Read Runyoro - rutooro 2 Bakam 10 Bible Online

2 Bakam 10 - Runyoro - rutooro bible

2 Bakam 10

¹Ahabbu akaba aina abaijukuru nsanju abakaba bali Samaliya. Yehu akahandiikira abalemi b'orubuga Samaliya, abakuru, n'abalinzi abaalindaga abaijukuru be naagamba ati:

²“Ebbaruha enu obu eraaba neebahikaho eti, baijukuru ba mukama wanyu nkooku bali nainywe, kandi nkooku mwina ebigaali n'embaraasi, mwina n'embuga ezigumire n'ebyokurwanisa,

³mukome omu ha baijukuru be arukukirra kimu oburungi, kandi anyakusemeriire mali okukira abandi, mumute ha kitebe kya isenkuru, murwanirre enju ya mukama wanyu.”

⁴Baitu eki bakakitiina muno, nukwo kugamba bati: “Ee, abakama babiri ka batarasoboire kumwema omu burangara; niitwe turaamusobora?”

⁵Ogu ow'akaba naarolerra ekikaali, n'ogu ow'akaba naarolerra orubuga, hamu n'abakuru n'abalinzi, baatumaho Yehu nibagamba bati: “Itwe tuli bairu bawe, kandi nitwija kukora kyona eki oraakaturagiraga. Busaho n'omu ou tulifoora mukama; okole kyona ekyorukurora kisemeriire.”

⁶Yehu akabahandiikira ebbaruha eya kabiri naagamba ati: “Obu muraaba muli ha rubaju rwange, kandi mumaliriire kumpurra, baijukuru ba mukama wanyu, mubacweho emitwe, ijo omu kasumi nka kanu, mugindeetere.” Baijukuru b'omukama abo abantu nsanju, bakaba bali hamu n'abantu abakuru ab'omu rubuga, abakaba nibabooroora.

⁷Bakuru b'orubuga Samaliya obu baatungire ebbaruha ya Yehu, baakwata baijukuru b'omukama abo ensanju, baabaita, emitwe yabo baagibengera omu bigega, baagimutwekera Yezereeri.

⁸Omukwenda obu yamuhikireho, amugambiire nkooku baleesire emitwe eya baijukuru b'omukama, yagamba ati: “Mugituume omu ntuumo ibiri ha mulyango gw'irembo, ikaleho okuhika nyenkya.”

⁹Nyenkya obu yaimukire, yagenda ha irembo, akeemerra yagambira abantu ati: “Inywe timwina musango, ninyowe naliiraine mukama wange namwita: kandi banu boona baisirwe oha?”

¹⁰Mumanye, byona MUKAMA ebi yagambire ha nju y'Ahabbu, nkooku hatalibaho na kimu ekitalihikirra; habwokuba MUKAMA akozire eki yagambiire omu muheereza we Eriya.

¹¹Abantu ab'enju y'Ahabbu abakaba basigaireho, abantu be boona ab'ekitiinisa, enganjani ze nfenanfe na banyakatagara be, Yehu nukwo yabaisire ati yabanaga Yezereeri okuhika obu yakabamaliireho kimu.

¹²Hanyuma akaimukya yagenda Samaliya. Obwakaba akyali omu muhanda, ahikire omu kiikaro entaama eki zaasalirwamuga ebyoya,

¹³yaitirana abanyaruganda b'Ahaziya omukama wa Yuda, yabakaguza ati: “Ninywe baha?” Baamugarukamu bati: “Tuli banyaruganda b'Ahaziya, twizire kubungira abaana b'engoma n'aba nyina omukama.”

¹⁴Yehu yagamba ati: “Mubatwale bali boomeezi.” Baabatwara bali boomeezi, baabaitira ha kiina nambere entaama zaasalirwamuga ebyoya, abantu makumi ana na babiri, atalekeho n'omu.

¹⁵Obu yarugire oku, akaitirana Yehonadabu mutabani wa Rekabbu naija kumutangirra: yamuramukya, yamukaguza ati: “Oli w'amazima hali nyowe, nkooku ndi w'amazima hali iwe?” Yehonadabu yagarukamu ati: “Nukwo kiri.” Yehu yagamba ati, obu kiraaba kiri kiti nkwata omu ngaro. Yamukwata omu ngaro. Yehu yamutembya omu kigaali kye.

¹⁶Yagamba ati: “Ija tugende hamu, orole nkooku ngonza MUKAMA.” Yamutembya omu kigaali kye.

