Read Runyoro - rutooro 2 Bakam 11 Bible Online

2 Bakam 11 - Runyoro - rutooro bible

2 Bakam 11

¹Asaliya nyina Ahaziya obu yaboine mutabani we nkooku afiire, akaragira bahwerekereze abaana b'engoma boona.

²Baitu Yehoseba muhara w'omukama Yoramu munyanya Ahaziya, akakwata Yowaasi mutabani w'Ahaziya, yamwiba omu batabani b'omukama abakaba bali haihi kwitwa, yamuta omu kisiika eky'okuraaramu hamu n'omulezi we. Nukwo yamwihireho Asaliya ati, tiyaitwa;

³Asaliya obwakaba naakyalema ensi, Yehoseba nukwo yamazire ameezi mukaaga ati, amuserekere omunju ya MUKAMA.

⁴Baitu omu mwaka ogwa musanju, Yehoyada yatuma kandi yaleeta engabwa ez'Abakariiti n'ez'abalinzi, yabeeta bagende bamusange omunju ya MUKAMA; nuho yakoliire nabo endagaano kandi nuho yabarahiriize; yabooleka omwana w'omukama.

⁵Yabaragira naagamba ati: “Kinu nikyo ekintu eki murukwija kukora: kimu kya kasatu hali inywe abanyakwinuka ha Sabbato, nubo balindege ekikaali;

⁶ekicweka ekya kasatu ekindi kirindege ha irembo erya Suuli, ekicweka ekya kasatu ekindi kirinde ha irembo ery'enyuma y'abalinzi abandi;

⁷ebicweka ebibiri hali inywe ebinyakuba ha mulimo ha Sabbato, nibyo birindege enju ya MUKAMA, birindege n'omukama,

⁸buli muntu akwasire ebyokurwanisa bye; weena owaaliiriirra enkarra ezi mwemeriiremu, ogu aitwe. Hoona omukama nambere arakagendaga, mutalimurugaho.”

⁹Engabwa ikakora byona Yehoyada nyakatagara ebi yaragiire, buli muntu akaleeta abasaija be abakaba bali b'okwinuka ha Sabbato, hamu n'abo abakaba bali b'okutura ha Sabbato, baahikaho Yehoyada nyakatagara.

¹⁰Yabaha amacumu n'engabu ebikaba biri by'omukama Daudi ebikaba byahwirwe omunju ya MUKAMA;

¹¹abalinzi baayemerra, buli muntu akwasire eby'okurwanisa bye, okuruga ha rubaju orwobulyo orw'enju, okuhika ha rw'obumoso, okwehinguliriza itambiro n'enju.

¹²Hanyuma yaturukya omwana w'omukama, yamujweka ekondo, yamuha ekopi ey'ebiragiro by'obukama; yamurangirra ati: Hati onu MUKAMA, yamuseesaho amagita. Abantu baateera omu ngaro, nibagamba bati: “Hangiriza Agutamba!”

¹³Asaliya obu yahuliire abalinzi n'abantu nibatoka, yataaha omunju ya MUKAMA abantu nambere bakaba beesorooliize;

¹⁴obu yanagire amaiso, yarora omukama ayemeriire haihi n'enyomyo, engeso nkooku ekaba eri, engabwa n'abateezi b'amakondere bamuli orubaju, abantu ab'ensi yoona baijwire omuhimbo nibateera engwara, yatemura ebyokujwara bye, yatokera ha iguru ati: “Mufuhye obugobya! Barungi mufuhye obugobya!”

¹⁵Nubwo Yehoyada nyakatagara yaragiire engabwa ezaatairweho okurolerra ihe ati: “Omukazi ogu mumurabye omu nkarra ez'abalinzi abo mumuleete; weena ow'araalengaho kumujuna, mumwise ekitara.” Habwokuba akateekereza ati: “Omukazi ogu tikiri kirungi kumwitira omunju ya MUKAMA.”

¹⁶Baamukwaata, bamutwara omukikaali bamwitira ha kikaro ekyayetwaga Mulyango gw'Embaraasi.

¹⁷Yehoyada nyakatagara akagamba omukama Yowaasi n'abantu bakole endagaano na MUKAMA nukwo babe bantu ba MUKAMA; yayongera yakora endagaano hagati y'omukama n'abantu.

¹⁸Nubwo abantu bagenda omunju ya Baali bagiseesa; baasasangura emeeza y'ebihongwa n'ebisisani kandi Mattani nyakatagara wa Baali baamwitira omumaiso g'emeeza y'okuhongeraho. Yehoyada ha Yekaro yataho abaliinzi,

¹⁹nubwo uwe, abanyoro be, abalinzi b'ababito, n'abalinzi b'ebikaali n'abantu boona baamukurata. Yowaasi yataahira ha irembo eryayetwaga Irembo ly'Abalinzi, yajwara ekondo.

²⁰Abantu boona baijura okusemererwa n'orubuga rwatunga okuteekana habwokuba hati Asaliya akaba amazire kwitirwa omu kikaali.

²¹Yowaasi akafooka mukama wa Yuda ahikize emyaka musanju ey'obukuru.