi, Abahiivi n'Abayebusi abakaba batali bantu ba Isirairi

²¹abakaba baina abaijukuru abasigaire omunsi, Abaisirairi aba batarasoboire kuhwerekerereza kimu abo boona, Solomooni akabafoora bairu ab'okukora emirimo, na hati hoona, bakyali bairu.

²²Baitu Abaisirairi, Solomooni atabafoole bairu; bbo bakaba bali baserikale, abandi banyoro be, abandi ngabwa z'amahe ge, abandi beebembezi be, abandi ngabwa z'ebigaali bye, kandi n'abasaija be abatembi b'embaraasi.

²³Abo nubo bakaba bali banyoro abakuru abaarolerraga omulimo gwa Solomooni; bakahika bbikumi bbitaano mu ataano, nubo baarolerraga abantu abaakoraga omulimo.

²⁴Baitu, muhara wa Faraaho, akaruga omu rubuga rwa Daudi, yataaha enju ye nyabwe, Solomooni ei yamwombekiire; hanyuma Solomooni, yayombeka Miilo.

²⁵Solomooni, yahongaga ebihongwa eby'okwokya n'eby'okusaba obusinge, emirundi esatu buli mwaka, naabihongera ha itambiro eri yayombekiire MUKAMA, acumikirra MUKAMA obubbaani. Enju nukwo yagimazire ati.

²⁶Omukama Solomooni, akakora emeeri nyingi muno omu rubuga Eziyoni-geberi, orunyakuheeriire Elosi ha musa gw'Enyanja Erukutukura, omunsi Edomu.

²⁷Omukama Hiramu, akatuma abaheereza be, abalimba abakaba bamanyire muno enyanja, baagenda hamu n'emeeri, hamu n'abaheereza ba Solomooni;

²⁸bagenda Ofira, baihayo ezaabbu erukuhikya talenta ebikumi bbina mu abiri; bagireetera omukama Solomooni.