¹⁷Obu yahikire Samaliya, boona Ahabbu aba akaba asigaizeyo yabaita, okuhika obu yakabamaliireho kimu, nkooku MUKAMA yagambiire Eriya.

¹⁸Hanyuma Yehu akasorooza abantu boona yabagambira ati: “Ahabbu akaheerezaaho Baali; baitu Yehu naija kumuheerereza kimu.

¹⁹Habweki nu, munyetere abarangi ba Baali boona, boona abanyakumuramya, na banyakatagara be boona; hatabaho n'omu araburaho, habwokuba nyina ekyonzira eky'ekitiinisa eky'okuhongera Baali. Weena araaburaho, ogu w'okwitwa.” Baitu Yehu, eki akakigambisibwa obugobya, nugo amagezi yacwire kuhwerekereza abaaramyaga Baali.

²⁰Yaragira ati: “Mukome ekiro eky'okuramya, eky'okutamu Baali ekitiinisa!” Baakikoma.

²¹Yehu yatumaho Abaisirairi boona, boona abaaramyaga Baali baija, hatabeho n'omu ayabuzireho. Baataaha omunju ya Baali, yoona yaijura.

²²Yehu yaragira nyakatagara ayaroleerraga eryahurro eryayahurwamuga ebyokujwara yamugambira ati: “Leeta ebijwaro obihe boona abanyakuramya Baali.” Yabibaleetera.

²³Yehu, nubwo yataahire omunju ya Baali, hamu na Yehonadabbu mutabani wa Rekabu; yagambira abaaramyaga Baali ati: “Muserre, murole omuli inywe, hatabamu omuheereza wa MUKAMA n'omu, habeho abanyakuramya Bbaali bonka.”

²⁴Hanyuma yagenda kuhonga ebyonzira n'ebihongwa eby'okwokya. Omu kasumi ako, Yehu akaba ataire aheeru abasaija kinaana, yabagambira ati: “Omuntu weena ow'araaleka omuntu ha bantu banu aba mbataire omu ngaro akagenda, ogu nuwe araitwa omu kiikaro kye.”

²⁵Ahonaaho obu yamazire kuhonga ekihongwa eky'okwokya, yaragira omulinzi n'engabwa ati: “Mutaahe, mwite abantu abo boona; hatabaho n'omu atabuka.” Omulinzi n'engabwa obu baamazire kwisa abantu abo empirima, babahungura aheeru, bbo baataaha omu kisiika eky'omunda eky'omunju ya Bbaali,

²⁶baihayo enyomyo eyeekaba eri omunju ya Bbaali, baagyokya.

²⁷Baacwacwana enyomyo ya Bbaali, baaseesa enju ye, baagifoora kibuga kikyaroho na hati.

²⁸Yehu nukwo yacwekeriize Baali ati, yamumarra kimu omu Isirairi.

²⁹Baitu ebibi Yerobbowamu mutabani wa Nebati ebi yanagiremu Isirairi, ekibi eky'okuramya obunyana obw'ezaabbu obukaba buli Beseeri na Daani atabifuuhye.

³⁰MUKAMA akagambira Yehu ati: “Habwokuba okeekamba wakora eki ndukugonza, enju y'Ahabbu wagikora byona ebikaba bindi ha mutima, abaijukuru bawe ab'enyakana, balikarra ha kitebe eky'obukama ekya Isirairi.”

³¹Baitu Yehu atateho omutima okugendera n'omutima gwe gwona ha biragiro bya MUKAMA Ruhanga wa Isirairi; omu kiikaro kyabyo, akahondera eky'okurorraho kya Yeroboamu, ayatwaliriize Isirairi omu kibi.

³²Omu biro ebi, MUKAMA nubwo yatandikire okukeehya Isirairi. Hazayeri akababinga yabamarra kimu omu Isirairi:

³³Okurugirra obuturukaizooba bwa Yorudaani, ensi yoona eya Giryadi, ey'Abagaadi, Abarubeeni, Abamanaase, yabamara Aroheri enyakuli haihi n'ekihanga eky'Arunooni, niyo Giryadi na Basani.

³⁴Ebindi Yehu ebi yakozire, amaani ge goona, bikahandiikwa omu kitabu eky'obusinge bw'abakama ba Isirairi.

³⁵Yehu akafa nka baisenkuru oku baafiire, yaziikwa Samaliya. Yehowahazi omutabani, yateera engoma omu kiikaro kye.

³⁶Akasumi Yehu aka yalemiire Isirairi omunsi Samaliya, ekahika emyaka abiri na munaana.